نويت ان شاء الله شراء كيا ريو 2004 كاملة منوال ارجو الافادة

[klumzo]

اعضاء المنتدي المحترمين السلام عليكم
نويت ان شاء الله شراء كيا ريو 2004 العربية كاملة مانيوال
ماشية 106000 كيلو متر
عايز اعرف مزايا وعيوب الموديل دة
وقطع الغيار متوافرة ولا لا
والسعر المناسب للعربية

واماكن الصيانة ان امكن

ارجو الرد سريعا

[klumzo]

اية يا شباب الكيا معقول مفيش في المنتدي حد يقولي مزايا وعيوب ريو 2004

اية يا شباب الكيا معقول مفيش في المنتدي حد يقولي مزايا وعيوب ريو 2004

هي حالة نادرة للدردجة دي

يعني مشتريش ولا اية

انا قلقت والله


انا مش طالب مستحيل

المزايا والعيوب

واماكن الصيانة

[SmartMega]

معلش ياباش انا لسه شايف الموضوع دلوقتي
العربيه قمه في الروعه انا واحد صاحبي كان معاه العربيه دي موديل 2004 فيراني العربيه بجد قمه في الروعه من ناحيه الآداء والثبات والسرعه والراحه سافرنا بيها كذا مره أسكندريه والله العظيم علي 180كم والعربيه كانت قمه في الثبات ..... تجميع السرعه عالي جدا بس كان فيها مشكله واحده هي التنابير بتاعتها كان كل فتره بيغيرها علشان لما بيبقي ماشي علي سرعه ويهدي او يفرمل التاره الدريكسيون وتترعش منه بشكل مخيف وبصراحه انا مش عارف ده بسبب إيه ....
اما بقي قطع الغيار فمقدرش أفيدك فيها وفي أسعارها لأن هو تقريبا مغيرش حاجه فيها لحد ما باعها هو باعها من حوالي 8 شهور العربيه كانت حالتها ممتازه وكانت عامله 65 الف كم وكنت لما بسوقها لحد قبل ما تتباع كنت بحس اني راكب عربيه زيرو الفرامل تشعر عليها برجلك العربيه تقف في ساعتها ...تشعر بنزين تلاقي العربيه طارت ...بسم الله ما شاء الله هو باعها دلوقتي وجاب نيسان صني
أتمني أكون قدرت أفيد حضرتك... ولو في أي حاجه انا تحت أمرك

[klumzo]

كفاية ردك يا باشا
شاكر جدا اهتمامك
ربنا يكرم

[klumzo]

خبراء الريو افيدونا

بس احنا لسة في حاجة
لآهل الخبرة
اللي يفيدونا اكتر

في الانتظار يا شباب

[the_first_knight]

بسم الله الرحمن الرحيم
في البداية ربنا يوفقك في اختيارك

من حيث مميزات الريو 2004 :
• شكل انسيابي رياضي
• اقتصادية في استهلاك البنزين
• قطع غيار متوافرة وأسعارها معقولة
• المساحة الداخلية ملائمة لاحتياجاتي ( متزوج حديث )
• مساحة الشنطة الخلفية معقولة
• ومزايا أخرى كتير ....

عيوبها :
عفشة ناشفة نسبيا في المطبات
سحب السيارة يتأثر نوعا ما مع تشغيل التكييف
المساحة الداخلية لا تلائم طوال القامة
يمكن أن تحك في المطبات مع كامل حمولتها وأغراض في الشنطة ... ويمكن تفادي ذلك بالدخول على المطب بالجنب وببطء شديد .

من حيث قطع الغيار :
أعتقد دلوقتي بقت متوافرة أكتر من الأول ( بعد التوكيل الجديد )
وفي ناس كتير بتشتغل فيها ( سوق التوفيقية - شارع دمشق - شارع شامبليون .... )

من حيث الصيانة :
حتى لو كانت في التوكيل فتعتبر عادية بالمقارنة بمنافساتها .
وكمان في ناس كتير فاهمين فيها .
ونصيحة مني : لازم تعمل فحص شامل للعربية بالكامل ... وده بيعرفك حالة كل قطعة من أجزاء السيارة .

من حيث اقتصاديتها :
مصاريف تشغيلها الدورية من بنزين وزيوت وفلاتر تعتبر مقبولة ( وخللي بالك من موضوع الزيوت والفلاتر لازم تغيرها كلها لو هتشتري ... وكمان تغير مياه الرادياتير بماء أخضر )

وربنا يوفقك

ولو في أي استفسار أنا تحت أمرك

[klumzo]

انا شاكر جدا ردك وزوقك العالي

بالنسبة لكلامك

ونصيحة مني : لازم تعمل فحص شامل للعربية بالكامل ... وده بيعرفك حالة كل قطعة من أجزاء السيارة .

اية اللي تنصحني بية في عملية الفحص
ارفعها في محطة بنزين ويكشفو عليها
واية تاني

ياريت النصيحة
وهي افضل ولا الفيرنا


انا شاكر جدا ليك تاني

[the_first_knight]

انا شاكر جدا ردك وزوقك العالي

بالنسبة لكلامك

ونصيحة مني : لازم تعمل فحص شامل للعربية بالكامل ... وده بيعرفك حالة كل قطعة من أجزاء السيارة .

اية اللي تنصحني بية في عملية الفحص
ارفعها في محطة بنزين ويكشفو عليها
واية تاني

ياريت النصيحة
وهي افضل ولا الفيرنا

أنا اللي أقصده فحص شامل لكل جزء من أجزاء السيارة , وده بيكون في التوكيل ... وأعتقد مش بيكلف كتير

ومن ناحية الفيرنا , فهما متقاربين ( الفيرنا تجميع مصري , الريو كوري )
أعتقد إن الاختلافات بينهما بسيطة ( الهيونداي والكيا تتبعان نفس الشركة في كوريا )

وعن نفسي لو هختار دلوقتي هشتري الريو , ولو هغير عربيتي واجيب كوري أكيد هتبقى السيراتو .

وربنا يوفقك


انا شاكر جدا ليك تاني

[klumzo]

متشكر اهتمامك

بس انا روحت سوق السيارات النهاردة ولقيت ريو 2004 اتوماتيك زجاج امامي كهرباء
والخلفي عادي

وحالتها حلوة بناء علي كلام صديقي اللي كان معايا

السعر 40000 يا تري تنصحني اخدها ولا لا
وفين مكان التوكيل اللي افحص فية العربية
يعني فين في القاهرة
وكم تقريبا تكلفة الفحص


شكرا لاهتمامك

[mo7a_mo7a]

انا شايف ان سعرها كويس جدا