الحقونى - الالنترا الجديدة

[analyzer]

السلام عليكم ورحمة الله وبركاتة
بفضل من الله عز وجل اشترينا الالنترا الجديده فى المكتب من حوالى شهر

وبعد مرخصنا وبدءنا نستخدمها علشان تلين وتدخل الخدمة فى المكتب فوجئنا بالتالى

لما الموبايل بيرن نور العربية بيطفى ويشتغل لحد ما ارود على الموبايل

عملنا الالف كيلو وقلنا نروح نعمل الصيانة بتاعت الالف الاولى ونقولهم على المشكلى دى

المفاجئه : المهندسين قالولى ده عادى وده الطبيعى فى بعض العربيات والبعض الاخر لا وانت حظك جه كدا

قلتله يعنى لو ماشى فى الطريق ليلاا ومفيش نور على الطريق الاقى عربيتى تطفى وتقيد لوحدها ده انا ممكن كدا اروح فى مصيبه

المهم بعد ما خلصت صيانة الاف ومشيت والمشكلة قائمة واحد من الى كان موجودين خارج التوكيل سئلى فى ايه لانى وانا بستلم فرجت عليهم كل الى فى التوكيل .
قلتله على المشكلة قلى خلى بالك لان ده كمان ممكن الايرباج يفتح
يفتح دى مصيبه تانيه
وللى الان مش عارف اعمل ايه

ارسل ميل لهيوندى كوريا ولا اعمل ايه

اسف على الاطاله

...................................
تم دمج الموضوعين فى موضوع واحد
الإدارة -3

[PRO-DRIVE]

و اذا فيها Abs كمان مش حيشتغل :)

[cpt_shawky]

حضرتك راجع دليل استخدام الالنترا اللى استلمته من اول لأخر صفحة كلمة كلمة واقرا كل الملحوظات لو لقيت حاجة عن الموضوع ده يبقا التزم باللى مكتوب لو ملقتش يبقا تقلب الدنيا عليهم وترجع العربية.

[tohamy007]

المفاجئه : المهندسين قالولى ده عادى وده الطبيعى فى بعض العربيات والبعض الاخر لا وانت حظك جه كدا
بصراحة ياجماعة دي مهزلة بكل معناها .... يعني اية عادي ودة الطبيعي في بعض العربيات ؟؟؟؟؟؟؟ الواحد ركب عربيات من كل نوع ومن كل بلد عمري ما سمعت عن حاجة زي دي !!!! وبجد رد المهندس كان بيوضح (( انك أكيد فمصر )) لان لو الرد دة حصل من اي مهندس صيانة فاي شركة محترمة او توكيل محترم على مستوي العالم كان اقل حاجة (( اترفد وانهو خدماتة فوراا )) شوف انت لازم تروح وتقلب الدنيا عليهم لان دة عيب صناعة ولو كلمت اصغر عامل فشركة هيونداي كوريا كان قالك انو عيب صناعة وان الكمبيوتر بتاع السيارة مش مظبوط ..... بجد عاشت مصر حرة مستقلة ... وعمار يا مصر

[Hesham A.Megid]

السلام عليكم ورحمة الله وبركاتة
بفضل من الله عز وجل اشترينا الالنترا الجديده فى المكتب من حوالى شهر

وبعد مرخصنا وبدءنا نستخدمها علشان تلين وتدخل الخدمة فى المكتب فوجئنا بالتالى

لما الموبايل بيرن نور العربية بيطفى ويشتغل لحد ما ارود على الموبايل

عملنا الالف كيلو وقلنا نروح نعمل الصيانة بتاعت الالف الاولى ونقولهم على المشكلى دى

المفاجئه : المهندسين قالولى ده عادى وده الطبيعى فى بعض العربيات والبعض الاخر لا وانت حظك جه كدا

قلتله يعنى لو ماشى فى الطريق ليلاا ومفيش نور على الطريق الاقى عربيتى تطفى وتقيد لوحدها ده انا ممكن كدا اروح فى مصيبه

المهم بعد ما خلصت صيانة الاف ومشيت والمشكلة قائمة واحد من الى كان موجودين خارج التوكيل سئلى فى ايه لانى وانا بستلم فرجت عليهم كل الى فى التوكيل .
قلتله على المشكلة قلى خلى بالك لان ده كمان ممكن الايرباج يفتح
يفتح دى مصيبه تانيه
وللى الان مش عارف اعمل ايه

ارسل ميل لهيوندى كوريا ولا اعمل ايه

اسف على الاطاله

هو الالنترا بتاعة حضرتك فيها الانزار الاصلي ولا اللي بيركب في مصر؟ لأن واحد اعرفه كان عنده مشكله مشابهه و طلعت بسبب الانزار في الاخر لأنه بيبقي راكب علي النور الصغير.

[SEATLOVER]

يا analyzer ..بصرف النظر عن الكلام اللى اتقالك و المعاملة ..

دى فعلاً حقيقة ..كل مازادت التكنولجى فى العربية بيبقى استخدام الموبايل فيها ممنوع أو (وضع الموبايل داخل تابلوة السيارة ) انا عندى التحذير دة مكتوب فى كتالوج السيارة ..اى نعم ما بيحصلش حاجة لما احط الموبايل جوة التابلوة او حتى لما يعد يرن ساعة جوة العربية ..بس هما ادرى و اكيد عندهم حق واحنا اللى بنتصرف غلط

حاول بس قبل اى حاجة تقرا الكتالوج كويس ذى ما قال شوقى بالظبط
وخلى بالك فى نوع موبيلات اعلى ترددات من انواع اخرى يعنى ممكن تغير الموبايل بماركة تانية اقل تردد

عشان تعرف دة حط الموبايل جنب شاشة كمبيوتر و رن علية هتلاقى تأثر الشاشة بيختلف من نوكيا مثلاً لسونى اريكسون .

[analyzer]

شكر على الردود
ا/ setlover

طيب ليه فى عربيات وعربيات لا مع ان هما الاثنين النترا ونفس الموديل

[analyzer]

ا/ tohamy
دى فعلا مهزله

لما يخرج عربيتين فى نفس الوقت واحده بتطفى والتانية لا وانت وحظك اصل نصيبك كدا ( اصل انا رايح اشترى بطيخه - يتطلع حمر ومرملة كمان يا اما قرعة وماسخه )

ان شاء الله وباذن الله هيشوفو ايام سودا على ايدى لو مظبطوش العربية

[Hossam.Hamdy]

ازاى يا جدعان عشان التكنولوجيا بتاعت السياره تقدمت النور يطفى.
امال لو بى ام الفءه السابعه ايه المفروض يحصل؟!!!تفرقع...
والله التوكيل ده سمعته زى الزفت و كل الناس عندهم مشاكل معاه و انا منهم...المهندسين هناك مش بيفهمو كويس مش عارف متخرجيين منين ..المفروض تكون الشركه بتبعتهم كوريا دورات تدريب و المفروض كوريا تخلى فى مهندسين مراقبه من هناك هنا فى التوكيل..

لما مدير مركز اليهاكل يقولى البويه طلعت عشان بتغطى العربيه بغطى قماش يبقى ده توكيل اى كلام .هى مرشوشه بالوان مياه؟(على فكره مش بغطى العربيه)
انا رايح الاسبوع ده اشوف هيعملولى ايه تانى فى الفتيس...
ولو فضلت كده هبعت شكوى فكوريا و هحاول اوصل لخالد اباظه بتاع اخبار السيارات و قوله على كل الشكاوى

[SEATLOVER]

شكر على الردود
ا/ setlover

طيب ليه فى عربيات وعربيات لا مع ان هما الاثنين النترا ونفس الموديل

يا analyzer باشا اهدى بس شوية ..العربية حلوة اوى ماتبوظش فرحتك بيها ....
ممكن يكون ذى ما قلتلك بتفرق من موبيل للتانى عشان كدة بتبان فى عربيات و عربيات لآ
بعدين جرب موبيلات ماركات تانية مش هاتخسر حاجة
وبردو اقرا الكتالوج شوية ...لو مذكور كدة يبقى عداهم العيب و مش لازم التكنولوجى تبقى متقدمة اوى يعنى عشان تغطى الموضوع دة
ما فى الطيارات اللى اسمها الطيارت ممنوع و (محطات البنزين -المستشفيات -...)

[ammahah_ahmed]

مش قادر ارد غير بكلمة واحدة... وعجبي!!!

[Kisho]

حضرتك انا شفت الى وصفته ده فى عربيه تانيه (بخصوص عدم استقرار نور التابلوه)
الكلام ده من 3 سنين
كان السبب المفتاح اللى بيغير شده اضاءه التابلوه
المقاومه بتاعته كانت بايظه

بس ده تشخيص مالوش دعوه طبعا باستعمال الموبايل
و مالوش دعوه بكهرباء المحرك

[Hossam.Hamdy]

يا analyzer باشا اهدى بس شوية ..العربية حلوة اوى ماتبوظش فرحتك بيها ....
ممكن يكون ذى ما قلتلك بتفرق من موبيل للتانى عشان كدة بتبان فى عربيات و عربيات لآ
بعدين جرب موبيلات ماركات تانية مش هاتخسر حاجة
وبردو اقرا الكتالوج شوية ...لو مذكور كدة يبقى عداهم العيب و مش لازم التكنولوجى تبقى متقدمة اوى يعنى عشان تغطى الموضوع دة
ما فى الطيارات اللى اسمها الطيارت ممنوع و (محطات البنزين -المستشفيات -...)

الطيارات ممكنوع فيها علشان خاط الشبكه بتاعت الموبيل هتأثر على اجهزه الاتصال بتاعت الطياره
انما البنزين معرفش له

[dr.amr]

الموضوع ده بيحصل مع واحد صاحب انا كنت فاكره بيهزر
هو بيقولي لما بعدي في مكان معين بلاقي النور القلاب بيشتغل لوحده
ولما يبعد عن المكان ده الموضوع بيرجع عادي

[ahmedfd]

أنا معايا النترا 2008 برضه بس الحقيقة مفيش المشكلة دي خالص... بس فعلاً في صيانة الألف نبهوني إنه نتيجة للتكنولوجيا اللي فيها و وجود سنسورز كتير فممكن أثناء المرور قرب كابلات ضغط عالي نور العربية يرعش بسيط و ده عادي و ميقلقش بس الحقيقة أنا محصليش الكلام ده خالص و بحط الموبايل في التابلوه عادي جداً.
و الله أنا شايف كلام seatlover منطقي و معقول.. جرب كده الموضوع مع موبايل نوع تاني مجرد بس علشان نحل الموضوع بطريقة الإستبعاد و مين عارف...
و كمان كلام الأخ هشام عبد المجيد برضه فيه منطق كبير .. يعني ممكن لو عربيتك GL و راكبلها الإنذار في مصر فممكن تردد الجهاز مع الموبايل بيلخبط النور.. و الله أعلم.