عملت صيانة ال30 الف في غبور وعندي بعض الشكوك !

[mahmoud_afifi]

السلام عليكم ورحمة الله

كنت حاجز ميعاد الصيانه وعملتها النهارده بس حصلت حاجات غريبه !!!

-اول حاجه انهم مادفعونيش فلوس كتير زي كل مره, هما ال220 وال10% الضريبه بس

-تاني حاجه اني استلمتها في وقت قياسي (ساعتين فقط لا غير) وماكنتش مصدق بصراحه لما سمعتهم بيندهوا على الاسم. قولت ده تشابه اسماء اكيد

-تالت حاجه اني مالقيتش من جوه الورق الي بيتحط على الدواسه ولا الكيس البلاستيك الي على الكرسي ولا الدركسيون ولا الفتيس. وحتى العربيه ماتوسختش (انا وصيت المهندس انهم يخلوا بالهم وكتب ملاحظه بكده بس مش عارف ده السبب انها ماتوسختش ولا لأ ).

بصراحه انا خايف لا اكون اتضحك عليا وما عملوش لا صيانه ولا حاجه

[sibrahim]

هل حضرتك ماحستش بفرق بعد الصيانة فى أداء العربية أو صوتها أو أى شكوى كنت بلغتهم بيها و عرفت اتعملت وللا لأ
ممكن تبص عليها فى بنزينة من تحت لو غيرو الزيت و الفلتر و حضرتك شاكك المفروض تلاقى الفلتر جديد و مفيش عليه أى حاجة اذا مكنتش مشيت فى شوارع فيها مية

إن شاء الله يكون كله تمام

[mahmoud_afifi]

لأ مفيش اي اختلاف , وكمان انا غيرت الزيت قبل الصيانه بحوالي الفين كيلو عشان مكانش في حجز.
يعني مفيش اي حاجه تقولي انهم لمسوا مسمار.
وكاتبين انهم كشفوا على كل حاجه زي الي مكتوب في الورق !!

الموضوع صعب وانا مابثقش في غبور