العمر الافتراضي لمواتير الفيرنا

[mer_man]

حد عندة فكره عن العمر الافتراضي لمحركات الفيرنا 1600 كام كيلو و بعدين تحتاج عمرات بقي و الكلام دا؟
و بالمره باقي اجزاء السيارة يعني مساعدين و عفشة الخ الخ
طبعا الكلام دا في ظل اسواء ظروف الاستخدام زي الي في المحروسة كدا مطبات صيانة غبور اراضي جبلية وعره ظروف سير بالغة التعقيد الخ

[شاهين - بنز]

نوعية الاستخدام بتفرق جامد في عمر السيارة الإفتراضي
يعني إلي دايما بيحرق على العربية جامد وبيسافر وهو مقفل العداد بتقصف عمر السيارة الإفتراضي

[ddooddyy]

العمر الإفتراضى هوه اللى إنت بتحدده بطريقة وظروف سواقتك
فيه عربيات من السبعينات ولسه ماعملتش عمرة وفيه موديل السنة وإتفوّرت
المهم أسلوبك وتعاملك مع عربيتك

[mer_man]

انا باتكلم علي المتوسك العام يعني مثلا بيقولوا الانوس الموتور ممكن يعمل معاك 250 بدون ما يتفح صح ؟ و سمع ان الفيرنا و مواتير هيونداي الي من الجيل دا ممكن تقعد فوق 300الف كلم بدون ما تفتح بشرط صيانة كويسة و زي محرم في مواعيد مضبوطة

[tutankhamoun]

المتوسط العام اللي بيكون مكتوب في الكتالوجات بيكون في أحسن ظروف التشغيل
و زي ما الأخوة الزملاء قبلي وضحوا و قالوا إن الاستخدام هو الذي يحدد عمر المحرك و عمر العفشة و المساعدين و الذي منه
يعني العمر اللي مكتوب في الكتالوج بيعتمد على عدة عوامل منها
السرعة المثالية و هي 90 كم / س و كل لما تزيد هذه السرعة يزيد معها عدد لفات المحرك مما يساعد على زيادة التآكل بين الأجزاء الميكانيكية و أيضا يؤدي إلى مضافعة استهلاك الوقود
و أيضا يعتمد على عدم تحميل السيارة بأربعة أشخاص بل يكون فيها سائقها فقط أو راكب بجانبه على الأكثر
أما تحميل السيارة بأربعة أفراد مثلا بجانب الأمتعة و التكييف يقلل من عمر الموتور لو تم ذلك كثيرا

و القيادة العنيفة تقلل أيضا من عمر المحرك
يعني حرق غيارات ......... تسارع عالي في مدد قصيرة ....... سباقات على الطريق ....... الضغط على المحرك و تزويد عدد لفاته

و أيضا لا تنسى أن تلك القيادة تزود أستهلاك الوقود
و تزود استهلاك الفرامل و الاطارات و كافة أجزاء السيارة الميكانيكية

يبقى لتحظى بمحرك ذات عمر طويل و قليل الأعطال يجب أن تتبع الآتي
لا تتسارع بالسيارة في أوقات قصيرة
لا تزود السرعة عن 100 أو 90 كم / س
تغيير زيت المحرك دائما عندما تحتاج السيارة و لا تبخل به لأنه المسئول عن تقليل الاحتكاكات بين أجزاء المحرك الميكانيكية
الكشف الدائم على دورة التبريد و تنظيفها كل 6 أشهر
عدم تحميل المحرك فوق طاقته
القيادة الهادئة ( لا أقصد بطيئة ) و لكن هادئة يعني تسارع وحدة واحدة ......... إذا وجدت مطب مثلا أمامك بعد 400 متر لا داعي للتسارع فأترك السيارة و هي ستقف لوحدها مما سيقلل من استهلاك الوقود و استهلاك الفرامل و أيضا سيطيل من عمر المحرك
الصيانة الدائمة لأي عطل أولا بأول حتى لا تتفاقم المشكلة

[mer_man]

متشكرين قوي علي النصايح الهامة دية و اوعدك ان لو الناس مشيت كدا زي ما بتقول محدش حيشوف موتور عربيتة شكلة حتي اية من برة مش جوا بس برضة

[mer_man]

طيبب سؤال تاني عن الفيرنا دلوقتي انا باعمل صيانة بما يرضي الله كل 5 الاف كيلو دا غير اني مضبط في التوكيل جامد يعني يتعمل معايا واجب بالرغم من كدا العفشة فيها صوت مش ظريف يعني مثلا لما اعوج الدركسيون ( مش كبلن) و لما امشي في شارع ضيق اسمع صوت حكة خفيفة او متقطعة صوت ضعيف مره كان التيل الخلفي قارص علي الطنبورة و رحت الوكيل ضبطت الكلام و رجعت تاني و لا حاجة تانية؟ مش عارف دا غير اني لما باركنها 2يومين او كدا و خصوصا في الشتا ارجع الاقي الفرامل بتصفر اول كام دوسة و بعدين بتروح انا او مرة اشوف الكلام دا و لا حتي في الفيات

[Ahmed Anwer]

طيبب سؤال تاني عن الفيرنا دلوقتي انا باعمل صيانة بما يرضي الله كل 5 الاف كيلو دا غير اني مضبط في التوكيل جامد يعني يتعمل معايا واجب بالرغم من كدا العفشة فيها صوت مش ظريف يعني مثلا لما اعوج الدركسيون ( مش كبلن) و لما امشي في شارع ضيق اسمع صوت حكة خفيفة او متقطعة صوت ضعيف مره كان التيل الخلفي قارص علي الطنبورة و رحت الوكيل ضبطت الكلام و رجعت تاني و لا حاجة تانية؟ مش عارف دا غير اني لما باركنها 2يومين او كدا و خصوصا في الشتا ارجع الاقي الفرامل بتصفر اول كام دوسة و بعدين بتروح انا او مرة اشوف الكلام دا و لا حتي في الفيات

نوعية الكاوتش اللي راكبه عندك ايه ؟؟

جرب تملي نتيروجين و تبدل أماكن فرد الكاوتش ،،

و ده شئ مطلوب كل 10 الاف كيلو

لو حسيت بفرق يبقي العيب في الكاوتش ،،

الكاوتش الناشف زي النسر و اللاسا التركي بيعمل اصوات مش ظريفة من الطريق ،،

و جرب طريق محبب شوية و طريق املس ناعم ،،

حكاية الفرامل دي ما حسيتش بيها ،،

ايه العلاقة ما بين كون الشارع ضيق أو واسع علي العربية ؟؟؟

أخيرا ،،

بلاش تبالغ في الإنصات لكل الأصوات في العربية لإن كده مش هتخلص ،،

علي فكرة كل انواع العربيات بيبقي فيها اصوات غريبة كده بتظهر علي فترات متقطعه ،،

المصيبة أول ما تروح التوكيل أو لميكانيكي ،، تقعد تجرب و مفيش حاجة تطلع ،،

[mer_man]

ربنا يخليك يا سيد و متشكر علي الرد هيا فعلا كاوتش نسر بس مستحرم اغيره لانة لسة لانج بس انا تجنبا لكدا مرصص العجل عند اجمد ناس بترصص في اسكندرية و مضبط زورايا و مضبط العفشة تمام بس هوا فعلا ناشف حجرو بعدين الاصوات الي باسمعها احتكاكات
ثانيا الشوارع الضيقة لانك بتسمع صوت العربية كويس لما الصوت يتعكس علي الجدران او العربيات الي جانبك و انت ماشي و خصوصا لو كان شارع هادي
المهم هل الكاوتش النسر يبوظ حاجة في العربية علي ما اغيره ؟ مع انة مضبوط علي الشعرة
اخيرا اية موضوع النيتروجين دا بقي و اية مميزاته و بكام ؟ و افرض العجلة نامت مني و انا ماشي مش اي حد حيعرف يتعامل فية

[mer_man]

بالمناسبة انا سالت علي تغيير العجل فعلا في التوكيل قالولي كبر دماغك و عموما النسر الي عندي حجرررر فعلا مثالي للطرق المصرية بس عفشة و عربية ستحملة
اما موضوع الفرامل تقريبا في وساخة او طينة او مية مش نضيفة مكان الشتا بتدخل بين الكنبورة و التيل فلما اجي امسك فراكل يطلع الصوت المقرف دا الي بيروح بعد شوية و تقريبا دا الي بيحصل و لا انت اية رايك ؟ و لو فعلا دا الي بيحصل اشمعني الفيرنا عن اي عربية تانية بيدخل فيها مية شتا بين الطنبورة و التيلة و لا هيا سايبة في الفيرنا و العربيات التانية لا و شكرا

[mer_man]

و بجملة الرغي معلش استحملني لو عندك معلومات عن المساعدين بتوع الفيرنا و البيضات و الحاجات دية بتبوظ تقريبا بعد اد اية و بكام ؟

[Ahmed Anwer]

علي فكرة أنا لا خبير و لا حاجة ،،

أنا مجرد مستخدم للعربية ،،

يعني كلامي مش ثقة ،،،، بس اديني بدردش معاك

النتيروجين ،،

بيفضي الهوا من العجل و يملاه نتيروجين ،، ميزتها إنه لا يتمدد و لا ينكمش مش محتاج ضبط بعد كده ،، بينعم العربية نسبيا و يقلل احساسك بالطريق و عين القطط و الحاجات دي ،، و لو العجلة نامت بتزودها ( المفروض متنامش بالنتيروجين تتخرم بس ) طبعا تزودها هوا عادي لحد ماتروح لحد بتاع نتيروجين و تملاه تاني

تكلفته عشرين جنية للأربع فرد ،،

معرفهش تأثير الكاوتش النسر علي العربية كمكونات ايه ،، بس اعتقد مش تأثير فظيع ،، مادام استخدامك معقول

بس طبعا تأثيره علي أداء العربية أكيد انتا حاسه دلوقتي ،،

الكاوتش مش حاجة سهلة ده اول علاقة ما بين العربية و الشارع ،، و تأثيره فظيع علي العربية ،،

بش أنا زيك استخسرت أغيره ،، خاصة أنا عندي لاسا تركي مش نسر كمان ،، قالولي ماهو الكاوتش الجديد بعد عشرين الف هينشف هوا كمان

أنا زي ما قلتلك عمري مظهر عندي أصوات مع الفرامل بس يعني دي بقت ظاهرة في كل العربيات اليومين دول و ممكن تتابع مواضيع كتير في المنتدي عنه لعربيات تانية فكويس أوي إنه مش مستمر عندك ،، و ده ميمنعش انك تتابعه مع التوكيل ،، في كل صيانة ،،

بخصوص العفشة و المقصات و الحاجات دي معنديش خلفية لأني زيك يدوب 11 الف كم ،، اللي سمعته من الناس قبل ماشتريها و دي كانت اهم حاجة عندي لأني ساكن في حتة مدغدغة ( عايزه عربية نص نقل مش حتي دفع رباعي ) إن عفشتها كويسة و معمرة و مفهاش مشاكل عامة ،،

عموما أنا بس مش عايزك تبقي شايل الهم اوي كده لسه قدامك 40 الف كم ضمان و انتا مضبط التوكيل حسب كلامك و لو حسيت انك مش عارف تحافظ عليها علي 80 أو 100الف و بيعها ،،

و لا تخش في عفشة و لا موتور و لا الكلام ده ،،،

[ahmed]

وفين الاقيه النيتروجين ده

[Ahmed Anwer]

عند درش ،، زميلنا بالمنتدي ،،

و عند مراكز بريدجستون ،، دول اللي اعرفهم ،،،

و اعتقد في ناس بتوع كاوتش كتير برده جابوهم ،،

[tutankhamoun]

الكاوتش النسر اللي بيركب في الفيرنا يا جماعة كويس و عن تجربة
لأن النسر أنواع كثيرة و يقوموا بتركيب أفضل نوع من النسر في السيارات الحديثة و هو كاوتش مختلف عن الذي يتم تركيبه في الشاهين
و الكاوتش ممتاز فعلا ............ و يجب الحرص في المطبات مع أي ماركة كاوتش
و ربنا يباك لأصحاب الفيرنا في عربياتهم و يبارك لأعضاء المنتدى كله

و هذه صورة للكاوتش مصحوبة بمعلومات عنه