طرمبة بنزين الفيرنا

[mhassan9]

السلام عليكم يا شباب.
دي أول مشاركة ليه في المنتدي وللأسف بستفسر فيها عن مشكلة.
المهم أنا معايا فيرنا 2009 1600 العربية الحمد لله زي الفل وعاملة لغاية دلوقت 34400 كيلو تقريبا مقبلتنيش مشاكل غير تخبيط الأبواب تزييق فبر الباب ودا غالباً بسبب تركيب الأنذار!!
الأنذار بقه هو اللي عاملي مشكلة حالياً.
العربية من بعد يوم المصر المشهود الأخير دا بدا فيها زنه تسمعها قوي وأنت داخل العربية وقافل الأزاز.
واحج صاحبي قالي دي من طرمبة البنزين.
المهم رحت مركز صيانة بتعامل معاه بدل قرف التوكيل أسمه كارفان في الحي العاشر كنت بعمل صيانة الـ 30000 وبالمره قلت يشوفوا الزنه دي (هما غيروا كاوتش شكمان صغير كانوا فكرينه هو السبب تقريباً)
بعد ما خلصوا سألتوا الزنه راحت قالي كلوا تمام..ركبت العربية ودورت لقيتها زي ما هي.
رجعتلوا وسمعتهالوا قالي آه دي من الطرمبة المهم مدير الورشة راح أتكلم مع الصنيعي وتقريبا (الصنيعي كسل بيفك وبيص عليها وقالوا دا مركب أنذار يعني بره الضمان)
المهم مدير الورشة كلم المهندس اللي في الإستقبال وقالي هو هيفهمك والحقيقة الراجل قام بالواجب وفهمني
قاللي أنت مركب أنذار بره.
قلت آه.
قالي أصل كدا الكهربا بقت بره الضمان.
قلتله هي طرمبه البنزين من ضمن الكهربا.
قالي آه بس قالي أنت عامل كل الصيانات في التوكيل.
قلتله مش كلها فووت حاجات (أنا فووت ال 10 وال 25 بس)
قاللي عامة هاتلي الفواتير وأنا هكلم الشركه وهشووف لو قالوا غير هغير.
بسأل من باب أن السؤال محرمش بقوله هي الطرمبة بكام.
قالي بـــــــــــــــــــــ (550)
طبعاً دا غير الضريبه و المصنعيه طبعا.
المهم يا جماعة أنا قدامي عدة خيرات أرجو المساعدة في أختيار واحد.
1- أطنش وأهي العربية ماشيه من غير مشاكل غير الصوت وأبي أغير لما تبقي فيه مشكله تأثر علي العربية
2- اغيرها بره وأنا قريت علي النت أن سعر الطرمبه 250 جنيه بس مش متأكد من السعر وبصارحة معرفش حد مضمون أغير عنده و لو أن دا سعر الأصلي (مش عايز أركب حاجه تاني) ممكن أجيبه وهما يركبوها هما بيرضوا ما دام أصلي.
3- أروح التوكيل وأتخانق معام (مع أن موضوع الأنذار ده هيبقي مشكلة) ويمكن الخناق يجيب نتيجة (ولو أني مليش في الكلام دا الحقيقة).

أنا محتار أعمل أيه وعايز مسعدتكم و آآآآآآآآآآآسف جداً جداً علي الأطالة

[mohamed_mohsen]

إنذار إيه بس اللي يطلع العربيه من الضمان؟
أنا كنت و ديت العربيه التوكيل بالإنذار و السنتر مركبهم بره و لا الهوا
و لا حد اتكلم و الدنيا مشيت عادي
بص أنا رأيي تروح تعلي صوتك و تقولله إن ده عيب صناعه مش عيب إنك ركبت إنذار
و لو القصه دي مانفعتش قوللهم إنك هتطلع علي حماية المستهلك عشان يشوفولك صرفه

[mhassan9]

الفكره أنهم مش هيتكلموا معاك مادام مش بتشتكي من حاجه أما لو أشتكيت وعايز تغير يبتدي التلكيك.
بالمناسبة انت كنت في موضوع تقييم عربيتك قلت أن كان عندك تكه في الطلعه أنا عندي حاجه كدا برضه حتي لو العربية واقفة ودوست دبرياج ورفعت رجلي أسمع تكه هي كانت عندك كدا برضه ولا دي تكه تاني :)

[mohamed_mohsen]

الفكره أنهم مش هيتكلموا معاك مادام مش بتشتكي من حاجه أما لو أشتكيت وعايز تغير يبتدي التلكيك.
بالمناسبة انت كنت في موضوع تقييم عربيتك قلت أن كان عندك تكه في الطلعه أنا عندي حاجه كدا برضه حتي لو العربية واقفة ودوست دبرياج ورفعت رجلي أسمع تكه هي كانت عندك كدا برضه ولا دي تكه تاني :)

أيوه هي دي بالظبط
قولتلهم عليها و غيرولي قاعدة الفتيس و التكه راحت

[AHMEDCAR]

روح ابو رواش و لو مارضيوش على صوتك عليهم

[verna_2007]

(هما غيروا كاوتش شكمان صغير كانوا فكرينه هو السبب تقريباً)

اتغيرت بكام يا باشا

[mhassan9]

اتغيرت بكام يا باشا

بـ 25 جنيه تصدق