لما أستلم النيو أكسنت اشيك فيها علي ايه؟؟

[mo3taznader]

السلام عليكم و رحمة الله و بركاته,
اخواني الاعزاء في الله أرجو منكم المساعدة في السيارة النيو اكسنت 2010 اعمل ايه و اشيك علي ايه لما استلمها؟ مع العلم اني انشاء الله حاجيبها من غبور علطول مش من معرض؟ و ياريت لو حد استلمها قريب يقولي ايه الاخبار لاني قاريت عنها شوية اخبار و ربنا يستر.هي بالمناسبة اتوماتيك.
اسف للتطويل عليكم بس يا ريت حد يفيدني و جزاه الله خيرا

[ZIZO_ST]

وعليكم السلام ورحمة الله وبركاته
بص على جسم العربيه كويس وشيل اللزق الى عليها كله عشان لو فيه حته مخبوطه او مخدوشه وتخليهم يغسلوها قبل ما تطلع بيها
شيك على ان الكاسيت شغال واوعى تنسى وصلة ال USB بتاعته
لأنى كنت محفظ نفسى من كتر ما قريت مواضيع قبل ما استلم العربيه وبرضو ساعة ما استملت نسيتها
شيك ان المساحات شغله
الكريك والمفتاح بتاع فك العجل والطفاية

والف مبروك ليك مقدما يا جميل

[EngAhmedSayed]

بسم الله الرحمن الرحيم
اولا انا من راى مدام الموضوع كده و التوكيل بقى كده
1- تاخد ميكانيكى معاك فاهم (للتجربه هام و ضرورى)
2-تاخد سمكرى معاك
3-تاخد بهويجى معاك
4-استلمه بالنهار و اوعى تستلمه باليل علشان لو فيها حاجه مستخبيه تيبقى شايفه
5-تستلم شهادة الضمان قبل ما تطلع بالعربيه مش يقولك رخص و تعالى خدها زى ما عملو مع ابو مارو
6-اتاكد من الاستبن شنطة العده و جرب كل حاجه فيها من (كاسيت -تكييف-اضاءه-.......)
7-سياتك انا من راى مترخصش على طول اصبر عليها اسبوعين و بعدين رخصها علشان لو فيها حاجه ترجعها و لو عاوز تخرج ابقى اجر نمر تجاريه و امشى بيها
ده قلى اقدر اقولهولك و ربنا يسترها معاك و ربنا يكرمك بيها و تفرح بيها
و ربنا يكفيك شرها

[mo3taznader]

متشكر ليك يا زيزو و متشكر ليك يا مهندس احمد و ربنا يسترها و ما يكونشي فيها قصص ماساوية زي اللي قاريتها عن الناس اللي قرفهم التوكيل متشكر لدعواتكم و انشاء الله لما استلمها ابقي اقولكم.
بس قولي يا مهندس احمد هو موضوع تاجير النمر التجارية ده ممكن يكون منين و بكام؟ علشان لما سالت عند المعرض بتاع غبور قالي احنا بنديلك خطاب يمشيك 3 ايام من غير نمر و بعد كدا حتي لو مركب نمر تجارية ممكن تتسحب منك. و معلش داوشكم معايا