لأصحاب هيونداي i10

[mero2008]

يا جماعة انا ان شاء الله ناوي اجيب الـ i10 بس عايز اصحاب الخبره واللي جايبين ومجربين العربية دي يقولوا بصراحة ايه رأيهم فيها ولو في مشاكل يقولوا عليها علشان بقارن بينها وبين حاجات تانية وكمان عايز مقارنه بينها وبين البيكانتو .... وشكرا...

[drmagouda]

على فكرة انا كمان مستني ردود على الموضوع لأني في نفس الحيرة بس انا من فترة باشوف المقارنات لقيت البكانتو افضل من ناحية الوسع الداخلي والعفشة والتوكيل لكن الi10 طبعا الناس بتفضلها علشان هيونداي والأنتشار على الرغم اني سمعت كلام عن التوكيل مش موفر قطع غيارها يا ترى الكلام دة حقيقي

[mero2008]

أدينا مستنيين اي رد من اصحاب التجارب السابقة واصحاب الخبرة

[مصطفى مغربي]

اتوس

طب ايه رأيكم في الأتوس

انا معايا اتوس 2010 .....ممتازة و بــــ 53 الف

[monmonmon]

يا جماعة انا ان شاء الله ناوي اجيب الـ i10 بس عايز اصحاب الخبره واللي جايبين ومجربين العربية دي يقولوا بصراحة ايه رأيهم فيها ولو في مشاكل يقولوا عليها علشان بقارن بينها وبين حاجات تانية وكمان عايز مقارنه بينها وبين البيكانتو .... وشكرا...

العربية ممتازه.. معايا من يناير 2009 و عامله اكتر من 10,700 و ماشاء الله كالجديدة

مربطش عفشة خالص

فقط غيرت زيت لأول مره عند 6,421 كم فى غبور ابو رواش


مفيش اى مشاكل ميكانيكية فى العربية نهائيا الحمد لله

فقط الكرسى اليمين فيه تزييق بسمعه ساعات اعتقد من مجرى الكرسى و نسيت اقول فى التوكيل عليه

الكاسيت الاصلى نوعه رودستار و كان بيقطع بس نادرا لو الجو حار جدا فى الصيف و بعته لواحد صاحبى و ركبت واحد بايونيير فيه usb , aux و زى الفل الحمد لله

التكييف فى الاول كان ضعيف شويه من حيث درجة البرودة لكن سرعة المروحة عاليه جدا جدا و بتوزع الهواء كويس بس بعد كده مع الوقت حسيت انه اتحسن جامد و نسيت اقول للتوكيل فى الصيانة.. (كلامى على الجو الحار جدا فى عز الصيف و العربية مركونة فى الشمس و مخزنه حرارة)

الكاوتش الاصلى رفيع جدا عرضه 155 مم و فى فردة اتخرمت عندى.. فغيرت كل الكاوتش لعرض 175 مم و دفعت فرق 800 جنيه فى ال 5 فرد و العربية بقت اريح من الاول لكن استهلاك البنزين اعلى شويه و عزم العربية اقل شويه و الفرامل اخف

الشنطة ضيقة شويه و دى ترجع لاحتياجاتك

دى النقاط السلبية و لا تعتبر عيوب

انا كاتب كتيييير جدا عن العربية ممكن تشوف مشاركاتى فى المنتدى.. بالتوفيق

[monmonmon]

على فكرة انا كمان مستني ردود على الموضوع لأني في نفس الحيرة بس انا من فترة باشوف المقارنات لقيت البكانتو افضل من ناحية الوسع الداخلي والعفشة والتوكيل لكن الi10 طبعا الناس بتفضلها علشان هيونداي والأنتشار على الرغم اني سمعت كلام عن التوكيل مش موفر قطع غيارها يا ترى الكلام دة حقيقي

بالعكس ال i10 اوسع من البيكانتو فى الوسع الداخلى.. ممكن تجربها فى اى معرض

عفشة ال i10 اسمع انها افضل من البيكانتو.. مش بتتنطط جامد زى البيكانتو و مش بتميل اوى فى الملفات ده اللى قريته فى تقييمات اوروبا و بيقولوا انها افضل.. + ان فيها مكونات المانى فى العفشة و ده كلام واحد من المنتدى
بس طبعا الفرق اكيد تافه مش كبيير لان العربيتين يعتبروا واحد

[aburawa]

عربة جميلة وممتازة الصراحة

[samahs]

العربية ما شاء الله لاقوة إلا بالله جميلة جدا ومعايا من شهر 7 اللى فات وثابنة على الطريق ومريحة جدا

[tahayt]

طيب يا جماعة اية اخبار قطع الغيار انا سمعت انها غالية و قليلة

[ahmedbakr50]

طب ايه رأيكم في الأتوس

انا معايا اتوس 2010 .....ممتازة و بــــ 53 الف

ممكن تقولنا إيه الإمكانيات إلى نازلا معاها؟؟؟؟ ومعدل استهلاك البنزين وإنتشار قطع الغيار؟

[romeo_6887]

طب ايه رأيكم في الأتوس

انا معايا اتوس 2010 .....ممتازة و بــــ 53 الف

و الله العربيه دي بموت فيها و زي الفل
بس مش عارف ليه مش منتشره ؟

[ahmedaliamer]

ال i10 تكسب :b4_611:

[مصطفى مغربي]

الأتوس

أنا اللي معايا فيها تكييف و باور و كاسيت سي دي

استهلاكها للبنزين ممتاز جدا غير ان العربية معايا اكثر من ممتازة

بخصوص قطع الغيار أنا لسه ماغيرتش فيها حاجة لحد دلوقتي ( الحمد الله ) مع العلم ان اسعارها نفس اسعار الهيونداي العادية بدون اختلافات كبيرة على حد معلوماتي المتواضعة