المساعدة في كيا برايد سيدان

[haitham2008]

انا قدامي عربية برايد سيدان
موديل 99
عايز اعرف هل قطع الغيار متوفرة ؟ واسعارها؟
واية هية مشاكل العربية؟
الرجاء الاهتمام.

[gaboor]

بص انا حجاوب من واقع تجربتي الحالية مع العربية . انا ولدي معاه العربية ده بس اتوماتيك موديل 2000 زيرو . بص العربية في الاول كانت تمام و مكنش ليها مشاكل الحمد لله و لكن اخر سنة و بسبب استخدام اخويا الجامد جدا فيها حصلت مشاكل كتير لدرجة ان العربية فتحت بقها جامد و انا بصلح فيها في حجات حتدخل تقريبا في 5000 جنيه ميكانيكا فقط في مركز الخدمة بتاع محمد زكي . بصراحة العربية ده تصليحها عند المكانيكية بره التوكيل تعابني جدا لدرجة ان التوكيل السنة اللي فاتت قالنا ان تصلحها و دهانها بالكامل حيدخل في 3500 جنيه و لكني لما حبيت اعملها في ورش الحي السابع ميكانيكا بس كلفني تقريبا 4/3 المبلغ ده و برضه العربية متظبطتش فأحسن حاجة انك تعتمد علي ربنا ثم التوكيل ." ده من واقع خبرتي " و ده بصراحة اللي حعمله لو جبت عربية لنفسي .
بالنسبة لاسعار قصع الغيار فأنا حكتبلك الاسعار ده من توكيل محمد زكي.
فلتر هواء 36 جنيه
فلتر بنزين 23 جنيه
بوجيهات 60 جنيه
قاعده فتيس امامية 90 جنيه
تيل امامي 125 جنيه
تيل خلفي 90 جنيه
طنابير خلفية 410 جنيه
6 كاوتش قنطرة 49 جنيه
بلية كاتينة 90 جنيه
سير كاتينة 150 جنيه
سير دينامو 42 جنيه
زيت باور 65.85 جنيه
2 بلي عجل خلفي 340 جنيه
اويل سيل بلي خلفي 36 جنيه
2 اكس عجل خلفي 200 جنيه
2 صامولة اكس 24 جنيه
من بره التوكيل
فانوس خلفي تقريبا 70 جنيه . معلش مش فاكر اوي لان كان من فترة حوالي 4 اشهر
شبكة امامية حوالي 50 جنيه برضه في الرينج ده و دهانها بيكون ب 40 جنيه تقريبا

هي ده معلوماتي عنها , وبالنسبة للاتزان لو انت بتاخد ملف جامد انا بحس انها حتقلب مني . ممكن ده علشان العربية حاليا في فترة اصلاحات !!!!

و ولا و اخيرا روح اكشف علي العربية و شوف حاليتها ايه و نصحتي ليك شوف الانوس ايه اخبارها لاني في نظري هي احسن في المساحة الداخلية و عزلها كمان افضل عن تجربة و اظن بالنسبة للمستعمل فالاعضاء هنا الحمد لله قادرين بإذن الله يفيدوك فيها و ربنا يوفقك لما فيه الخير

[tmedhat]

و لا احلا من كدة

حقيقى انت رديت باستفاضة

العربية مجملها حلوة ومشاكلها بسيطة جدا لو احسن استخدامها

[haitham2008]

الشكر والعرفان

الف شكر ياباشا علي الرد الجامد دة
وشكرا علي الاهتمتم والرد

[max_ziro]

هى فعلا عربية جميلة عن تجربة قطع غيارها متوفرة زى ال128 و رخيصة مش غالية و بتشم البنزين شم و كفاية انها صغيرة و محندقة و شديدة و بتجرى سحبها و شدها حلو انا بتكلم على المتور ال 1300 دى اللى جربتها مش فاكر ليها عيوب غير بسيطة فى العفشة
بس عموما لو استخدامك نضيف هتكون زى العسل معاك ..

[ihab]

اوحش حاجة فيها بلى العجل الامامى بواظ بطريقة غريبة

[gaboor]

"و لا احلا من كدة

حقيقى انت رديت باستفاضة"

يا باشا انت الاحلي . الف شكر علي ردك الجميل

"الف شكر ياباشا علي الرد الجامد دة
وشكرا علي الاهتمتم والرد "

العفو يا haitham2008 باشا ده الواجب , و ربنا يوفقك للي فيه الخير ليك بإذن الله

[haitham2008]

سؤال جديد

ممكن اسعار المساعدين ؟امامي وخلفي؟واحسن الانواع؟
اسعار الاكصدام الامامي؟؟
احسن حاجة اية اسعار العفشة كلها؟
واية احسن حجات خاصة بكهرباء العربية؟من بوجيهات ؟
وفيوزات وحجات زي دي؟