اشتريت فيرنا فيفا

[arch_peter]

الحمد لله استلمت فيرنا فيفا من كام يوم وعاوز اشارككوا برأيى المبدئى فيها يمكن يفيد اى حد بيفكر او عنده سؤال :
1 - العربية ظريفة جدا شكلا وموضوعا.
2 - التقفيل المستورد ( الهندى ) مهما كان احلى من ( المصرى ) .
3 - اللون الداخلى تحفة - لون الفيرنا المصرى الداخلى كئيب شوية وغامق دى لونها فاتح من الداخل .
4 - العربية سحبها ممتاز وقيادتها مريحة
5 - العفشة متماسكة جداً وناشفة ودى ميزة
6 - الفتيس المانيوال خفيف جدا جدا يحتاج معاملة خاصة - الدواسات كمان خفيفة جدا لمسة واحدة بتفرمل العربية ولمسة واحدة بنزين تخليها تطير
7 - مافيش سى دى ولكن الكاسيت هيونداى اصلى ودى حاجة جميلة جدا وصوته نظيف
8 - فيها سماعتين فى الابواب وسماعتين ورا
9 - لا تحك نهائياً فى المطبات حتى الان وسمعت انها اعلى من الفيرنا المصرى ولكن لم اتأكد
10- الشنطة واسعه وعائلية
11 - بصراحة استهلاك البنزين لسه ماحسبتهوش بس سمعت من المجربين قبلى ان استهلاكها كويس جدا
12 - الزجاج كهرباء كله - المرايات كهرباء ( Full Options )
13 - الوانها للأسف قليلة جدا ( اسود - ذهبى - فضى - سماوى خفيف ) واحسن الالوان هو الأسود
14 - العداد عادى مش ديجيتال زى الفيرنا المصرى وده يعتبر من العيوب عند بعض الناس
15 - انا حاسس ان الصوت بتاع الموتور عالى شوية - بس ناس تانى قالوا لى لا ان ده العادى - يعنى مش عارف ياريت حد يفيدنى فى النقطة دى

شكرا وانا جاهز لرد اى سؤال او مناقشة اى نقطة على قدر معلوماتى المحدودة حتى الان واول بأول ممكن ارد على استفسارات

[hanyfarrag]

الف مبروك
وربنا يبارك لك فيها

[TAG_Turbo0]

الف مبروك عليك
انا برده بأول انها أفضل من المصرى
بس كنت عايز أسأل حضرتك هى فى منها اتوماتيك ولا لأ
ولو فيها رخامه سعرها كام وايه الكماليات الى فيها

[arch_peter]

الف مبروك عليك
انا برده بأول انها أفضل من المصرى
بس كنت عايز أسأل حضرتك هى فى منها اتوماتيك ولا لأ
ولو فيها رخامه سعرها كام وايه الكماليات الى فيها

متشكر والله يبارك فيك
- مافيش منها اوتوماتيك
- تكييف وباور ب 64000 وكان فى عرض مخفضين 500 بمناسبة الأعياد ماعرفش مازال متواجد والا لأ
- كل الكماليات - تكييف باور كاسيت هيونداى اصلى زجاج كهرباء مرايات كهرباء سنتر لوك 68000 وكان فى عرض تخفيض 1000

ومافيهاش رخامة والا حاجة وانا تحت امرك

[amrgen]

Alffffffffffff mabrok ya basha
kona 3ayzen n3rf hia feha nafs el 7adfa yemen zay el verna el masry we hal sa7bha zay el masry wla ah?

[TAG_Turbo0]

ألف شكر على الاهتام والرد بس سؤال أخير جبتها منين ونظام الدفع ايه؟

[arch_peter]

Alffffffffffff mabrok ya basha
kona 3ayzen n3rf hia feha nafs el 7adfa yemen zay el verna el masry we hal sa7bha zay el masry wla ah?

الله يبارك فيك يا اخى الكريم
هى حتى الان مافيهاش اى حدفات والحمد لله
انا مش عارف سحب المصرى ايه ؟؟ بس دى سحبها هايل جدا جدا - لولاش انى مش باحب السرعة ولأنى فى التليين كنت طرت بيها لأنها بتتسارع بسرعة كبيرة جدا

[mido777]

مبروك يا باشا وربنا يديلك خيرها ويكفيك شرها

بس فعلا هو موضوع العدادات العادية هو اللى ينرفز لأن تقريبا كل العربيات دلوقتى عدادتها دجيتال

[arch_peter]

ألف شكر على الاهتام والرد بس سؤال أخير جبتها منين ونظام الدفع ايه؟

العفو ولا شكر على واجب
جبتها من غبور صلاح سالم لانى مش باحب المعارض خالص
طريقة الدفع اخدت قرض من البنك مع فلوس من عندى كملت تمنها ودفعته وباقسط القرض مع البنك

[arch_peter]

مبروك يا باشا وربنا يديلك خيرها ويكفيك شرها

بس فعلا هو موضوع العدادات العادية هو اللى ينرفز لأن تقريبا كل العربيات دلوقتى عدادتها دجيتال

الله يبارك فيك يا اخى الحبيب
عندك حق فى حكاية العداد بس صدقنى باتناسى الموضوع ده دلوقتى ومش باحاول اركز فيه خصوصا وانها والحمد لله مش حاجة قاتلة يعنى هى مجرد منظر مش اكتر

[TAG_Turbo0]

هو غبور بيقسط من المعارض بتاعته؟
ممكن بعد أذنك نمرته

[arch_peter]

هو غبور بيقسط من المعارض بتاعته؟
ممكن بعد أذنك نمرته

لا غبور مش بيقسط
انا اللى اخدت قرض بأقسطه - غبور ليه عندك انه ياخد فلوسه كاش بس

[TAG_Turbo0]

لا غبور مش بيقسط
انا اللى اخدت قرض بأقسطه - غبور ليه عندك انه ياخد فلوسه كاش بس

ألف ألف شكر على الرد والمعلومات المفيده
وربنا يباركلك فى عربيتك ويكفيك شرها

[mostaf_aly]

شكرا على الموضوع الهايل دا وألف مبروك وربنا يباركلك فيها. وانا فعلا ناوي اشتري فرنا وكنت محتار بين المصري والهندي ودخلت معرض واتفرجت عليها وكان عندي ملحوظتين أرجو منك إفادتي عنهم.
أولا عندي إحساس إن الهندي أصغر من المصري. (هل ذلك حقيقي أم لانسيابية الشكل الجديد؟)
ثانيا عندما شاهدت السيارة في المعرض لاحظت أن الأبواب تقيلة في الغلق ولازم تقفلها بقوة شوية، فهل ذلك يحدث معك.
وشكرا مرة أخرى على المعلومات المفيدة

[arch_peter]

شكرا على الموضوع الهايل دا وألف مبروك وربنا يباركلك فيها. وانا فعلا ناوي اشتري فرنا وكنت محتار بين المصري والهندي ودخلت معرض واتفرجت عليها وكان عندي ملحوظتين أرجو منك إفادتي عنهم.
أولا عندي إحساس إن الهندي أصغر من المصري. (هل ذلك حقيقي أم لانسيابية الشكل الجديد؟)
ثانيا عندما شاهدت السيارة في المعرض لاحظت أن الأبواب تقيلة في الغلق ولازم تقفلها بقوة شوية، فهل ذلك يحدث معك.
وشكرا مرة أخرى على المعلومات المفيدة

الله يبارك فيك وعقبالك
اولا - هى مش اصغر والا حاجة بالعكس ده الصالون قد يكون اوسع شوية من المصرى وده مش رايى انا بس ده رأى ناس كتير من اللى سألتهم واللى جربوا الاتنين
ثانيا - الأبواب مش خفيفة فعلا ولكنها مش تقيلة زى الفيات مثلا او الشاهين باعتبار انى مجرب الشاهين وحافظها وباحبها جدا - هى ميزة برضه انك تحس انها مش عربية ورق لا بالعكس انا حاسس ان الصاج كويس
صدقنى يمكن يكون كمان ده كله ارتياح شخصى ليها مش اكتر فعشان كده مش حاسس خالص بموضوع الأبواب ده
لكن من الحاجات الحلوة اوى شكل العربية من قدام وورا بصراحة اشيك من الفيرنا المصرى وعموما هى مسألة اذواق وربنا يوفقك فى اللى تجيبه ايا كان .
وتحت امرك اى وقت