مطلوب النصيحة

[good4u123]

السلام عليكم
انشاء الله هستلم ماتريكس قريب وكنت عايز نصائح من مستخدمى الماتريكس عن كل شىء من اول الاستلام و التلين و كل حاجة ممكن تتعمل عشان المحافظة على العربية و الحاجات اللى لازم ممتعمليش يعنى مثلا هل هيفرق تشغيل التكييف فى الاول ولا مفيش مشكلة . وهل مهم تركيب Defendersولا دة بيأثر على العربية .
اتمنى ان الموضوع دة يكون مرجع لكل الناس اللى هيستلموا ماتريكس.
شكرا مقدما على نصائحكم

[kimo-nubira]

اولا مبروك علي العربيه الجديده وربنا يديلك خيرها ويكفيك شرها

ثانيا اي عربيه لسه جديده في حاجات متعارف عليها لازم تعملها علشان تحافظ علي العربيه زي مثلا مامتشيش اكتر من 90 ك.م في اول 1000 ك.م

( التلين ) ويستحسن انك ماتشغلش التكيف في فتره التلين وديه نصيحه بيقولها كل المعارض والتوكيلات اما بالنسبه لموضوع ال Defenders

فا انا عمري مركبيته في عربيه وان شاء الله حد يفيدك من الاخوه الاعضاء في الموضوع ده ....

[good4u123]

شكرا جدا لاهتمامك

[liquidator]

أولا ألف مبروك علي العربيه و ربنا يباركلك فيها و يكفيك شرها ...
الماتريكس عربيه عاديه جدا زي أي عربيه و المفروض انك تتعامل معاها زي أي عربيه جديده تانيه ... يعني في أول 2000 كيلو ماتزودش السرعه عن 90 ( لو بالضبط يبقي 88 ) و ماتطلعش ال RPM أكتر من 3000 يعني تغير عند 3000 , و تمشي واحده واحده يعني التسارع يبقي بالراحه و يستحسن بلاش التكييف أو يبقي في أضيق الحدود طول فترة التليين يعني ممكن علي الطرق السريعه بس ...
في شوية حاجات خاصة بالماتريكس لازم تعرفها ...
أول حاجه انك لازم ACT YOUR AGE زي ما بيقولوا أو فيما معناه دي مش عربية لعب أو حرق أو خمسات أو تفويت و خلافه , دي عربيه عائلية لازم تتساق بحكمه و هدوء ...
يعني مثلا لازم AVOID HEAVY CORNERING يعني ماتخدش بيها ملفات علي سرعه عاليه عشان ارتفاع العربيه بيعمل عزم كبير عكس اتجاه الدوران و ممكن لا قدر الله يتسبب في ROLL OVER يعني تتقلب ( لا قدر الله طبعا )
ده غير ان الكبالن بتاعة العربيه صغيره علي جسمها يعني لو ماخدتش بالك من الملفات و واحده واحده هتلاقي نفسك عايز كبالن بعد 50000 كيلو , و كبلن العربيه دي مابيتغيرلوش الرأس يعني لازم تغير الكبلن كامل و ده تمنه 2300 جنيه في التوكيل للناحيه الواحده ... ماتتخضش أوي كده أنا عامل 72000 كيلو و لسه بكبالن الفابريكه و الكبالن عندي بحالة الزيرو بس لو خدت بالك من منهم و حافظت عليهم ...
تاني حاجه AVOID JACK RABBIT STARTS يعني بلاش الأمركة و انت طالع من الثبات و بلاش الحرق و القرص علي العربيه لان وزن العربيه تقيل جدا و ده سبب ان الموتور صوته نوعا ما عالي عن توأم روحها الالنترا الشكل القديم مع ان الاتنين عندهم نفس الموتور , بس الوزن العالي هو السبب , فالو عايز الموتور يعيش معاك أطول فتره خللي بالك و ماتقرصش عليه و واحده واحده كمان مش عايز أقول لك هايفرق معاك أد ايه في استهلاك البنزين , فالماتريكس كما يقولون عليها Designed to ferry people not to race with them يعني مصممة لحمل الناس و نقلهم و ليس للسباق بهم ...
السرعه القصوي لعربيتك المفروض انها 170 يعني لو لقيت الموتور بيجيب معاك أكتر من كده انت ماتزودش عن 170 . تسارع العربيه من 0 الي 100 كيلو سرعه في أقل من 12.7 ثانيه و أنا جربت الموضوع ده بنفسي ...
العربيه ثباتها هايل علي السرعات العاليه لكن بسبب ارتفاعها الهوا بيأثر فيها للأسف أحيانا لو كان شديد ...
و زي أي عربيه بقي تاخد بالك من مستويات الزيوت و الميه و تعملها الصيانه في مواعيدها و بجد بجد اذا كنت عايز أحسن أداء و أطول عمر ماتستخدمش اللي قطع الغيار الأصليه مهما كانت ...
بالنسبه للدفندرز هما فعلا بيدولها شكل حلو لكن اوعي اوعي اوعي , عربيتك ميني فان يعني مش 4*4 و الدفندرز دول خطر علي شاسيه العربيه و ده كلام قالهولي مهندس متخصص في غبور و صاحبي كمان ... بلاش بلاش بلاش , أحسن تأمين للعربيه دي انك تأمن عليها .
ياريت تستخدم بنزين مش أقل من 92 و يا ريت تبعد عن التعاون أو مصر للبترول , امارات مصر أو شل أو توتال هما أحسن حاجه موجوده دلوقتي لأن مركبات البنزين نفسه بتختلف من شركه للتانيه يعني الحكايه مش كاية 90 وللا 92 بس ...
أنا مش عايز أقول لك حط 95 بس الحقيقه طبقا لنسبة الانضغاط بتاعة موتور الماتريكس الل هي عشرة لواحد ده يناسبه بنزين بأوكتين ريتنج 96 كمان مش 95 !!!
ممكن أكون نسيت حاجه الاخوه الموجودين يقولوها بقي ... بالذات الأستاذ بسام عنده خبره كويسه في العربيه و ممكن يفتكر حاجات أنا نسيت أقولها ...
أي استفسار تاني أنا في الخدمة ..
تحياتي لك ...

[osamaelbaz]

انا عندى ماتريكس هى العربية بتنزل مية من الشكمان لصبح بدرى بس ولا ممكن اكوم ركنها يوم واشغلها العصر مثلا وتنزل مية اصل عندى مبتنزلشى مية الا الصبح بدرى بس

[liquidator]

عربيتك موديل كام و عامله كام كيلو ؟ و بعدين برده الصيف غير الشتاء و البيئه المحيطه بيك بتأثر ان كانت جافه أو رطبه

[osamaelbaz]

انا عربيتى 2008 عاملة 6 الاف كيلو

[liquidator]

انا عربيتى 2008 عاملة 6 الاف كيلو

لا طبعا ماتقلقش عربيتك لسه عذراء ;)
دا يمكن بسبب طبيعة الجوه عندك أكيد جو جاف و درجة الحراره كمان بتفرق ... و بعدين أهم حاجه انها بتنزل ميه الصبح و الزيت مش بينقص مللي واحد ...
ماتبقاش موسوس كده يا راجل و ماتقلقش عربيتك زي الفل .

[good4u123]

شكرا جدا للرد والاهتمام انا هاخد بنصحيتك فى موضوع الديفيندر انا كنت ناوى اركبهم بس انت كدة اكدتلى انهم هياثروا على العربية و شكرا جدا على النصائح

[liquidator]

شكرا جدا للرد والاهتمام انا هاخد بنصحيتك فى موضوع الديفيندر انا كنت ناوى اركبهم بس انت كدة اكدتلى انهم هياثروا على العربية و شكرا جدا على النصائح

لا شكر علي واجب .. و خد بالك بس منها كويس و ربنا يكفيك شرها يا رب .

[bassam nagy]

الف مبروك مقدما
بصراحة مش هاقدر اتكلم بعد الية قالة احمد قال كل المفيد

[good4u123]

شكرا جدا ليكم.
بس عندى سؤال انا سالت على الضمان فى المعرض قوليلى لما اروح صيانة 1000 هستلمة من غبور الكلام دة صحيح؟

[liquidator]

تقصد كتيب الضمان بتاع الصيانات ؟ تصدق انه عندي نضيف و مافيهوش قلم و ضماني خلص رغم اني غيرت حاجات كتير علي الضمان ؟ اكتشفت ان البتاع ده ليك انت بس و ان كل الصيانات اللي انت عملتها و ايه الي اتعمل فيها كمان متسجله عندهم علي قاعدة البيانات و ساعة الجد مش بيبص في الكتيب ده خالص انما بيبص عنده في قاعدة البيانات ... و عمر ما حد هناك قال لي وريهولي مره واحده مع اني مافوتش ولا صيانه ...
و علي أي حال أنا كنت مستلمه مع الكتالوج بتاع العربيه من المعرض ...
تحياتي لك ...