إعـــــــلان

Collapse

.

,
See more
See less

خبير هيونداي كوبيه يقدّم خدماته

Collapse
X
 
  • Filter
  • الوقت
  • Show
Clear All
new posts

  • خبير هيونداي كوبيه يقدّم خدماته

    انا مالك للكوبيه من سنة 2005 و النهاردة هية معايا عاملة 113000 كم و هدّيكم تقرير مفصّل بكل حاجة

    العربية أكثر من رائعة لو عايز كوبيه فعلا بتصميم مش بيقدم بمرور عمره و هتفضل تلفت الأنظار ليك في اي حتة تروحها طول ما العربية نضرفة و مرشوشة على طول

    انا مأمن على العربية و كل سنة بجدد لأن خوارج العربية غالية نوعا ما كما يلي مع ملاحظة ان كل حاجة من الإبرة للصارخ موجودة في التوكيل و لو مش موجودة هيجيبهالك برضه:

    فانوس يمين 1800
    فانوس شمال 1500
    بربريز قدام 1500
    زجاج جانبي 650
    إكصدام امامي 1450
    إكصدام خلفي 1000
    فانوس خلفي 800
    مقص امامي 850
    جلب مقصات امامية الواحدة ب125
    قاعدة موتور 350
    مساعد امامي 450
    مساعد خلفي 950
    جنط 720
    تيل امامي 700
    تيل خلفي 320
    فلتر بنزين 125
    فلتر هوا 22
    فاتر تكييف 200
    طقم السيور بالبليتين زي الإلنترا بالظبت و مش فاكر سعرههم
    علبة شكمان خلفية 2000
    بطاحات أمامية 620 (2) بطاحة
    بطاحتين خلفيتين 300
    ديسك و إسطوانة و بلية ب850

    طبعا انا مغيّرتش في الفترة دي كل ده لكن هقولك على اللي عملته فيها
    الفلتر بنزين مرتين عند 50 الف و عند ال100 الف كإجراء إحتياطي طبعا
    فلتر الهوا بغيره كل 10 الاف لأنه رخيص و بيفوّق العربية كل عشرة تلاف مع غيار الزيت الطبيعي و الفلتر
    فلتر التكييف مرتين برضه (نزاهة)
    جلبتين مقصات امامي لبعض التشققات ليس أكثر ب250 جنيه
    المساعدين مازالو بحالة الزيرو و زي الفل
    الإكصدامين الأمامي و الخلفي بسبب ولاد الحلال اللي بيخبطوا العربية و بيمشوا
    الفوانيس غيرتهم نزاهة برضه علشان احافظ على شكل العربية الزيرو و محتفظ بالقدام و همة بس متصنفرين من السفر على سرعات عالية
    التيل الأمامي غيّرته مرتين بس في عمر العربية و برضه قبل ما يخلص كإجراء إحتياطي
    التيل الخلفي مرة واحدة عند ال100 الف كنوع برضه من الحفاظ على نظام الفرامل
    طقم السيور و البلي بغيرهم كل 50 الف مش كل 60 زي التوكيل كنوع من العناية الفائقة
    الديسك و الإسطوانة غيرتهم على 95 الف و طلعت الإسطوانة سليمة تماما لكن سوست الديسك هية اللي نشفت علشان كده الدبرياج تقل شوية و أول ما لاحظت التقل ده غيرته على طول

    و العربية بحالة الزيرو من برة و من جوة طالما ايدي فيها على طول

    أتكلم شوية على العربية بقى.....

    العربية آخر مزاج في السواقة و ثبات مرعب طبعا لأن عفشتها سبور و ده سبب نشفانها المرعب برضه
    تعليق مستقل لكل عجلة على حدة
    ثبات رائع على طرق السفر (بسافر بيها شرم) و راحة في القعدة خرافية بسبب الوسع الرائع للراكبين قدام
    الشاسيه قوي جدا جدا جدا و مصمم علشان يستحمل موتر فئتها الأعلى ال2700 سي سي ستة سلندر و ده بيخلي العربية تقيلة و وزنها 1455 كجم
    التسارع أعلى من الإلنترا لأن الفتيس مانيوال رياضي و نقلاته سريعة
    كمبيوتر العربية بيدي متوسط السرعة و فاضل بنزين قد ايه و درجة الحرارة الخارجية و وقت القيادة و الرحلات ... كل حاجة يعني
    الصاج زي الداهية و العربية في متانة الألماني
    السبويلر بيثبّت العربية فوق ال120 و بتحسه اكتر على ال180 و ال200
    السرعة القصوى عند 6.5 ار بي إم 215
    كراسي جلد طبيعي و الطارة و الفتيس كمان
    فتح الشنطة كهربا مش سلك
    الإستبن (لسة منزلش) 16 مش صغير
    جنوط 16
    فتحة سقف بزرارين لكل الأوضاع
    مراية تعتيم ذاتي بزرار لوقف الخاصية
    التحكم في إضاءة التابلوه

    الفئة اللي معايا هية الإف إكس و بيميزها عن العادية التالي:
    التكيف تاتش مش بكر و خاصية فتح و غلق الهوايات اوتوماتيك حسب درجة التلوث برة العربية
    آيه بي أس العادية مفيهاش
    دواسات ستالس ستيل العادية دواسات عادية
    مساحة ورا التانية مفيهاش

    ارجو ان أكون أفدتكم و أي سؤال مش هتأخر ابدا

  • #2
    ما شاء الله
    ربنا يكرمك فيها ويديك خيرها كمان وكمان ويكفيك شرها
    سؤال صغير , حضرتك بتعمل الصيانة في التوكيل ولا مراكز الصيانة ؟
    وبالنسبة لاسنهلاك الوقود ؟

    Comment


    • #3
      المشاركة الأصلية كتبت بواسطة mr.aboody مشاهدة المشاركة
      ما شاء الله
      ربنا يكرمك فيها ويديك خيرها كمان وكمان ويكفيك شرها
      سؤال صغير , حضرتك بتعمل الصيانة في التوكيل ولا مراكز الصيانة ؟
      وبالنسبة لاسنهلاك الوقود ؟
      بشتري قطع الغيار من التوكيل في شارع دمشق (حبايبي همة بصراحة و عشرة عمر) و محبتش التوكيل خالص في الصيانة و بعمل شغلي كلّه عن ميكانيكي ورا البيت معرفة رائع و رخيص و عمري ما رجعتله بالعربية ابدا بعد ما يشتغل فيها

      استهلاك الوقود حسب سواقتك طبعا و خصوصا ان العربية مغرية للجري... ميزتها ان فيها تنك كبير 64 ليتر و بموّن مرة كل 10 تيام لما توصل للربع الآخراني

      الإستهلاك 9 ليتر لكل 100 كم تقريبا في المتوسط بالتكييف

      Comment


      • #4
        ربنا يباركلك فيها

        Comment


        • #5
          المشاركة الأصلية كتبت بواسطة ahmedsamir5edr مشاهدة المشاركة
          ربنا يباركلك فيها
          كلّك ذوق

          Comment


          • #6
            اخيرا
            فينك من زمااان نفسي الاقي حد اسألوا عليها


            انا عايز اعرف هيا موتورها زي موتور الفيرنا زي ما بسمع ولا ايه و الكنبة الخلفية ايه نظامها في الجلوس مريحة ولا لأ و مساحتها قد ابه ؟

            Comment


            • #7
              أخيرا ياراجل أخيرا لقيت حد معاه زي عربيتي و بيتكلم عنها هنا لأ و خبير كمان مش مصدق والله

              باشا أنا كان عندي مشكلة و عايز آخد رأيك بما إنك خبير كوبيه

              أنا كنت ركبت dvd عند أدريان و بعد ما ركبته لا حظت لآتي:

              -السنتر مبقاش يقفل لوحده لما أسيب العريية و مقفلهاش و أعتقد الموتور مبقاش يفصل برضه عشان السنتر بطل يقفل لوحده بس هتأكد
              -الحاجة التانية العربية بطلت تنور لما أقفلها بالريموت ( و دي حصلت بعد ماستلمت العربية من غبور كنت بعمل شغل في العفشة) لكن أما بفتح من الريموت بتنور عادي

              و معلش طولت عليك و هتعبك معايا بس أنا ماصدقت بصراحة لقيتك ده غير إني مش لاقي أي حد بيفهم فيها و غبور طفشني إني أصلح أي حاجة فيها

              و ألف شكر مقدما

              Comment


              • #8
                السلام عليكم
                تقريرك جميل
                و حببتني في العربيه جدا لدرجة إني بدأت أفكر فيها
                تابع مع الناس و فيه أكثر من موضوع هنا حاول ترد علي إستفتار الأعضاء
                بالتوفيق
                وَبَشِّرِ الصَّابِرِينَ الَّذِينَ إِذَا أَصَابَتْهُم مُّصِيبَةٌ قَالُواْ إِنَّا لِلّهِ وَإِنَّـا إِلَيْهِ رَاجِعُونْ

                Comment


                • #9
                  المشاركة الأصلية كتبت بواسطة marco14 مشاهدة المشاركة
                  اخيرا
                  فينك من زمااان نفسي الاقي حد اسألوا عليها


                  انا عايز اعرف هيا موتورها زي موتور الفيرنا زي ما بسمع ولا ايه و الكنبة الخلفية ايه نظامها في الجلوس مريحة ولا لأ و مساحتها قد ابه ؟
                  أنا جيت أهو هههههههههههههههه

                  هية فعلا موتور الفيرنا ال1600 لكن فتيس مختلف تماما يخيط أجدعها فيرنا ده غير الثبات طبعا اللذي لا يقارن بالمرة
                  الكنبة الخلفية بكل إختصار ... ملهاش أي تلاتين لازمة

                  Comment


                  • #10
                    المشاركة الأصلية كتبت بواسطة hamada409 مشاهدة المشاركة
                    أخيرا ياراجل أخيرا لقيت حد معاه زي عربيتي و بيتكلم عنها هنا لأ و خبير كمان مش مصدق والله

                    باشا أنا كان عندي مشكلة و عايز آخد رأيك بما إنك خبير كوبيه

                    أنا كنت ركبت dvd عند أدريان و بعد ما ركبته لا حظت لآتي:

                    -السنتر مبقاش يقفل لوحده لما أسيب العريية و مقفلهاش و أعتقد الموتور مبقاش يفصل برضه عشان السنتر بطل يقفل لوحده بس هتأكد
                    -الحاجة التانية العربية بطلت تنور لما أقفلها بالريموت ( و دي حصلت بعد ماستلمت العربية من غبور كنت بعمل شغل في العفشة) لكن أما بفتح من الريموت بتنور عادي

                    و معلش طولت عليك و هتعبك معايا بس أنا ماصدقت بصراحة لقيتك ده غير إني مش لاقي أي حد بيفهم فيها و غبور طفشني إني أصلح أي حاجة فيها

                    و ألف شكر مقدما
                    اهلا بيك يا زميل الكوبيه

                    العربية بطلت تنوّر بعد ما إستلمتها من غبّور ... الأغبيا كالعادة وقعوا الجلدة اللي جوة الكبّوت اللي بتدوس على زرار الإنذار اللي بيأمّن على قفلى الكبوت ... الموضوع بيتصلّح ب6 جنيه يا معلّم متقلقش... ألقطعة الأصلية عند توكيل شارع دمشق ب6 جنيه تقريبا

                    السنتر بتاعها اللي راكب فيها اساسا مش بيقفل لوحده اساسا...فلو هوّة اللي راكب فيها يبقى عادي جدا لكن لو أي سنتر تاني يبقى فيه كلام تاني

                    نصيحة جانبية: أدريان عكاكيبن جدا جدا جدا وبلاش تروحلهم خالص... لو لو انت ساكن في القاهرة ممكن أقولك على كل حاجة تعملها فين و سيبك من غبّور تماما توفيرا للنفقات و لوجع الدماغ و ضمان لمستوى خدمة أحسن بمراحل

                    و اي حاجة انا تحت أمرك

                    Comment


                    • #11
                      المشاركة الأصلية كتبت بواسطة hamada409 مشاهدة المشاركة
                      ( و دي حصلت بعد ماستلمت العربية من غبور كنت بعمل شغل في العفشة) و ألف شكر مقدما
                      ممكن بس تقولي أيه تفاصيل الشغل اللي في العفشة اللي عملته عندهم و عربيتك عاملة كام كيلو؟؟

                      Comment


                      • #12
                        ماشاء الله لا قوة الا بالله
                        ربنا يباركلك فيها ويديك خيرها يارب ويكفيك شرها


                        وسؤال بسيط لو سمحت لو حبيت اشترى عربية كوبية يكون سعرها كام
                        وايه احسن الموديلات فى سنه الصنع فيها

                        Comment


                        • #13
                          المشاركة الأصلية كتبت بواسطة linux1man مشاهدة المشاركة
                          ماشاء الله لا قوة الا بالله
                          ربنا يباركلك فيها ويديك خيرها يارب ويكفيك شرها


                          وسؤال بسيط لو سمحت لو حبيت اشترى عربية كوبية يكون سعرها كام
                          وايه احسن الموديلات فى سنه الصنع فيها
                          الكوبيهات من هيونداي في مصر موديلين 2005 و 2006 و لا فرق بينهم بتاتا
                          في منها نوعين واحد فيه تكيف تاتش+abs+مساحة خلفية و التاني بدون

                          السعر حسب الحالة من 60000 إلى 80000

                          و فيه موديل ليميتيد ببعض التغيرات الخارجية 2007 و مشكلته انه نادر جدا و قطع الغيار عند التوكيل بالطلب فقط و سعره بيكون من 80000 إلى 95000

                          و تحت أمرك

                          Comment


                          • #14
                            المشاركة الأصلية كتبت بواسطة dell2000 مشاهدة المشاركة
                            الكوبيهات من هيونداي في مصر موديلين 2005 و 2006 و لا فرق بينهم بتاتا
                            في منها نوعين واحد فيه تكيف تاتش+abs+مساحة خلفية و التاني بدون

                            السعر حسب الحالة من 60000 إلى 80000

                            و فيه موديل ليميتيد ببعض التغيرات الخارجية 2007 و مشكلته انه نادر جدا و قطع الغيار عند التوكيل بالطلب فقط و سعره بيكون من 80000 إلى 95000

                            و تحت أمرك

                            ربنا يباركلك فيها ياباشا
                            انا بفكر فى العربية دى بس اللي بيخلينى اتراجع موضوع الكنبة

                            طيب الليمتد ده اللى شكل الفوانيس مختلف فيه؟؟
                            طيب لو هو المواتير مختلفة؟؟
                            اسف للاطالة

                            Comment


                            • #15
                              شكرا على رد حضرتك السريع وفعلا بفكر اجيبها خصوصا انها شبابى اوى

                              واتمنى من حضرتك لو ترفعلنا صور

                              Comment

                              Working...
                              X