استلمت عروستي الالنترا بجد عربيه جميله

[farfora20082008]

السلام عليكم

انا اول امبارح روحت استلمت الالنترا بتاعتي البتنجاني

وبجد عربيه تحفه

سيبوني بقي احيكلكم علي احساسي

انا روحت كونتاكت ابو رواش ومضيت وبعد كده مندوبهم خدني علي فيزبا :) للشيخ زايدد عشان العربيه كانت هناك انا اول ما دخلت غبور هناك لاقيت الشباب كانو بيغسلو العربيه بصراحه مش رضيت ابصلها اصلي كنت حابب اشوفها وهي في كامل زينتها

ودخلت جوه شويه اتكلمنا وبعد كده قالولي تعالي يا باشا استلم عربيتك ومبروك عليك

روحت لاقيت عروسه واقفه بجد جميله قوي وبتلمع قعدت الف حواليها والواد ماشي ورايا كل ما ابص علي مكان والاقي عليه تراب يقوم هوه ماسحه :)

المهم شيكت علي الاستبن والعده والوصله والتكيف والاشارات ولو فيها اي خدوش وكده

وطلبت منهم حد يجي معايا عشان يوريني ازاي اروح الزراعي وتقريبا المعرض كله جه معايا وكانت دي اول مره اسوق اتوماتيك
نبدأ من اول ما ادور بجد صوت جميل للماتور اول ما بيبدأ والمارش عجبني اوي ومشيت بها ناعمه جدا والدركسيون قمه في السهوله وماشي وانا قلبي علي ايدي والمحور كان واقف والزراعي واقف انا خدت 3 ساعات لحد ما روحت بيتنا

هما قالولي معديش ال 100 بس بصراحه كذا مره اجيب 120 و130 طمع بس برجع تاني اهدي وامشي علي 100

هوه مغير شويه فيها عن موديل 2010 الاتي

في مسند يد امامي بكونسول
مفيش عداد حراره
مفيش لمض لتوضيح الغيارات الغيار الاتوماتيك بيبان علي العداد الديجتال ودي بصراحه مضيقاني اصله مش بيبان قوي

في بقي حاجه نفسي حد يقولي عليها انا اول ما بدور بلاقي لمبه في بتنور مكتوب عليها EPS سألت الراجل بتاع غبور اللي كان راكب جنبي واللي سلمني العربيه هي فيها EPS قالي ايوه فيها طبعا قولتله يا راجل !!! قالي ايوه قولتله هوه ايه بقي ال EPS ده قالي دا بتاع الفرامل قولتله بيني وبين نفسي الله ينور عليك

فممكن تقولولي ايه ال EPS ده اللي اكيد مش هوه ال APS ؟؟؟؟

وطبعا حصل اللي خايف منه العربيه اتخبطت وانا بركنها في الجراج :( بس هي حكه في الاكصدام اللي ادام علي العموم هي كده خدت عينها وربنا يستر علي الباقي اصل انا عايش في مكان لو اشتريت قميص جديد البلد بحالها هتعرف وتبصلك عليه :) الحمد لله

[John_Samy_1]

EPS Electric Power Steering معناه بور سترينج كهربائي مش هايدروليك زي الCerato , الكهربا انعم في السرعات القليلة بس معرفش أداؤه في السرعة العالية مريح ولا لأ.
ABS Anti-Lock Braking System ديه الفرامل المانعة للإنغلاق وفيه كذا موضوع اتكلم عنها في المنتدي.

[mshmshm3]

الف مبرووووووووووووووك وربنا يديلك خيرها ويكفيك شرها

[mero25]

الف مبروك على السيارة وربنا يديك خيرها ويكفيك شرها
عربية جميلة فعلا

[semsem8080]

الف مبروك وربنا سترها مع كل واحد يارب

[ابو فرح]

الف مبروك

[Hosam_Optrawy]

الف مبرووك

[kamatsho]

السلام عليكم

اصل انا عايش في مكان لو اشتريت قميص جديد البلد بحالها هتعرف وتبصلك عليه :) الحمد لله

هههههههههههههه احنا بقه عندنا لو اشتريت بوكسر الناس كلها بتعرف

عشان قريه وكل الناس اللى فيها عارفه بعضها عيب وميزه فى نفس الوقت
الف مليوون مبرووووك على العربيه وربنا يديلك خيرها ويكفيك شرها
ولو العين هتروح على اد الحكه دى يبقى الحمد لله اووووووى تحمد ربنا

عشان انا مش عايز اقولك ايه اللى حصل فى عربيتى عشان متتخضش بس هههههههه

[mcml_13]

ربنا يباركلك فى العربية و يديك خيرها و يكفيك شرها .... بس موديل 2011 هو نفسه 2010 و اللى مافيهوش المسند و الحتت النيكل و العدادات القديمة كان من 2007 ا 2009
بس حضرتك ماقتلش جبتها بكام و ايه كماليتها و توكيل ولا خليجى .... عشان نعرف بس السوق ماشى ازاى

[abou_sama]

الف مبروك على السيارة وربنا يديك خيرها ويكفيك شرها

[ahmed_khalil]

مبروك يا باشا العربيه فعلا جميله
ربنا يباركلك فيها

[m_mekkawy]

eps electric power steering معناه بور سترينج كهربائي مش هايدروليك زي الcerato , الكهربا انعم في السرعات القليلة بس معرفش أداؤه في السرعة العالية مريح ولا لأ.
Abs anti-lock braking system ديه الفرامل المانعة للإنغلاق وفيه كذا موضوع اتكلم عنها في المنتدي.

+1
الف مليون مبروك وان شاء الله يكون وشها حلو عليك وربنا يديك خيرها ويكفيك شرها
احنا دلوقت كده من نفس الفصيله :)

[m_zizo620]

مبروك عليك و ربنا يديك خيرها و يكفيك شرها و ان شاء الله مش هتندم هي عربية ما شاء الله كويسة و هتسعفك دايما بس خالي بالك عشان انا حسيت ان بويتها ضعيفة اوي و من اقلل حاجة بتتخدش و دي اكتر حاجة بتجنني

[Khaled Seif]

السلام عليكم ورحمة الله وبركاته

أخي الفاضل مبارك عليك

ولاتنس أن تضع يدك على مقدمتها وتقل دعاء المصطفى صلى الله عليه وسلم الذي جاء في هذا

الحديث إذا تزوج أحدكم امرأة أو اشترى خادما فليقل [gdwl] [/gdwl][gdwl][/gdwl][gdwl][/gdwl][gdwl][/gdwl][gdwl][/gdwl][gdwl][/gdwl]
[gdwl]

اللهم إني أسألك خيرها وخير ما جبلتها عليه

وأعوذ بك من شرها ومن شر ما جبلتها عليه

[/gdwl]

وإذا اشترى بعيرا فليأخذ بذروة سنامه وليقل مثل ذلك

مهم جدا جدا جدا ألا تنس هذا الدعاء

[alihussien2]

السلام عليكم الف مبرووووووووووك وربنا يديك خيرها ويكفيك شرها ... وطلعت هي هي 2010 مش كده؟ اصل اتبح حسي في المنتدى على الموضوع ده و اصدقائنا كتير هنا فاكرينها غير 2010 واقولهم يا جماعة 2011 هي هي 2010 محدش صدقني والحمد لله طلع كلامي صح؟ وقلت ساعتها اللهم بلغت اللهم فاشهد عموماااااا الف مبروك مرة تانية--- علي حسين