انا هتجنن وعاوز بجد كلام ثقة ويكون اكيد 300%

[sahtot]

اولا السلام عليكم انا بجد هتجنن قررت اجيب عربية لاول مرة فى حياتى انا بسوق من زمان بس دية اول مرة اجيب عربية بأسمى وتبق الحتة بتاعتى من الاخر المهم انا قدامى كزا عربية وعاوز الناس الجامدة الى هنا الى جربوا مش سمعوا وبس يفيدونى انا قدامى دايو نوبيرا 2007
بروتون جين2 2006
هيونداى الالنترا 2008
لانسر بوما الشكل القديم 2008
تويوتا ياريس
كورولا 2006
واخيرا الفيرنا
اانا عن نفسى كنت بقارن بين الالنترا والانسر والجين2 بس لو حاجة فى الى قلتة احسن او عربية تانية قولولى بس اهم حاجة عاوز الى يقولى يكون اختيارة على اساس السحب العزل الصاج الثبات جدا والتحكم على الطريق السيطرة يعنى والكماليات .....ولكم جزيييل الشكر

[osamaelbaz]

الالنترا احسنهم وبعدين الماتريكس وربنا يوفقك

[SEATLOVER]

با سيدى سلامتك من الجنان ..بالنسبة لى اللى ذكرتهم ترتيبهم كالاتى

1- كورولا 2006
2- الالنترا 2008
3- جين 2 2006
4- لانسر بوما
5- نوبيرا
6-فيرنا
7- ياريس

ولو عايز ترشيح تانى غيرهم ليــــــــــون 2004

[nobody]

أحسنهم الإلنترا 2008 وبعدها الكورلا 2006

[fahd_628]

يكون اختيارة على اساس السحب العزل الصاج الثبات جدا والتحكم على الطريق السيطرة يعنى والكماليات

جين 2 بس موديل 2006 ممكن تلاقى فية عيوب تقفيل حاول تدور على 2007

[Sharky]

رأى الشخصى عن تجربة :
1- تويوتا ياريس
2- هيونداى إلنترا
3- تويوتا كرولا 2006
4- لانسر 208 الشكل القديم
5- جين 2 2006
6- نوبيرا
7- فيرنا

[sa3dawy]

1-كورولا 2006
2-ياريس
3-بروتون
4-الانترا
5-بوما (بكرها):D

[Hossam.Hamdy]

بص يا باشا:
لانسر بوما:جميله و سحبها حلو جدا و ثبات جامد,لاكن صاج ضعيف جدا جداااااااااا اى خبطه قويه بتبهدلها.
النترا 2008:فى ناس بتقول الثبات كويس وفى ناس بتقول وحش...بس الصاج ضعيف جدا جدا بشوف منها متبهدل كتير فى الحرفيين..الشكل القديم اقوى
ياريس:صاج ضعيف ثبات مش اوى..ممكن تركب جنط 17 او 16 و تهبط
جين 2 :قطع غيار قليله وناس كثير بتشكر فيها و فيها شوية عيوب
نوبيرا:نفض خالص
فيرنا:الصاج كويس انا عملت بيها حادثه السمكرى قالى لو كانت عربيه تانيه كان زمانى غيرت نص خلفى...الثبات لازم جنوط..وطبعا فى شوية عيوب تقفيل مصرى.مفيش عزل للموتور عن الكابينه
كورولا:ثبات مش اوى صاج ضعيف,,,ممكن تجنط و تهبط

ليه مفكرتش فى مازدا 3 العربيه ده تحفه تسارع رهيب ثبات مش ممكن جامد جدا...عن تجربه بجد عربيه جامده اوىىىىى


انا رأى جين 2 او لانسر

[sahtot]

اللف شكر يا جماعة المازدا 3 يا باشا بيقولوا ان قطع غيارها مش موجودة ومنفضينلها فى التوكيل فخايف بصراحة اتورط وانا مش عاوز عربية واطيبة لان وزنى تقيل ومرة ركبت فى تاكسى قعد يحف واتكسفت اوى :( والمهم عندى العزل والسحب والتسارع لانى بجرى على طرق كتيير وكمان عوز عربية مريحة وانساها خااالص بس دة كل الحوار وشكرا بجد على ردودكم وافادكم الله بس بردة مفيش حد مستقر على راى هههه ليا حق اتجنن بقا ولا لاء :)

[Hossam.Hamdy]

ولا تتجنن ولا حاجه انت صلى اصلاة استخاره وربنا هيوفقك للكار الصح

[tutankhamoun]

اللف شكر يا جماعة المازدا 3 يا باشا بيقولوا ان قطع غيارها مش موجودة ومنفضينلها فى التوكيل فخايف بصراحة اتورط وانا مش عاوز عربية واطيبة لان وزنى تقيل ومرة ركبت فى تاكسى قعد يحف واتكسفت اوى :( والمهم عندى العزل والسحب والتسارع لانى بجرى على طرق كتيير وكمان عوز عربية مريحة وانساها خااالص بس دة كل الحوار وشكرا بجد على ردودكم وافادكم الله بس بردة مفيش حد مستقر على راى هههه ليا حق اتجنن بقا ولا لاء :)

بص يا باشا بالنسبة لمتطلباتك
هي الجين 2
سحب ........ قوة ........... عالية على الأرض ........ ثبات فوق الوصف
بتستحمل .......... قطع غيارها متوفرة خارج التوكيل ......... جميع الكماليات ......... وحش قوي ........ و شكل جميل
العربية دي جامدة و أقصد جامدة يعني الصاج بتاعها جامد و عفشة قوية و سرعة ممتازة ........
بس كل الكلام ده عن تجربتي مع الجين 2 موديل 2007
و أنا لي واحد صاحبي عامل بواحدة موديل 2006 حوالي 75 ألف كيلومتر و كان ظهر فيها عيوب تقفيل بسيطة و أتصلحت في التوكيل
----------
بالنسبة لموديل 2007 لا يوجد به عيوب تقفيل

و في رأيي ممكن برضه تفكر في اللانسر ......... سيارة رائعة

و في رأيي الشخصي البحت
التويوتا كورولا ............ سعرها مبالــــــــــــــــغ فيه جدا
و برضه 1300 سي سي
و الهيونداي النترا شكل جميل و صاج ضعيف
الياريس ...... الحاجة الحلوة الوحيدة اللي فيها ( موتورها فقط )
و النوبيرا كويسة و لكن شكلها مش حلو
الفيرنا حلوة على أد ثمنها جدا و لكن واطية شوية و بتعوم في السرعات العالية
و ربنا يوفقك لأختيار كويس إن شاء الله

[limo]

انا راى الانسر 1600 ضمان مصريه

[poda]

sure you have to buy ELENTRA with out any think and MATRIX

[sahtot]

اةةةة اللف شكر تانى يا جماعة وشكرا يا .... انت اسمك طويل اوى ومش مفهوم :) المهم اللف شكر على الشرح المفصل دا وربنا يخليكم بجد بس انا سمعت ان البروتون عفشتها خشنة او جامدة كدا ومن جوة ديقة طب لو البروتون احلى من نحية الحاجاتا لى بتكلم عليها يبق لية الهيونداى اغلى علشان اسمها بس... ؟ بس انا علطول ماشى على طريق الاسكندرية ومصر علشان عندى حوارات كتير جدا بعملها والمواصلات نحلت وبرى فأنا كنت عاوز عربية من جوة معجزة يعنى انساها وانا جواها متحسسنيش بالطريق وتبقى قعدتها حلوة وتستحمل مثلا 4 افراد لان فى ناس بتسافر معايا انا قولت الالنترا لانها واسعة من جوا بس مش بتستحمل على كلامكم دا طيب وهل لو جبت البروتون او الالنترا اجيبها اوتوماتيل ولا مانيوال ....

[eng / AhmeD]

الكورولا أحسنلك