سؤال في الالنترا؟؟!!

[A7medHeaders]

السلام عليكم ورحمة الله وبركاته

أمس شاهدت هيونداي النترا 2011 خليجي في أحد المعارض بالزقازيق..بصراحة منظرها خرافة ومن جوه واسعه وفيها نافيجيشن و cd وفتحة سقف وحاجاات كتييييره مش فاكرها وانا بأكتب دلوقتي وسألت عن سعرها قال 112 ألف جنيه.
دلوقتي بأسأل..هل صحيح ان سعر الهيونداي النترا بينزل في الأرض لما بتتباع؟؟
وهل هي سيارة يعتمد عليها عائليا؟؟
وما رأيكم اذا قارناها باللانسر 1600 موديل 2008 (لأني محتار بينهم)؟؟؟
وشكرا جزيلا..

[mahmoud_afifi]

نصيحه مني , انا جربت اللانسر 1600 بس مانيوال وجربت الالنترا 2010 اوتوماتيك. انا كنت فاكر اني هحس بفرق المستوى بين الياباني والكوري بس بصراحه كنت مبسوط قوي من كفائة الالنترا وما شاء الله عليها جميله في السحب.
انا شايف ان يعيبها الايرباج والabs انما لو الي انت شايفها فيها دول يبقى توكل على الله.
عيب اخر في الالنترا هي المساعدين ضعيفه شوية وبتهبط بسهوله. االانسر نفس الموضوع بس اقوى نسبيا من الالنترا.
انا لو مكانك هجيب النترا خليجي وعلى الاقل هستريح من غبور وسنينه. ايضا من ضمن العيوب الي الناس بتقول عليها ان الصاج ضعيف مع اني عملت حادثه جامده بيها والاضرار كان بسيطه الحمدلله يعني مش ضعيف قوي بس اضعف من اللانسر اكيد.
من مميزات الالنترا انها اوسع بمراحل من اللانسر بشهادة واحد معاه لانسر. وكمان الكراسي مريحه والعفشه مش ناشفه زي اللانسر.
بالنسبه ان سعر ينزل احب اقولك ان كل العربيات سعرها بينزل وبسرعه مهما كانت ياباني او كوري.
وربنا يوفقك ان شاء الله.

ملحوظه: العربيه بقالها معايا سنه واكيد مش مقياس لازم حد جربها فتره اكتر عشان يقولك على الحاجات الفنيه الأهم انما ده رأي واحد مش متخصص

[kamatsho]

مبدئى حط فى دماغك ان اللانسر يابانى واللألنترا كورى

هحاول اعملك مقارنه صغيره من وجهه نظرى يمكن اقدر افيدك

قطع الغيار .. قطع غيار اللألنترا ارخص من قطع غيار اللأنسر والاتنين قطع غيارهم متواجده فى الاسواق
استهلاك البنزين .. استهلاك اللألنترا للبنزين أقل من استهلاك اللانسر
التوكيل .. توكيل المتسوبيشى اكثر احتراما من توكيل اللألنترا
قوه الماتور .... قوه ماتور السيارتين 1600 سى سى ولكن اللألنترا 121 حصان واللانسر 105 حصان
الصالون . صالون اللألنترا اوسع وافخم من صالون اللانسر
الشكل الخارجى .. اللألنترا تتفوق فى شكلها وجمالها الخارجى
العمر ... عمر اللانسر اكبر من عمر اللألنترا عشان اللانسر يابانى واللالنترا كورى ولكن ده فى وجهه نظرى مش مقياس اهم حاجه استعمالك للسياره والمحافظه عليها وصيانتها
جسم السياره .. جسم او صاج اللانسر اقوى من صاج اللألنترا
الامكانيات .. الاتنين امكانيات واحده مش هيفرقو كتير عن بعض لو فى فرق

ملحوظه ::: التفييم ده من وجهه نظرى للسيارتين فى مصر وليس للسيارتين بالخارج ويارب اكون قدرت افيدك
بالتوفيق ان شاء الله