فيه حد غير قبل كدة طقم دبرياج للنيو النترا ؟

[top_10group]

اصل انا هغير الطقم وخايف العربية مترجعش زى الاول . المشكلة عندى بس فى صوت تزييق الدبرياج وقالولى فى التوكيل طالما الصوت بيتصلح ويرجع تانى تبقى محتاجة طقم فكنت عايز اعرف لما بيتغير طقم الدبرياج العربية بترجع تانى زى الزيرو ولا بيبقى فيه مشكلة
ارجو الافادة وشكرا

[top_10group]

ايه مفيش حد غير طقم دبرياج قبل كدة ولا ايه ؟

[bio_mz]

متابع يإهتمام

[MMamdouh]

انا معنديش النترا بس تغيير طقم الدبرياج مفيهوش مشاكل

MMamdouh

[dr.amr]

انا غيرتهو قبل كده كان معايا نيو النترا2007

وعادي جدا طالما ف التوكيل اتكل ع الله

[sound]

هو فيه حاجه مش واضحه بالنسبه ليا ..
يعنى ايه طقم الدبرياج يتغير بالكامل علشان فيه صوت تزييق .
معقول يتم تغيير ديسك واسطوانه وبلية دبرياج لهذا السبب فقط !!!!! (بصراحه ده حاجه مش معقوله )
شوف ياسيدى ..بالنسبه لصوت التزييق يمكن علاجه ببساطه عن طريق رش ذراع الدواسه من الداخل وسوستة الدبرياج باسبراى wd-40 وده اسبراى مانع للاحتكاك والصدأ وبيتباع بحوالى 20 جنيه عند اى محل اكسسوار .
لكن لو فيه ضعف فى سحب العربيه أى ارتفاع فى صوت المحرك مع الضغط على دواسة البنزين والغيار المضبوط وقلة العزم ,وربما ريحة شياط نتيجه لتاكل الاسطوانه فهنا يلزم تغيير الاسطوانه.
طب لو فيه مجرد ظهور صوت احتكاك معدنى مع الحركه فهذا يعنى وجوب تغيير بلية الدبرياج والكشف على الديسك.
أنصح بالذهاب لميكانيكى شاطر وأمين من خارج التوكييل وخليه يكشف على الدبرياج .
الموضوع بسيط ان شاء الله وكان عندى فى عربيتى الالنترا (مانيوال موديل 2010) واختفى نهائيا بعد استخدام اسبراى مانع الصدأ.
لو فعلا اتضح وجوب تغيير طقم الدبرياج بالكامل طبعا يفضل التوكيل.
وفى النهايه ارجو ان اكون قد افدت وتقيل تحياتى.

[top_10group]

متشكر جدا للجميع
بالنسبة للصوت دة من بره مش من جوة وهما فعلا شحمه البلية قبل كدة كذا مرة والصوت بيرجع تانى فالمشكلة دلوقت فى البلية وقالولى يفضل الطقم يتغير بالكامل عشان تبقى مرة واحدة وخلاص

[top_10group]

وعلى فكرة العربية لسة فى الضمان بس قالولى انا هتحمل تمن الاسطوانة 500 جنيه

[sound]

اخى الكريم ..

يبقى خلاص توكل على الله وقم بتغيير طقم الدبرياج بالكامل بس يفضل التوكيل فرع قليوب ناس محترمين احجز ميعاد وروح بدرى

ويفضل تشوف بنفسك على الطبيعه استبدال قطع الغيار المطلوبه (اسطوانه-بلية الدبرياج - ديسك)
والله ولى التوفيق.

[ENG\AHMED]

وعلى فكرة العربية لسة فى الضمان بس قالولى انا هتحمل تمن الاسطوانة 500 جنيه

حصلت مع واحد قريبى فى الانترا 2008 كانت عاملة 40000 كلم
العيب دة شائع فى الانترا مانيوال , المهم الاسطوانة والديسك والبلية كانوا خلصانين لما اتفكوا وكانوا عايزين يدفعوة تمن الطقم كامل بحجة انها عيب استخدام , فى الاخر مدفعش غير تمن الزيت فقط
اوعى تدفع حاجة لأن التوكيل بيستعبط وبيقول انها استخدام ولكن من منظر القطع اللى طالعة من العربية استحالة دة استخدام وبعدين استخدام اية اللى هيبوظها بعد 40000 كم

هم ملزمين بيها فى الضمان

[top_10group]

والله انا ماشى بالعربية دلوقت 25000 الف بس والمشكلة دى عندى من ال 10000 بس معتقدش انى مش هدفع لان ناس كتيرة قوى دفعوها فى الموضوع ده

[ENG\AHMED]

انا قولتلك اللى حصل وانت حر
مفيش دبرياج هيبوظ من 25000 حتى لو استخدام سئ والموضوع دة عيب فى الانترا
فى عربيات بتعدى ال 200000 والدبرياج من غير مشاكل

[dr.amr]

ايوه طبعا ياباشا علي حساب التوكيل
ده عيب معروف في الهيونداي
مجموعة الدبرياش بتنزل بايظه

[samirsaid1]

هو الضمان لهيونداى بيبقى مدتة كام كيلو أو مدته كام ولا حسب نوع السيارة

[top_10group]

طالما انتو بتقولو ان ده عيب فى هيونداى فى مجموعة الدبرياج معنى كدة لو غيرته هيبقى فيه مشكلة بردو ولا المشكلة دى هتتحل ودى بتبقى فى العربية بس وهى نازلة ؟