نيو اكسنت (عربيه كورى ولكن)

[walidjawad]

السلام والتحيه على كل الهيونداويه
الموضوع باختصار . انا كنت من يومين فى ابوغالى عشان اشوف النيو اكسنت الاتوماتك وكمان احجزها لانى قريت عنها كتير فى المنتدى الجميل ده و شكلها عاجبنى- بس ده كان قبل مااشوفها- المهم , اتفرجت عليها من بره عاجبنى شكلها اوى تحس انها (مدكوكه) كده وفيها شياكه
بعد كده خليت بتاع السيلز يفتحلى العربيه عشان اقعد فيها واستفرج بتركيز........... طبعا صدمت من اول ماقعدت من التابلوه البلاستيك لدرجه انى حسيت بانى قاعد فى محل بتاع فوانيس رمضان صينى
الخامات مش زى ماكنت متوقع كنت متخيل انها هتبقى جامده وخصوصا انها تقفيل كورى.
هو فعلا التقفيل كويس جدا بس الخامات وحشه . بجد استغربت وخصوصا سعرها مش رخيص.
انا عارف ان الواحد مش هياخد كل حاجه جامده فى عربيه واحده وده اسلوب تسويقى بحت. بس برضه كان ممكن تتظبط عن كده شويه انا عارف ان الموتور بتاعها قوى والعفشه بتاعتها ناشفه شويه بس رياضيه يعنى تستحمل المطبات اللى عندنا . طبعا السى دى اللى جاى معاها وحش جدا غير اللى موجود فى البرشور بتاع العربيه تقريبا عشان دى الحاجه اللى بتتقفل هنا . المهم انا استخرت ربنا وحجزتها عشان ممكن الحاجات اللى بقول عليها ممكن تتظبط بس اللى دايقنى انى هدفع مبلغ فى حاجه مش جامده اوى .

يانهار ابيض ....... انا طولت اوى معلش بس حبيت اشارككم فى نقاط معينه بخصوص الاكسنت
ومعلش للاطاله

[amr.elsayed]

يا استاذ وليد مافيش حاجة كاملة الكمال لله وحده استمتع يا باشا بعربيتك الجميلة
والف مليون مبروك وربنا يعطيك خيرها ويكفيك شرها

[monmonmon]

ألف مبرووووك يا باشا و ان شاء الله تعجبك

هى فعلا الخامات بتاعتها زى ال i10 تماما فى البلاستيكات و بعض الاجزاء

انا لما نزلت اشوف ال i10 لاول مره فى النور قلت ايه دا!!! انا قريت فى تقارير اوروبيه انها ممتازه و كلام فى السما The interior could pass for something much more expensive :10D5C8~1107: و كلام عن ال Quality و...و........

بس بجد الاكسنت عربية جميله و على فكره الماتريكس كمان خاماتها وحشه يمكن اكتر من النيو اكسنت.. بس عربية كفاءة و ماشيه معايا اكتر من 72000 كم الحمد لله

العربية اعتمادية و مميزاتها كتيير حاول متضايقش منها فى الاول كده انت لسه مركبتهاش

[khaledmontero]

لازم تعرف ان كل عربية لها مميزات و عيوب . أهم حاجة ان العيوب تبعد عن أساسيات العربية ذي الموتور والعفشة و ما إلي ذلك .. و كمان في حاجة مهمة هي ان العربيات في مصر أغلي من اي حتة في الدنيا .. ألف مبروك و ربنا يكرمك فيها .. و استمتع بالعربية ..

[m_s_h_a]

امال لو شوفت الخامات الداخليه فى السيراتو هتقول ايه والالنترا احسن شويه

[sss2000]

هي دي مصر بركاتك يا غبور

[walidjawad]

طبعا مش عارف اقولكوا ايه
..... بجد بجد ريحتوا قلبى وخلتونى احبها اكتر.... على فكره انا حابب شكلها اوى ولما قريت عن الموتور وقدرته فى المنتدى انجذبت ليها اكتر .. يمكن اللى خلى شكلها يصدمنى هوا يمكن لون التابلوه والفرش- لونه بيج فاتح- مع ان اللون عامل شغل مع لون العربيه النبيتى بس ده من بره بس لما تيجى تعقد فيها تحس باحساس تانى

بس برضه انا حاببها وربنا يكرمنى واستلمها قريب ان شاء الله

واول ماستلمها حعمل ان شاء الله ريفيو عنها وشكرا .........

[حماده المصري]

هوه اساسا مفيش عربيات في السعر ده هتلاقي خامتها ممتازه

كله في نفس الخامات دي يا اعلى بشويه بسيطه يا اقل بشويه

وعامه خامات النيو اكسنت جيده متقلقش منها

وربنا يباركلك في العربيه

[adel1414]

ربنا يباركلك فيها

[dark_smoky]

أستاذ وليد .. انت كاتب انك حجزتها من عند ابوغالي ، ممكن اعرف هل هو ابوغالي اوتوموتيف اللي عامل اتفاق مع العربي الافريقي ؟؟ لو هو ممكن تقوللي ايه اجراءاته بالظبط و امتي ميعاد التسليم لأنني عايز احجز برضه عنده .. و شكرا مقدما

[walidjawad]

أستاذ وليد .. انت كاتب انك حجزتها من عند ابوغالي ، ممكن اعرف هل هو ابوغالي اوتوموتيف اللي عامل اتفاق مع العربي الافريقي ؟؟ لو هو ممكن تقوللي ايه اجراءاته بالظبط و امتي ميعاد التسليم لأنني عايز احجز برضه عنده .. و شكرا مقدما

بص ياجميل ... انا رحت ابو غالى ودفعت الف جنيه مقدمه حجز واخدت من عنده ورقه عرض سعر بيع- فيها نوع وتمن العربيه- وموجهه للبنك العربى الافريقى . وبعد كده رحت بالورقه دى للبنك العربى ومعايا صوره البطاقه وايصال كهربا او غاز والسجل التجارى والبطاقه الضريبيه -عشان العربيه باسم اخويا مش باسمى .
المهم رحت البنك وقالنا مندوب البنك تعالو بكره عشان نمضى الشيكات ونمضى العقد والحركات دى
فعلا تانى يوم اتصل بينا مندوب البنك وقلنا تعالو عشان نمضى الشيكات والعقد والتأمين وكله
وبعد كده حط كل الورق فى فولدر وقالنا انه هيروح المركز الرئيسى بتاع البنك ويرد بالموافقه او بالرفض بعد اسبوع
وربنا يسهل بقى .... ياريت اكون افدك بحاجه

[dark_smoky]

بص ياجميل ... انا رحت ابو غالى ودفعت الف جنيه مقدمه حجز واخدت من عنده ورقه عرض سعر بيع- فيها نوع وتمن العربيه- وموجهه للبنك العربى الافريقى . وبعد كده رحت بالورقه دى للبنك العربى ومعايا صوره البطاقه وايصال كهربا او غاز والسجل التجارى والبطاقه الضريبيه -عشان العربيه باسم اخويا مش باسمى .
المهم رحت البنك وقالنا مندوب البنك تعالو بكره عشان نمضى الشيكات ونمضى العقد والحركات دى
فعلا تانى يوم اتصل بينا مندوب البنك وقلنا تعالو عشان نمضى الشيكات والعقد والتأمين وكله
وبعد كده حط كل الورق فى فولدر وقالنا انه هيروح المركز الرئيسى بتاع البنك ويرد بالموافقه او بالرفض بعد اسبوع
وربنا يسهل بقى .... ياريت اكون افدك بحاجه

الف شكر ليك و مبروووك مرة تانية مقدما

[ahmedmohelsayed]

الف مبروووووك يا باشا
وشكرا على الافادة في موضوع الحجز في ابو غالي

[د.محمود صلاح]

التابلوه بلاستيك سواء فى الموديل فى مصر او اللى هنا فى عمان , اللى فى عمان يزيد عليها الابرباج والكاسيت هيونداي الأصلي العريض

[medo2o1o]

سؤال بس هو ليه الناس بتضايق من الطابلوه البلاستيك معلش هو مش شكله حلو؟
و لو هو حلو فى حل لذيذ ينفع تعمله و تتغادى عن البلاستيكات
اولا ممكن تركب كفر جلد للتارة و تحط اى حاجة للطابلوه هيبقى شكله شيك و هايبان متكلف
ممكن تفصل جلد على التارة و الفتيس و دول مش بيبقوا غاليين
فالعملية ايزى خالص يعنى مش هاصرف نظر عن عربية عاجبانى عشان خامات الطابلوه وحشة
مشاكل فى القفيل دى حاجة تانية لو مفيش بيقى اتكل على الله وهات اللى يعجبك كل العربيات حلوة معادا الاسبيرانزا اللى شبه البيضة دى شكله مش عاجبنى

تقبل مرورى



(هذا راى شخصى و لا ينم عن اراء 80 مليون شخص ارجوك لا تهاجمنى فاختلاف الراى لا يفسد للود قضية)