التكييف والتلين !!

[eng_Bondo2]

السلام عليكم شباب أحلى منتدى

عندي سؤال .......ممكن يكون سؤال خيبان شوية !' بس بحكم إني جديد في السواقة كنت محتاج رأي الخبراء في موضوع تشغيل التكييف في فترة التليين ( أول 1000 كم ) , يا ترى حلال ولا حرام !!

أنا لسة شاري نيو اكسنت اوتوماتيك , وبصراحة قرأت الكتالوج مرتين مش لاقي فيه أي حاجة تقول إني مااشغلشي التكيف ! .......فـيا ترى الكلام الصح إيه ؟؟

[Hamdy Masria]

معظم الأعضاء هتنصحك طبعا بعدم تشغيل التكييف فى اول 1000 كيلوا لتجنب الحمل الزائد على الموتور فى بداية مشوار حياتة وانا عن نفسى عملت كده ... واكيد مش هتلاقى النصايح دى فى كتالوج السيارة لأنك هتلاقيهم كاتبين ان الموتور لا يحتاج الى تليين وينصح ببعض التعليمات اللى هى عدم زيادة السرعة عن 88 كيلوا فى الساعة فى اول 2000 كيلوا وعدم سحب او قطر اى عربية اخرى فى اول 2000 كيلوا ... وفى ناس بقى بتقول ان التكييف ملوش دعوة بحكاية التليين وبعتبروا انك مركب حد معاك طول الطريق ... بس حضرتك طبعا خليك فى المضمون واللى احنا عارفينوا

[kamatsho]

معظم كتالوجات العربيات مش مكتوب فيها حاجه بخصوص التكييف فى فتره التليين وبالنسبه لموضوع انك متشغلش التكييف فى فتره التليين ( اول 1000 كيلو ) ده الناس بتقوله عشان متحملش على ماتور العربيه عشان زى مانتا عارف التكييف بيحمل على الماتور و فتره التليين المفروض ان r b m ميجبش 4 ومن هنا الناس بتعتقد ان التكييف تشغيله فى فتره التليين غلط وده اعتقاد مصرى خاطىء عشان لو فى اى دوله خليجيه قالو للناس اللى هتشترى العربيه متشغلش التكييف فى فتره التليين محدش هيشتريها وعشان تبقى فى السليم والمضمون برضو انتا ممكن تشغل التكييف بس متخليش ال r b m
يعدى ال 2.5 او 3
ومبرووك العربيه الجديده وربنا يكيفيك شرها ويعطيك خيرها

[yoko]

معظم كتالوجات العربيات مش مكتوب فيها حاجه بخصوص التكييف فى فتره التليين وبالنسبه لموضوع انك متشغلش التكييف فى فتره التليين ( اول 1000 كيلو ) ده الناس بتقوله عشان متحملش على ماتور العربيه عشان زى مانتا عارف التكييف بيحمل على الماتور و فتره التليين المفروض ان r b m ميجبش 4 ومن هنا الناس بتعتقد ان التكييف تشغيله فى فتره التليين غلط وده اعتقاد مصرى خاطىء عشان لو فى اى دوله خليجيه قالو للناس اللى هتشترى العربيه متشغلش التكييف فى فتره التليين محدش هيشتريها وعشان تبقى فى السليم والمضمون برضو انتا ممكن تشغل التكييف بس متخليش ال r b m
يعدى ال 2.5 او 3
ومبرووك العربيه الجديده وربنا يكيفيك شرها ويعطيك خيرها

+1
هو ده الكلام الصح وشغل التكيف المهم متقرصش على العربيه والrpm تحت ال3 على طول ومتقلش رجلك على دواسه البنزين عموما

[SAMEHNOSHI]

باشا الكلام دة غلط و جاى من مفاهيم كانت موجودة فى العربيات القديمة... دلوقتى معظم العربيات بتنزل متلينة فعلا و لا تحتاج لتسخين اكثر من 30 ثانية مش زى عربيات زمان... كمان فى ناس حتقلك ما تدورش العربية و التكييف شغال و افصلة الاول قبل ما تدور, بردة الكلام دة غلط و كان صح فى العربيات القديمة لكن دلوقتى معظم العربيات الحديثة بتفصل اى حمل زيادة بشكل ألى اثناء بداية تشغيل المحرك, يعنى بتفصل النور العالى و الكاسيت و بتفصل كمبرسور التكييف و ترجع تشغلة تانى بعد ما تدور.
الخلاصة: شغل التكييف من اول يوم و استمتع بعربيتك و لا داعى لفصل التكييف قبل دوران المحرك و مدة تسخين السيارة من 30 ثانية الى 60 ثانية,( و يفضل ان تحافظ على rbm منخفض فى اول 1000 كيلو و عدم زيادة السرعة عن 90)

[Amro_ON]

انا عربيتي نيو اكسنت اتوماتيك لسة مكملتش اول 1000 كيلو و بشغل التكيف عادي جدا و كله تمام و الحمد لله ... بس نصيحة اول متشغلة جيب المروحة على أعلى سرعة و بعد متسقع العربية حوالي دقيقة نزل سرعة المروحة للاولى او التانية عشان كده التكيف ميخدش فترة طويلة عشان يسقع العربية و بالتالي تجهد المتور

[MMamdouh]

استعمل عربيتك عادى جدا... قصة ألسرعة 80 و عدم تشغيل التكييف دى كانت بتطبق على العربيات اللى كان بيركبها الفراعنة

MMamdouh

[eng_Bondo2]

والله يا شباب مش عارف أقولكم إيه ......بجد ربنا يكرمكم

أنا كده اطمنت , وحاشغال التكييف بقى وربنا يسهل

جزاكم الله خيرا على ردكم السريع