اخوكم هيستلم البيكانتو كمان يومين و متورط و محتاج مساعده الملاك....

[x_gomgom]

انا اشتريت عربيه كيا بيكانتو للبيت عندنا من اسبوع بس هستلم الاحد عشان البنك يكون خلص الجواب...
انهارده و انا ببص على العربيه لمحت كام حاجه و ياريت الاخوه الملاك هنا يفيدوني افادكم الله...
اولا عداد ال rpm و العربيه مطفيه و مفهاش المفتاح و النور مطفي عداد ال rpm على 1 !!!!! دا عادي دا ولا ايه و هل هو عيب و يتصلح ولا بلاش استلم احسن؟؟
ثانياً العربيه ملقيتش فيها الولاعه ولا الطفايه... اخليه يكتبهم في محضر الاستلام ولا ايه النظام ؟؟؟ يا ريت الاخوه الملاك يفيدوني,,,,,
و استلم الضمان امتي و ازاي و ايه اخلي بالي منه اثناء الاستلام...
ارجو الافاده افادكم الله
و شكراً مقدماً

[ahmad--ezzat]

الحقيقه معنديش كيا بس موضوع ال ار بى ام اللى على 1 دة غريبه....استنى اراء الاعضاء

[x_gomgom]

شكراً لمرورك و يا رب الملاك يفيدونا...
جزاكم الله خيراً

[medo_sirion]

بس ياباشا نتقلقش حصل معايا نفس الموقف بالظبط واتكلمت علية
بس لو فتحت الكبوت هتلاقى علبة الفيوزات هتلاقى قاعدة صافرة شايلة فيوزين مرفوعين لفوق هتنزلهم بيدك لتحت هتلاقى الار بى ام رجع لما طفى العربية والنور بتاع الصالون نور
اما الولاعة لازم تكون موجودة

[x_gomgom]

الف الف شكر يا استاذ ميدو على سرعه ردك و جزاك الله كل خير...
هو بالفعل الساعه مكانتش شغاله ولا نور الصالون كان شغال. و ان شاء الله هغلس و اخد الولاعه..
جزاكم الله كل خير

[YaSSerwIN]

الار بى ام والعربية مقفولة بيبقا على 0 مش على واحد

ولازم تاخد الولاعة والطفاية والأريال
ووطمن على وجود الأستبن وحالته والكوريك ومفتاح العجيل والمفك

ووحدة القطر
وكتالوجات العربية

غير كدة خليه يجيبلك عربية تانية
علشان الواحد مش بيشترى عربية كل يوم

[A.Saad]

كمان الضمان بتاخده بعد الاستلام


ومبروك

[RODYSALLAM]

البيكانتو اللى حتستلمها موديل كام

[x_gomgom]

الف شكر يا جماعه الخير و ربنا يكرمكم يا رب انا نازل كمان ساعتين كده هستلم.....
انا ان شاء الله هستلم موديل 2009 ... بالنسبه لوحده القطر دي الاقيها فين ولا اقوله عليها يديهاني؟؟ انا شوفت الاريال و كان ناقص الولاعه ربنا يستر .....
شكراً جزيلاً على الافاده

[YaSSerwIN]

متنساش وبقولهالك لتانى مرة
1- الطفاية حاجة زى الكوباية كدة قصاد عصاء الفتيس
2- الأريال
3- الولاعة
4- تتأكد من وجود الأستبن وتشوفه مستعمل ولا جديد
تتأكد من وجود الكوريك والعصاء تبعه ومفتاح العجيل
وهتلاقى معاهم مفتاح 10 او 13 ومعاه مفك كمان

5- وحدة القطر دة عاملة زى مسمار مقلوس بيتركب فى الأكصدام من قدام
6- الكتالوج
7- تستلم مفتاحين راكبيت فى بلستكة كدة مكتوب عليها كود علشان لو المفاتيح ضاعت تقدر تطلع مفتاح جديد

اجراءات عند الأستلام
1- تنزل تبص على العتب من تحت والعربية من تحت علشان اثناء وضعها للعرض وخلافه ساعات بتتحك من تحت
2- تبص على كل حتة فى العربية وجرب فتح كافة الأبواب والشنطة والنظر على اى تجريح وخلافه

تجربة كل شىء من حيث الأضاءات والأشارات فى الفوانيس الخلفية والأمامية

دور العربية شوية وشغل التكيف دقيقة بس شوفه شغال ولا فيه مشكلة

افتح الكبوت وأطمن على السوائل
1- سائل التبريد
2- زيت الفرامل

اى حاجة تلاقيها مش مريحاك فى العربية أرفض الأستلام واطلب تغيير العربية فى الحال

وطبعا ً خلى بالك من التليين

[x_gomgom]

هو اللي كان مش موجود الولاعه و الطفايه و جنش القطر... هو ينفع اذكر الحاجات دي في محضر الاستلام و اخدها من التوكيل؟
شكراً جزيلا ليك و جزاك الله كل خير

[YaSSerwIN]

على ما أظن ان التوكيل مالوش دعوة
خليه يجيبهم من عربية تانية

[Amrrr]

على فكرة ساعات بيبقوا شايلين الرفايع من العربيات لحد ماتتسلم بيركبوها - في عربيات - مش شرط كيا - بيفكوا ازاز المراية بتاعتها كمان وساعة التسليم الكلام دا كله بيركب بس ماتنساش انت تراجع عالحاجات اللي الأخوة قالولك عليها وألف مبروك

[YaSSerwIN]

فعلا ً أسهل حاجة ممكن تتشال الطفاية والولاعة حتى لو مش هاتستخدمهم
اهم حاجة تبقا واخد حقك بالكامل

[Amrrr]

فعلا ً أسهل حاجة ممكن تتشال الطفاية والولاعة حتى لو مش هاتستخدمهم
اهم حاجة تبقا واخد حقك بالكامل

على فكرة افصد انهم بيشيلوها حفاظا عليها