استفسار عن الصيانة

[IL_Capitano]

انا عندي سؤال ياريت لو حد يقدر يساعدني فيه

انا اشتريت عربيه i10 من غبور أبو رواش بالقسط وطبعاً مأمنه عليها من غبور

وقريب المفرض أروح صيانة الـ 1000

بس انا مش معايا أي ورق للعربيه غير الرخصه بس لأن غبور يوم ما بستلم العربيه بيبعت معايا مندوب للمرور عشان الترخيص فهو عمل كل حاجه انا مش عندي أي فكره عن الورق

دلوئتي لما أروح الصيانه لازم يبئا معايا ورق معين وللا ايه؟؟ انا حاسه اني تايهه والموضوع تايه مني

ياريت لو حد يعرف أي حاجه يقولي

[lovermohamed]

الف مبروك على العربيه
خد معاك الرخصة بس وهما حيدولك دفتر صغير علشان بيسجلو فيه الصيانات اللي تمت في العربية

حيبصوا على العفشة ومية الرادياتير وزيت الباور والدبرياج وحيغيرولك زيت الموتور لشيل خليك في شل الترا الفضي ب 230 جنيه تقريباً وده 10000 وعن نفسي بغيره كل 9000
روح بدري على 9 علشان تلحق تخلص بدري

والله المستعان

[Ashraf_Ibrahim]

زي ما زميلنا العزيز قال
الرخصة بس هي اللي مطلوبة فقط لا غير
روحي بدري فعلا قدر الامكان هما بيبدأوا شغل من الساعة 8 تقريبا
حاولي تكوني هناك على 8.30
وشوفي هل ابو رواش اقرب واللا قليوب
انا عملت صيانة الالف في قليوب كانت ممتازة
ابو رواش عملت فيها صيانة ال 5000 عندي عيوب في الصيانة ورايح اعملها بكرة باذن الله
وربنا يكرمك يارب

[IL_Capitano]

الله يبارك فيكم وميرسي كتيييير على ردكم السريع والمساعده

وربنا يكرمكم يارب ويباركلكم في عربياتكم

[lovermohamed]

بالتوفيق ان شاء الله وخد بالك من الي حواليك

السواقه فن ذوق اخلاق

[Ayman-Ahmed]

انا عندي سؤال ياريت لو حد يقدر يساعدني فيه

انا اشتريت عربيه i10 من غبور أبو رواش بالقسط وطبعاً مأمنه عليها من غبور

وقريب المفرض أروح صيانة الـ 1000

بس انا مش معايا أي ورق للعربيه غير الرخصه بس لأن غبور يوم ما بستلم العربيه بيبعت معايا مندوب للمرور عشان الترخيص فهو عمل كل حاجه انا مش عندي أي فكره عن الورق

دلوئتي لما أروح الصيانه لازم يبئا معايا ورق معين وللا ايه؟؟ انا حاسه اني تايهه والموضوع تايه مني

ياريت لو حد يعرف أي حاجه يقولي

زى ما الاخوة الافاضل افادوا.مش محتاجة غير انك تتصلى الاول ب 16101 لحجز ميعاد صيانة وهيقولولك على رقم الحجز هتروحى بيه على الفرع اللى اخترتيه ويسالوك على رقم الحجز والرخصة ويجيلك واحد من مهندسى الاستقبال يقولك التكلفة للصيانة كام ولو عاوزة تغيرى زيت الموتور وفلتر ويستحسن تغيريه وبعدين تسيبى المفتاح ويدولك ورقة باللى هيعملوه ووقت تقريبى لانتهاء الصيانة وتاخدى الرفايع من العربية معاكى اللى فى التابلوه وتقعدى فى الاستراحة لما يندهوا عليكى وتستلمى وتوكلى على الله ولو ليكى اى ملاحظات على العربية قوليلهم عليها وانصحك بفرع قليوب لانهم مش زحمة اوى.

ربنا يباركلك ويساعدك فى تسديد اقساطها