أنا خلاص زهقت

[deeho]

أنا حاجز سيراتو sx من الوكيل من يوم 29/3 و اخر حاجة كان أمجد بيه مدير المبيعات قايلها الاستلام أول 7 ،النهاردة كلمته قاللى أول 8. أنا حا جز كمان من معرض من يوم 14/5 و بأوفر برايس و برده لسه ماستلمتش.
أنا بعت e-mail لكوريا من يومين شرحت فيه اللى حاصل كله و السوق السوداء و الرشاوى و لم يردوا.
أنا ساكن فى العبور و بعت عربيتى بعد ما حجزت مع الوكيل لأنهم وعدوا ان التسليم بعد أسبوعين، ربنا ينتقم منهم

[KoDaK_Gti]

ربنا معاك
و تابع موضوع الميل مع الشركة الام لأن دى خطوة كويسة ان شاء الله يردو عليك

بس انا عاوز اسأل على حاجة فى معارض صغيرة بتكون عارضة السيراتو عندها
هل دى بتبقة بيع فورى بأوفر برايس ولا ايه بالظبط ؟

[nano1980]

شوف عربيه تانيه احسن بدل البهدله اللي انت فيها

[bassemforever]

انا كنت زيك كدة واخدت منهم اكتر من 6 مواعيد فى الاخر سحبت الفلوس وروجبتها من برة اغلى الفين ونص من سمير ريان من الاخر كدة زى كل حته فى مصر فى نصب علينى امجد بيه دة معندوش ضمير لانه كلمنى بعد ماتخانقت مع حاتم سمير احد طاقم النصب فى توكيل كيا وقالى هتستلم بكرة واخدت اجازة من الشغل وفى الاخر اتصل بيا 10 بليل يقولى لا انت الخميس الجاى لا الى بعده يعنى بالعقل كدة لو فى مصدقاية كان قالى هتتاخر يوم او يومين لكن اسبوعين عن المعاد النهائى الى متاجل قبله 6 مواعيد دة استهزاء بينا وحرقة دم وكل الى يقبل يكذب على الناس فى شغل وفى حاجة مهمة زى دى يبقى فلوسه حرام وبياكل ولاده من حرام لان دة نصب لانى عرفت انهم بيعملوا كدة علشان يلتزموا بالسعر المعلن للعربية لكن العربيات بتروح لسمير ريان والمعارض التانية وبسعر اغلى شوية لانهم بيدفعوا فلوس للتوكيل سواء بعلم المديرين او بالتواطؤ مع المبيعات فاسحب فلوسك من شلة النصب دول او استنى الى مالا نهاية وبرضو شوف السيتى لو شكلها يعجبك انا سامع ان سعرها نزل

[a7m8n]

كيا سيراتو

الاخ صاحب الرساله الاصليه انا كنت عامل موضوع هنا فى المنتدى بتاع كيا موضوع اللى عاوز يشترى سيراتو ومتعزب ومش لاقى ووصلنا الى ان التوكيل بيهرج وشغلى تسويق مصرى مؤرف وكله نصب واصحاب المعارض بيستهبلو وبيبيعو اوفر برايس
ياسيدى الفاضل احنا وصلنا الى ان العربيه وصلت لى سعر 8 الاف جنيه عن سعرها الاصلى حضرتك ممكن تشوف الموضوع وتقرى تعليقى وتعليق الناس وقولنا ياجماعه بلالالالاش اوفر برايس احجز ياسعه الباشا بالسعر المعلن من اى حته اتأخرو فى الاستلام كلمهم فى التليفون هزئهم بهدلهم انما اوفر برايس لا
ببساطه الناس بتستغل لهفه الناس على العربيه وشبكه للنصب والاستعباط اتكونت والبهوات بتوع التوكيل مشاركين فيها ياغم روح اسحب فلوسك واشترى بعدين او شوف بديل تانى سورى يعنى طز فى سيراتو لو كان الموضوع كده
العربيه والله حتبقى مرطرطه بعد كده بس الصبر ياجماعه

[lord0000]

يا باشا انا كنت حاجز من الوكيل في المعادي من 30 -3 و بجد أمجد ده يامل نصاب يااهبل و بعد 1000 وعد سحبت فلوسى و بجد حسبي الله و نعم الوكيل

[mishtawy]

والله ياجماعة كان الله في العون لان الواحد عارف البهدلة اللى بتحصل لما الواحد يبيع عربيته ويفضل مستني لكن برضه الواحد مع الراي اللي بيقول لا للاوفر برايس لان ده ممكن يخليهم يعطشوا السوق حتى لو السيارة موجودة لزيادة السوق السوده واللي مستعجل يشتري سيارة اخري وبلاش الكيا يعنى زي ما قدروا يزهقوك لاتشتري منهم انا عارف ان السيارة ملفته وانا حاجز برضه من التوكيل sx لكن والحمد لله لسه لم ابع سيارتى لكن لو زهقت هاعمل كدة وده رايي والسيارة بعد فترة ستصبح عادية واسف على الاطالة

[M.Hosni]

انا كمان كنت حاجز من 1 ابريل ومستلمتش و بهدلتهم امبارح و اخذت فلوسى و حسبى الله و نعم الوكيل

[seaman]

انا علقت على الوضع ده قبل كده وانا لازلت عند رأى ان العيب فينا قبل ما يكون من التوكيل ..طب التوكيل به بعض الاشخاص النصابين واحنا عارفيين رايحين نحجز ( يعنى بمزاجنا)..عيب يا جماعه
ثانى حاجه الله يرحمك يا محمد يا نصير لو سمبع بالمهزله ديه كان فور الطقم بتاع المبيعات.. ..لكن اتمنى ان خالد نصير يبقى نعم الخلف ويتدخل فى وقف المهزله، السيراتو سياره جيده لكن العند ممكن يخلى الناس تبعد عن كيا انا عارف حرقه الدم ممكن توصل الناس للذهاب الى اى سياره اخرى ..اللينا مثلا...وسلملى على السيراتو...وعلى كيا..
المنتدى هنا فى ناس فاهمه شاركى-سبعاوى-كريم-احمد سامى-فادى( يارب تنجح) ياريت يتواصلوا مع باقى اعضاء المنتدى فى توجييهم فى اسلوب التعامل مع الوكلاء والموزعين...احنا قوه فى سوق السيارات فى مصر الكلام ده بجد ياجماعه والمنتدى عنده القدره على ذلك

[hedyelnemr]

انا زهقت زيك بالظبط... نفس الموضوع تماما... وسحبت فلوسي... وبقالي اكتر من شهر بايعة عربيتي بسبب كذبهم.. عشان كده قررت اجيب الخليجي .. بصراحة مش شايفة منافس للسيراتو.. شفت السيتي الجديدة.. واللانترا.. مالقتش حلجة منافسة بصراحة.

انا كمان قررت الجأ لجهاز حماية المستهلك .. جشع التجار مالوش حل.. الأوفر ما بقاش الف ولا اتنين.. بقى بال 10000 الاف

[lord0000]

طيب حد يعرف حد عنده خليجي بسعر معقول ؟

[dodi2]

يا جماعة عايزين نبعت ايميلات لصاحب التوكيل و لما يلاقى عدد كبير بيلح و بيشكى لازم يتحرك و خصوصا ان فيه ناس حاجزة ,
و لما ناس تشكى من اسم معين ممكن يوصله الكلام و يتراجع شوية

[dodi2]

و دا احنمال يعنى بس الناس لازم تعمل حاجة مش تستنى بشهور و بعدين تروح تشترى الخليجى باغلى !!!!!!!!!!!!!!

[hedyelnemr]

الخليجي عند جابر عبد الشهيد واوتو سمير ريان. لو هاتجيبها كاش مش هايبقى في مشكلة ، بس لو هاتجيبها بجزء قسط في مشكلة لأن الخليجي من غير فواتير، وعشان تاخد فاتورة تدفه 5000 جنيه أوفر الأوفر!!! ودي حاجة صدمتني وعرفتها بس امبارح.

[أحمد كمال]

الخليجي عند جابر عبد الشهيد واوتو سمير ريان. لو هاتجيبها كاش مش هايبقى في مشكلة ، بس لو هاتجيبها بجزء قسط في مشكلة لأن الخليجي من غير فواتير، وعشان تاخد فاتورة تدفه 5000 جنيه أوفر الأوفر!!! ودي حاجة صدمتني وعرفتها بس امبارح.

و الله الواحد مش عايز يتلفظ عشان السيدات و الانسات المحترمات اللي معانا في المنتدى


5000 جنيه تمن الفاتورة فوق الاوفر برايس كمان


لـــــــــــــــــــــــــــــــــــــــــــــــــ ـــــــــــــــيــــــــــــــــــــــــــــــــــ ــــــــــــــــــــــــــــــه؟؟؟؟؟؟؟؟؟؟؟؟؟؟


فاتورة مكتوبة بمية الدهب على الحرير الصيني الاصلي و لا ايه؟



كفاية بقى الوكلاء و الموزعين دول عايزين ال


نفسي بجد تصدي و موديلها يعدي


حسبي الله و نعم الوكيل