كفاكم الله شر أخطاء الغير

[essam_shaaban]

السلام عليكم ورحمة الله و بركاته

انبارح علي كورنيش المعادي امام المحكمة الدستورية العليا، ربنا أراد اني اعمل حادثة بسيطة هقولكم تفاصيلها عشان تضحكوا
طالعين من اشارة المحكمة الدستورية و السرعة بطيئة والدنيا زحمة، انا ماسك الشمال وجنبي الرصيف وقدامي مسافة مترين تقريبا متكفيش عربية (لاني بحب اسيب مسافة بيني و بين اللي قدامي) وفجاءة جت عربية رينو ميجان تبع سفارة الصين وسايقها سواق صيني وقام كاسر عليا عشان يخش ف المترين اللي قدامي بدون سابق اشارة
طبعا فرملت بسرعة بس للأسف دخلت فيه من جنبي اليمين
الخسائر:
1- الاكصدام الامامي
2-الفانوس اليمين بالاشارة
3-سربنتينة التكييف اتخرمت و الفريون هرب
4-شنب الاكصدام
5-صدر العربية اتلوح (اللي بيتعلق عليه الكبوت)
6- كبوت العربية
7- قربة المساحات اتكسرت

نزل السواق واتخانقت وزعقت مخدتش منه لا حق ولا باطل، وصلوا بتوع الدورية الراكبة، تعمل محضر يا بيه احنا شفنا الحادثة وحقك تعمل محضر بس خللي بالك المحضر يدينك لان الخبطة من قدام يعني انت اللي غلطان فقلت له لما انت شفت الحادثة يبقا ازاي تقولوا كده
وكالعادة مع المرور موصلتش لحق ولا باطل فاستعوضت ربنا ومشيت

نزلت بعد الضهر عند احمد الخواجة و ده بتاع قطع غيار مشهور في البحر الاعظم واسعاره كويسة
طبعا جبت الحاجات الاتي ذكرها:
1- كبوت تايواني 220 جنيه
2-اكصدام تايواني 95 جنيه
3-جوز فوانيس بالاشارات تايواني 180 جنيه
4- قربة مساحات بالموتور 60 جنيه
5- شنب العربية (تعليق الريادتير) 85 جنيه

واتفقت مع السمكري بدل ما يسمكر الكبوت وميظبطش السوك جبته جديد احسن و اتفقنا انه هياخد 200 جنيه تركيبات و سمكرة
واتفقت مع مركز البوية هياخد 200 جنيه و هيرش الاكصدام و الكبوت و الرفرين و هيلمع العربية كلها بولش و كنباون
يعني القصة كلها حوالي 1100 جنيه بالشاي بتاع العمال

كفاكم الله شر الحوادث وشر اخطاء الغير
ودعواتكم استلمها بكره و تكون النتائج كويسة باذن الله

[Beam28]

قدر الله وماشاء فعل وربنا يعوض عليك وان شاء الله تتصلح وترجع زي الاول كفانا الله واياكم شر الحوادث

[zanativich]

ربنا يعوضك خير
كويس انهم ما قالولكش انك ارهابى

[dolly13]

والله هى حاجة تزعل فعلا انك تبقى مش غلطان وليك حق ومش عارف تاخده من مين
ربنا يعوض عليك والحال ده سارى علينا كلنا

[m_s_h_a]

قدر الله وماشاء فعل
ربنا الستار
الواحد حاسس ان اعصابه ودمه بيتحرق كل يوم 100 مره من السواقه الواحد مش عارف يلاحق على البلاعات والحفر ولا المطبات ولا سواقين الميكروباص ولا التاكسى ولا ايه ولا ايه
مبقتش متعة القياده دى بقى عذاب القياده

[ibrahimsaad]

ربنا يعوض عليك وفعلا الواحد ابتدى يخاف من اخطاء الغير اكثر من اخطائه

لانى برده لسه مخبوط فى الجنب الورانى من واحده ست كانت ماشيه فى الاتجاه المعاكس وبرده ماخدتش منها حق ولاباطل

حسبنا الله ونعم الوكيل

[essam_shaaban]

شكرا لكل من قام بمواساتي

اشكر كل الاعضاء اللذين قاموا بمواساتي في الاكسنت ولا اراكم الله مكروها في عزيز لديكم

اشكركم جميعا

[modo88]

قدر الله ومشاء فعل ياباشا بس كان ممكن تقدر تلم الموضوع عن كدا انت جيبت حاجات كتير اوي وكلفت نفسك مع ان من الصورة حاجات كان ممكن تتعمل بسهوله بس يلا الحمد لله علي كل حال

[MoHaMed HaMeD]

قدر الله وماشاء فعل وربنا يعوض عليك وان شاء الله تتصلح وترجع زي الاول كفانا الله واياكم شر الحوادث

[semsem8080]

حمدالله علي سلامتك ياباشا وربنا يستر

[alzaaaem]

قدر الله وماشاء فعل
وحمدالله علي سلامتك

[mohamedhamam]

قدر الله و ما شاء الله فعل و الحمد لله أنك سليم و اللى يجى فى الريش بقشيش زى ما بيقولوا