ليه كل مااقول لواحد عايز فيرنا يقولي اوعي؟

[shaddadfalcon1]

السلام عليكم معشر الهيونداي

دلوقتي اخوكم مهاه لانوس والحمد لله شغاله بس بيني وبينكم بذهق منها وخصوصا لما ابقي مسافر ببقي عايز اجري واتغاظ قوي لما ابقي ماشي 140 والاقي ميكروباص بيرعشلي عشان يعدي

المهم بقي فكرت اني اغير واجيب فيرنا والكل يقولي مش هتنفعك واللي يقولي انت بتجري ومش هتسلك معاك واللي يقولي خطر
واخرها النهارده كنت عند الميكانيكي وقالي مش هتستحملك والمكنه بتعتها لو سهيت عليها هتروح في داهيه ولازم تغيرها وساعتها جه واحد معرفه شغال مشاير وكده وكان معاه فيرنا وبيقولي انها كانت هتبيعه اللي وراه واللي قدامه وانها جابت مكنه 3 مرات في 6 شهور وحتي لما اشتري مكنه تانيه خالص برده باظت

هل دي حاله فرديه ولا فعلا موتور الفيرنا مش بيستحمل؟
بالنسبه للثبات والكلام ده كله فانا متاكد ان في طرق كتيير لمعاجته سواء تعديل فرامل او شداد او جنوط

ياريت الناس ترسيني وخصوصا الناس اللي متعوده عل الجري والحرق والبهدله

شكرا ليكم مقدما

[yoko]

حران تغير من لانوس لفرنا لإن الإتنين زي بعض فا هتغير يبقى تعلى
مشكله الفرنا من وجهة نظري عايزة واحد هادي وراسي لكن لو بتاع جري وخلاص يبقى حرام يركب العربيه دي عشان العمر مش بعزقة


وجهة نظري من غير ضرب يا ريت الي عاوز يقول كلامي كله غلط يقول بس من غير تخبيط

[elpasha1]

والله انا كمان عاوز اركب فيرنا وبردة كنت راكب لانوس
بس بصراحة انا كنت بجيب باللانوس لحد ال150 وكان ممكن ازود بس المشكلة انى كنت معلى العربية واهى اتباعت ودلوقت بدور على فيرنا بس لما سوقت الفيرنا مقدرتش ازود عن 130
العربية خفيفة خفيفة خفيفة

[kar!m]

الفيرنا عربية كويسة للمواطن المصرى .. اللى عاوز عربية قطع غيارها رخيصة و بتجرى و تكييف كويس عشان الحر اللى احنا فيه ده و ازاز كهربا و باور.

انما بره الناس بتدور على وسائل الأمان و الثبات و كده .. و الحاجات دى مش موجودة فى الفيرنا.

شوف انت متطلباتك ايه و قرر.

[=ISLAM=]

حران تغير من لانوس لفرنا لإن الإتنين زي بعض فا هتغير يبقى تعلى
مشكله الفرنا من وجهة نظري عايزة واحد هادي وراسي لكن لو بتاع جري وخلاص يبقى حرام يركب العربيه دي عشان العمر مش بعزقة


وجهة نظري من غير ضرب يا ريت الي عاوز يقول كلامي كله غلط يقول بس من غير تخبيط

+111222

[MIGOS]

بص يا باشا خدها حكمه من أخوك ما أجتمع قوم على باطل

[OmaR_FekrY]

يا فندم اسمحلى اقولك على رايى مع العلم انى مش معايا فيرنا ولا منحاز ليها باى شكل من الاشكال ... انا بس هقولك على اللى شايفه فيها

العربيه من ناحيه الثبات ..... وحشه
و من ناحيه خامات فى الصالون .... فقير نسبيا بس حلو
و من ناحيه الموتور ..... العربيه دى معروفه انها مبتقفش :) يعنى بتجرى بغباء بس انت و قلبك بقى انك تزود بيها عن ال 130 نظرا لثباتها المتواضع
من ناحيه الشكل الخارجى ... انا واحد من الناس اللى بحب شكلها الخارجى و بالذات لو فيها جنط محترم و بعض التعديلات البسيطه الشيك
و لو هتقارن بينها و بين اللانوس ... متهيألى مفيش فرق كبير بينهم ... ممكن حضرتك تزود شويه و تجيب الانترا
انا حاولت افيد حضرتك باللى لاحظته لما ركبتها و جربتها فى المشى و عموما اكيد الخبراء المحترمين فى قسم هيونداى هيفيدوك اكتر منى و بالتوفيق ان شاء الله :)

[osama_ruan]

بس معلومة للعلم بس ماتور الفيرنا هوة ماتور الماتركس وماتور الالنترا الشكل2006 وماتور الكوبية يعني ماظنش انو ماتور وحش بس للعلم

[yoko]

بس معلومة للعلم بس ماتور الفيرنا هوة ماتور الماتركس وماتور الالنترا الشكل2006 وماتور الكوبية يعني ماظنش انو ماتور وحش بس للعلم

هو حد قال إنه وحش؟

[beshomilan]

لما ابقي مسافر ببقي عايز اجري واتغاظ قوي لما ابقي ماشي 140 والاقي ميكروباص بيرعشلي عشان يعدي

هو حضرتك عايز تجرى بالعربية ليه على السرعات العالية دى؟؟؟هو الجرى بالعربية مهارة وشطارة زى ما ناس كتير فاكرة؟؟
فكر فى نفسك واسرتك وراعى ربنا فحياتك وفالنعمة اللى ادهالك وهى العربية
وربنا يوفقك للصح

[osama.m]

الفيرنا على السرعات العالية مش هتبقى متطمن فيها .. يعني احساسك بالانوس على ال 140 غير الفيرنا
عربية جراية بغباوة بس مش هتعرف توقفها .. انما لو جوة البلد هتبقى ممتازة
حاجة تانية .. اللانوس و الفيرنا نفس الفئة لو هتغير مش هتحس بفرق ولا حاجة !

[MIVEC.A92]

لأ فيرنا لأ لو خايف علي نفسك !

شوف ال Renault Sandearo اللون الأزرق الملوكي ... تحفة .

[shaddadfalcon1]

متشكر جدا لردودكم يعني اجماع علي ان الثبات بعد ال 100 اوحش من اللانوس
طيب بالنسبه لموضوع الموتور اللي بيروح في داهيه ومش بيتحمل زي اللانوس مثلا؟

موتور اللانوس بصراحه غبي وحمار شغل تحس انه ممكن يشتغل من غير زيت ولا مياه ولا حتي بنزين

والله انا فضلت اسبوع ماشي بمقاس الزيت مش في مكانه لحد ماالموتور مكنش فيه نقطة زيت ومفيش اي حاجه حصلت غير طقم كوتش صباب تقريبا لو فاكر الأسم صح
هل لو حاجه زي دي حصلت في الفيرنا الموتور هيستحمل؟
ده غير نقص المياه عادي جدا وياما مشيت من غير مياه في القربه وكذا مره سمعت ناس عربياتهم جابت وش سيلندر عشان المياه نقصت شويه

في انتظار ردود الخبراء

[mshmshm3]

هو حضرتك عايز تجرى بالعربية ليه على السرعات العالية دى؟؟؟هو الجرى بالعربية مهارة وشطارة زى ما ناس كتير فاكرة؟؟
فكر فى نفسك واسرتك وراعى ربنا فحياتك وفالنعمة اللى ادهالك وهى العربية
وربنا يوفقك للصح

احييك علي رأيك الجميل

[Screenplays]

الكلام اللي حضرتك سمعته الفتي المعتاد من الشعب المصري و العربيه معايا ثبات جيد لغايه 120 بعد كده بتبقي مرجيحه و الافضل تركيب جنط اسبور 15 و كاوتش عريض و هيخلي ثباتها جيد حتي 140 و بعد كده برضه هتبقي مرجيحه و فراملها غير جيده علي السرعات العاليه