هام جدا زيت ال10 الاف ولا زيت ال5 الالف

[eldeplomasy]

سلام عليكم اولا احب ارعفكم بنفسى
اسمى حامد العزيزي ملحق دبلوماسى بوزارة الخارجية واشتريت نيو اكسنت موديل 2011 بس الشكل العادى
ومشيت بيها حوالى 4200 كيلو بس بعد صيانه الالف حطيت زيت ال10 الالف لان واحد في التوكيل قالى هيكون افضل مش مفهمتش منه افضل ليه المهم فضلت ماشي بيها لغايه ما ركبت عربية صاحبى نفسها بالضبط بس هو مشى بيها اكتر من 7000 كيلو بس بيحطلها زيت ال5 الالف فلقيت اختلاف ملحوظ في سحب العربية واستهلاك البنزين لصالح صاحبى وكمان نعومة صوت الموتور عنده اكتر من عندى ومن ساعتها محتار اغير الزيت لزيت ال5 الالف ولا ايه رايكو


محتاج رايكوا كلكوا سواء جربت الزيت ده او ده او سمعت معلومه او شفت مشكلة

وكمان سمعت ان زيت ال10 الالف بيخلى الموتور ياكل زيت بشكل اسرع والدليل على كده ان لو عربيتك قديمه متحطش زيت ال10 الالف عشان الموتور هيخف اسرع


منظر رايكوا,,,,

[M.Osman]

عن تجربة في الفيرنا

شل الأصفر 5000 كم بيخلي صوت العربية انعم فعلاً
لكن شل الترا استهلاك بنزين افضل

[A.Saad]

عربيتك مادام جديدة بتحط لها زيت تخليقى
غالبا 10000 بيكون تخليقى 5000 بيكون معدنى
لكن لاحظ استخدامك للعربية يعنى متقعدش الزيت اكتر من سنة
وفيه حاجة
انت بتعمل الصيانة فى التوكيل ولا برة

[falcon191]

أنا برضه مستني ردود أكتر لأن الموضوع ده مهم جدا

[medo_h_e]

انا عن نفسى بحط زيت 5 الاف و الحمد لله كله تمام
و احيانا مش بكمل 5 الاف يعنى ممكن 4 الاف بالكتير

[osama_ruan]

زيت شل الاصفر دة 3 الاف ك فقط للعلم

[tarekabosdera]

الزيت التخليقي ( 10000) كم أفضل بكل المقاييس من الزيت المعدني العادي ... وعن تجرية وبحث في معلومات هندسية عميقة :)

خصوصا وان عربيتك جديدة وعودها من دلوقتي على الزيت التخليقي

[mshmshm3]

اولا العربية لحد 5000 كيلو بتبقي خشنة شوية في الصوت وبعض الاجزاء ثانيا انا كنت بحط زيت 5000 للفيرنا وجه مهندس التوكيل قالي نفس الكلام ال 10000 افضل واللي لاحظته ان صوت العربية انخفض واستهلاك البنزين قل والزيت التخليقي افضل للموتور من الزيت المعدني واستني علي العربية كمان 1500 كيلو وهتلاحظ انها ابتدت تنعم

[Ashraf_Ibrahim]

انا جربت ال 10000 -الترا هيلكس- وجربت ال 5000 شل الاصفر
بداية شل الاصفر 5000 كم وليس 3000 زي ما هي معلومة شائعة
ال 10000 بيخلي صوت الموتور اهدى وانعم واستهلاك البنزين رائع وزيت كويس جدا بيحافظ على لزوجته لحد ما تغيره بدون اي مشاكل
بالنسبة لعربية حضرتك فهي لسة مكملتش 5000 كم فمتقدرش تحكم عليها
العربية مش هتديك افضل اداء ليها غير بعد 5000 كم هيبدأ صوتها يهدى وسحبها هيكون أفضل وهتحس بنعومتها كويس جدا فمتقلقش

[eldeplomasy]

اولا احب اشكر جدا الناس اللى ردت عليه واهتمت بالموضوع

ثانيا بعمل الصيانه في التوكيل وان شاء الله كل الصيانات هتبقى في التوكيل

ثالثا فعلا اول 2000 مشدتش بالعربية خالص بس بعد كده في ال2000 اللى بعدها لغايه دلوقتى شديت بيها كام مرة كده بس مش جامد اوي بس بصراحه جريت بيها وعديت ال140 فمش عارف ده غلط ولا ايه؟؟؟

رابعا من كلامكوا فهمت ان الزيت التخليقي احسن من المعدنى بس في واحد في محطة بنزين شل قالى المعدنى احسن من التخليقي في الصيف وخصوصا كتر تشغيل التكييف لانه بيقى اتقل من التخليقي بكتير اما فايدة التخليقي هي في الشتا عشان التشغيل صباحا بس لكن مع التكييف والحر الشديد الزيت المعدنى افضل

خامسا بحس بالعربية ان عفشتها ناشفه جدا معرفش هل كل الهيونداى كده ولا النيو اكسنت بس؟؟؟

واسف ع الاطاله

[falcon191]

الزيت التخليقي ( 10000) كم أفضل بكل المقاييس من الزيت المعدني العادي ... وعن تجرية وبحث في معلومات هندسية عميقة :)

خصوصا وان عربيتك جديدة وعودها من دلوقتي على الزيت التخليقي

الزيت 10000 كم كويس فعلا بس لو استهلاكك للعربية قليل بمعنى ان لو مرت سنة ولم تستهلك سوى 5000كم مثلا ،هتعمل ايه؟

[eldeplomasy]

وكمان في حاجه مكتوب على ورقه في التوكيل ان الزيت التخليقي نحطه لحد 50 الف كيلو او 60 الف كيلو وبعد كده نحط المعدنى وده معناه ان المعدنى احسن واتقل وبيلين اكتر؟؟؟

انا بعد صيانه اول الف حطيت زيت تخليقي بس شكلى كده هبدا احط معدنى من التغيير اللى جاى ولا اعمل ايه؟؟؟

فيدونى ربنا يكرمكم جميعا ويحافظ على بلدنا

[eldeplomasy]

فين الردود ارجوكم عشان عايز اغير الزيت ومنتظر القرار والقرار متوقف عليكوا

[mimo_15]

شل الاصفر افضل من وجهة نظري
وانا شفت الفرق فعلا لما جربته زيت محترم وفعلا فرق كتير في صوت العربية وكمان في الاداء
اتوكل على الله وغير للمعدني وجرب وانت اكتر واحد هتحس بالفرق وهتعرف تحكم كويس ساعتها ...
انا معايا الاكسنت الشكل القديم وشغال زي الفل معايا
بالتوفيق....

[semsem8080]

انا كنت بحط زيت موبيل 10000 ولسة جايب زيت أمراتي 30000 بس بصراحة خلي صوت الموتور انعم بكتير من موبيل بس انا ناوي اغيرة علي 10000 عشان الامان بردة وثمنة 290