إستفسار بخصوص مشكله فى الماتريكس

[theking2690]

يا جماعه انا لسه فى التليين بس و انا ماشى بسمع صوت كده عامل زى ما تكون حاجه بلاستيك بتلف مع الكاوتش او حاجه قريبه من كده الصوت شبيه شويه كأنك لو ماشى بعجله نايمه ياريت تردو عليا بسرعه لأنى خلاص المفروض انى اروح صيانة الالف فعاوز اعرف اقولهم ايه على الصوت ده

[osamaelbaz]

هتلاقى ظلطة فى الكوتش ودى بتبان فى الماتريكس لان العجل الى ورا بتسمع صوتة كويس وإن شاء الله بسيطة وربنا يباركلك فيها

[theking2690]

الف شكر على رد حضرتك يا استاذ اسامه و انا المفروض دلوقتى اروح اعمل صيانة الالف كيلو تنصحونى اروح اعملها فين و هى بتيقى ايه نظامها

[liquidator]

أنصحك بكل الصيانات في أبو رواش ...
صيانة الألف كيلو هايغيرلك الزيت و الفلتر و يربط العفشة و يضبط الفرامل الخلفية و فرامل اليد ... يكشف علي مستويات كل الزيوت و الميه .. يجرب كل الالكترونيات و يتأكد انها تعمل .. يحط العربيه علي الهاي سكان و يتأكد من دقة ضبط الموتور و عمل الحساسات .. ولو فيها زوايا هايضبطها مجانا برده ... مصنعية الصيانه دي مجانا يعني هاتدفع تمن الزيت و فلتر الزيت بس ...
علي فكره أنا رايح أعمل صيانة السبعين ألف يوم الأحد في أبو رواش ... مين عارف يمكن نتقابل هناك !!!!

[theking2690]

الف شكر على رد حضرتك بس انا اللى خايف منه انو بيقولوا ان ابو رواش القعده فيا بتطوووووووووول قوىىىىىىىىىىىىى

[liquidator]

والله أنا رأيي تطول مش مشكله بس المهندسين اللي هناك عندهم خبره أحسن بكتير من أي حته تانيه و ده عن تجربة شخصية ... يعني لو في مصحة العربية متهيقلي مش مشكله ... و بعدين حضرتك لو حجزت برقم بدري شويه مش هاتطول هناك ...
وللا انت ايه رأيك ؟

[theking2690]

طيب انا معرفش ايه نظام الحجز و الحوارات ديه يا ريت لو حضرتك تفهمنى

[liquidator]

اتصل ب 16101 و قول لهم أنا عايز أحجز صيانة ال1000 كيلو عربيه ماتريكس هي هاتقول لك علي رقم معين في يوم معين و كل ما كان الرقم أقل يبقي أحسن طبعا فا لو لقيت الرقم متأخر تقول لها أنا عايز رقم بدري و مش مشكله يكون في اليوم اللي بعده أو اللي بعد بعده ... و هتأكد هي معاك اليوم و الميعاد اللي انت هاتيجي فيه و ماتتأخرش عن الميعاد عشان مايرحش عليك الحجز ...يالله الحق اتصل دلوقتي عشان تلحق يوم بدري ...