أحسن مركز خدمة = أبو رواش

[Amr A.salam]

امبارح كنت باعمل صيانة ال1000 لعربيتي نيو سيراتو EX (خليجي) في فرع أبو رواش

وبصراحة مع ان المشوار بعيد وكان فرع روكسي أقرب بكتير الا أني لم أندم اطلاقاً

أولاً كنت حاجز علي الساعة 11 الظهر ووصلت 11 بالضبط

الانطباع الأول انهم منظمين ومحترمين والمعاملة كويسة

مهندس الاستقبال استلم مني العربية وقاللي الساعة 1,45 هنخلص

نزلت قاعة الانتظار وهي قاعة واسعة جداً وفيها Wifi .....ما حسيتش بالوقت الا وهم بينادو علي اسمي الساعة واحدة بالضبط

العربية كانت خلصت ......قبل ما استلم قلت أروح أسلم علي المهندس خالد فاروق مدير الفرع

سلمت عليه وقلت له الناس في منتدي نايل موتورز بتشكر في الفرع دة جداً وبيشكروا فيك جداً جداً وماكنتش عايز اجي الفرع وأمشي من غير ما أسلم عليك

بصراحة المهندس خالد انسان في قمة الذوق والتواضع وكان مبسوط جداً بالثناء دة ولكنه أرجع الفضل بعد الله الي المجموعة اللي معاه (مش باقوللكوا في قمة التواضع )

الكلام أخدنا لموضوع المصفحة اللي بتركب فوق الشكمان علشان السخونية علماً بأني ما حسيتش بسخونية الكونسول قبل كدة خالص

ولكنه لما عرف أن عربيتي خليجي قاللي المفروض بتنزل فيها المصفحات دى ...قلت له ممكن نتأكد ؟؟

قام خلاهم يرفعولي العربية ووقفنا تحتها ووراهملي بنفسه (الحمد لله انهم طلعوا راكبين فعلاً)

وراجع بنفسه علي غسيل الموتور بالفوم وراجع علي التنظيف الداخلي للسيارة فما عجبوش فزعق في الناس وقاللهم ينظفوها كويس........طبعاً رجعوها فابريكة تاني بتلمع من كل حتة

ومن غير ما أفتح بقي راح مضي علي الفاتورة بتاعتي بخصم 10 %
كنت هدفع 460 دفعت 400 بس
دة طبعاً مش علشان سواد عيوني وانما علشان مشترك في أحسن منتدي في الكوكب

وأنا ماشي شكرته جداً جداً جداً وكنت مبسوط جداً

انطباعي عن العربية وانا ماشي ( غير اللمعان الداخلي الغريب طبعاً )

1- الهاند بريك كنت قلتلهم يشدوها شوية وفعلاً شدوها وبقت تمام

2- التكييف اتغير 180 درجة (هما أكيد نضفوا فلتر هواء التكييف وممكن يكونوا شحنوه فريون ...مش عارف المهم أنه بقي تلاجة كريازي)

3- صوت العربية قل شوية والسحب زاد شوية برضه

الخلاصة ان العربية فاقت

صحيح كنت هانسي وانا ماشي أختم كتاب الصيانة بس الحمدلله افتكرت وختموه

بجد يا جماعة العربية عليت في نظري جداً بسبب توكيلها ومستوي خدمة ما بعد البيع
فعلاً (كيداهم )............ لا مؤاخذة يا دكتور


وانا راجع كمان قلت لازم تكمل رحت معدي علي جابر عبد الشهيد علشان أشوف الكوبيه COUP وبجد تحفة فنية علي الحقيقة


شكراً للمهندس خالد فاروق

شكراً لأجدع منتدي في الدنيا

وشكراً لكل اللي هايصبر ويقرأ كل دة

[gebreel]

توكيل كيا ز رينو محترمممممممممممممممممممممممممممم و مفيش كلمة زيادة تتقال بعد كدة
الف مبروك على الصيانة و عقبال صيانة المليون ان شاء الله

[Ahmed Samy]

انا مش مستغرب علشان اللي بتقول عليه ده حصلي قبل كده

ذوق و احترام الحقيقة في كل شبر من المركز

كايداهم طبعا

[Mshawky]

طب الحمد لله طمنتنا ولكن ليا سوال غريب شويه

فررضا ان واحد ملوش خبره فى العربيات اوى فازاى يعرف يحدد عيوبها ويقولهم عليها يعنى مثلا موضوع الهاند بريك ده مظنش اى حد يحسه بسهوله علشان يعلق عليه وموضوع مثلا زبط الزاويا او اى ملاحظه مثلا

فانا بسال بس تتعرف ازاى ولا هما بيشيكو على كل حاجه واللى ناقص بيعملو ؟

[gebreel]

بص يا باشا خما عموما بيشيكو على اغلب الحاجات بس اكيد مش كلها لان مع ضغط الشعل و الالتزام بالمواعيد لازم بتسقط بعض الحاجات و هي عموما بتدخل على اسكانر الكومبيوتر بيشيك على اغلب الحاجات اما بالنسبة لقصة ازاي تعرف العيوب علشان تقلهم عليها فانت لما تحس باي خاحة مش طبيعية قلهم عليها او قبل ماتروح الصيانة خلي حد انت بتثق فيه يسوق العربية و يقلك على اللي حاسو و ان شاء الله الدنيا هتبقى زي الفل ان شاء الله

[Ghost2]

مبروك الصيانة يا عمور .. وعقبال صيانة ال 10000000 الف ... وفعلا كل الناس بتشكر في المركز والمهندس خالد بالذات . ونجاحهم مجاش من فراغ... الناس دي بتتعب

[dr.nemo]

مبروك صيانة الالف وعقبال صيانة 120 ألف ان شاء الله

انا كنت عاوز اعرف هل أصبح هناك خصم رسمي لنا في كيا
ولا الخصم يتم بصورة فردية؟ وفي فرع أبو رواش فقط أم في كل الفروع؟

[Hosam_Optrawy]

الف مبروك عالصيانه وعقبال المليون