مشكلة جديدة غير تقليدية وعايز حل لو سمحتم لسيارة نيو اكسنت2010

[ckamelo]

المشكلة في الجراج إن السايس بفتح التكييف وينام في العربية فترات طويلة ومافيش حل معاه نظرا لعدم وجود اماكن أخري لذلك هل يعلم أحد طريقة غلق التكييف بحيث لا يفتحه أحد غيري
وهل طريقة نزع فيوز التكييف تصلح أم لا وما هي عيوبها ورقمه كام الفيوز الخاص بالتكييفي في النيو أكسنت إن وجد
رجاء شديد البحث في هذا الأمر نظرا لمشاكل كتييييير هتحصل من هذا الإسلوب في التعامل مع السيارة
وحسبي الله ونعم الوكيل

شكرا

[د.محمود صلاح]

ايه ده ؟! شيء غريب فعلاً .. خذ منه المفاتيح .

[mshmshm3]

ايه ده ؟! شيء غريب فعلاً .. خذ منه المفاتيح .

طبعا صح ازاى تسيب له المفاتيح استحالة اسيب للسايس مفتاح عربيتي ولا هو ولا لاى حد غيره في اى مكان العربية زى البيت بالظبط بالنسبة لفصل التكييف مش عارف انا لو مكانك هاكهرب العربية بس حاول تاخد منه المفاتيح ومش تسيبهالوا ولو ما نفعش علشان الجراج صف عربيات قدام بعض حاول تشوف جراج تاني علشان كدة حرام استهلاك بنزين والبطارية احتمال تنام

[Sharky]

خد منه المفتاح طبعا
دا احسن حل

[memo823000]

ياعم انا كنت دوسته بالعربيه - دا لو فكر يفتحها مش ينام فيها وبشغل التكييف
انا دمى غلى ياراجل حرام عليك - الله ماانى صائم
طبعا خد منه المفاتيح وكسر دماغه

[mohamed1979]

انت الغلطان مش السايس
انت تفكر تغير مكان العربيه مش تلاقى حل تتحايل بيه على السايس علشان ميشغلش تكييف العربيه

[ashussein]

المشكلة في الجراج إن السايس بفتح التكييف وينام في العربية فترات طويلة ومافيش حل معاه نظرا لعدم وجود اماكن أخري لذلك هل يعلم أحد طريقة غلق التكييف بحيث لا يفتحه أحد غيري
وهل طريقة نزع فيوز التكييف تصلح أم لا وما هي عيوبها ورقمه كام الفيوز الخاص بالتكييفي في النيو أكسنت إن وجد
رجاء شديد البحث في هذا الأمر نظرا لمشاكل كتييييير هتحصل من هذا الإسلوب في التعامل مع السيارة
وحسبي الله ونعم الوكيل

شكرا

اعمل تصفير لعداد الكيلومترات العادي من الزرار
لانة اكيد ها يدور العربية ويشغل التكييف .. بمعني انه مش ها يشغل التكييف علي البطارية طبعا

وتتفق مع السايس انه العداد متصفر ولو انتا لاقيتة متغيير درجة (( ها تمسكة تبهدلة ))
ولكن ماتتنازلش عن مكان الجراج وتسيبهوله

بالادب والزوق يعني وبدون صوت عالي فهمة القصة واستفيد بمكانك وماتسيبهوش لحد

وشكرا
اخوك

[ckamelo]

أشكركم ( صاحب الموضوع يرد )

أشكر النصائح المفيدة التي تفضلتم بها

ولكن كما تعلمون أن أصعب شيء بعد ما تشتري الغربية إنك ماتلقيش مكان تركينها فيه ودي مصيبة المصايب في القاهرة ولما تلاقي مكان في جراج بتكون هدية من عند ربنا والسيد القائد الأعلي للجراج الساسي باشا له حقوق كتير منها قبولك او رفضك ولو تدخل أي فرد حتي لو صاحب الجراج ببساطة ومن غير مايعمل حاجة بإيدة ممكن يتسبب في مشاكل للعربية والكل عارف علشان كده لازم تحلها سلمي أو تقبل البحث لساعات علي ركنة وترجع تلاقيها يوميا فيها مصيبة وممكن ماتروحشي شغلك لإن فيه واحد بذكاء وقف أمامك وغيرة من الأخر ده أفضل حل ويجب التعامل مهاه سلمي وبذكاء

شكرا جزيلا

[mshmshm3]

ياعم انا كنت دوسته بالعربيه - دا لو فكر يفتحها مش ينام فيها وبشغل التكييف
انا دمى غلى ياراجل حرام عليك - الله ماانى صائم
طبعا خد منه المفاتيح وكسر دماغه

وليه تدوسه اربطه في العربية واجرى بالعربية واتوصي بالحفر والمطبات الحل فعلا ما تسيبش المفاتيح له تاني

[Ayman-Ahmed]

لو انت متاكد انه بيعمل كده او شفته او سمعت من حد من السياس التانيين.

يبقى فى حلول بسيطة:

-صاحب الجراج او شفلك زبون من الزباين اللى معاك وقولهم اللى بيحصل معاك واكيد مع غيرك.

-لو تعرف تنزل وقت ما بتكون شاكك انه بينام فى التكييف وتفتح عليه الباب وتمسح بكرامته الارض.

-اتاكد كويس انه بينام فى التكييف وصحيه براحة خالص وقوله كده مينفعش ومتعملش كدة تانى وانت مش طايق نفسك.وبعدها بيوم او اتنين تقوله حضرلى العربية عشان رايح التوكيل اعمل صيانة.وترجع متنرفز وتقوله كلملى صاحب الجراج على التيلفون او لو موجود تكلمه وتقوله اروح اعمل الصيانة النهاردة الاقى البيه السايس بتاعك مشغل التكييف وحارق الموبينة او اى حاجة بقى ومخلص الفريون وده هيتكلف 600-700 جنيه.شوفوا بقى مين هيدفعهم.ولو ادفعوا قوله خلاص انا حتحمل الموبينة وانتوا ادفعوا الفريون وخلى التوكيل يملهولك تانى.

اهم حاجة اتاكد انه بيعمل كدة مش السياس بيضربوا فى بعض

[M.Osman]

بصراحة انت طيب جداً

[m_mekkawy]

انسخله ع المفتاح من غير تشفير يعنى انسخله مفتاح عادى عايز يحرك العربيه يحركها زق لانها مش ممكن تدور بالمفتاح الى بدون تشفير
هه هه هه هه (ضحكه شريره)

[hema1975]

سيبك من كل الردود دى

ما دام المشكلة قائمة و لازم تسيب مفتاح معاه

الحل تعمل مفتاح لتشغيل التكييف او فصله و يكون تحت التابلوه و دا انا شوفت واحده عملاه فى عربية فيرنا

عن طريق المفتاح دا هو لما يشغل مروحة التكييف و يترزع فى العربية مش هيلاقى اى حاجه شغاله علشان الزرار انت فاصله

انا مهندس ميكانيكا و كنت شغال فى الصيانة عدت عليا عربية فيرنا طلعت عينى و اتأخرت ساعه عن ميعاد خروجها و كل دا علشان احل مشكلة التكييف لانه مكنش بيشتغل و فى الاخر صاحبة العربية قالتلى انت بتحاول تشغل التكييف؟ قلتلها اه دا مغلبنى و فيه مشكلة

قعدت تضحك نص ساعه و فى الاخر قالتلى اصل انا عامله مفتاح مخصوص للتكييف و كمان تحت التابلوه

اعتقد هى فى نفس موقفك دا

[Vernawy]

خلي بالك، حضرتك، إنت حنى لو وصلت لحل في تشغيل و فصل الكمبريسور، هتفضل مشكلة التكييف الدافئ في الشتاء لأن التكييف الدافئ لا يحتاج الكمبريسور. إذا كنت مصمم إنك تحلها عن طريق العربية مش السايس، يبقى ركز على تحكم خاص في المروحة لأن هي اللي مشتركة بين التكييفين البارد و الساخن و ضرورية للإتنين. و أنا أختلف مع فكرة عمل كنترول تحت التابلوه عشان كده التوكيل هيقوللك لعبت في الكهربا و تتطلع الكهربا من الضمان. أعتقد الحل في إنك تشيل فيوز المروحة حل بسيط، و مش مؤذي للعربية.

[haroun707]

انسخله ع المفتاح من غير تشفير يعنى انسخله مفتاح عادى عايز يحرك العربيه يحركها زق لانها مش ممكن تدور بالمفتاح الى بدون تشفير
هه هه هه هه (ضحكه شريره)

الراجل ده بيقول كلام زى الفل