كيفية شراء فيرنا من غبور ؟

[Neurovit]

السلام عليكم ورحمة الله وبركاته :
اولا احب ان اشكر الاخوة جميعا على ارائهم الموضوعية في كثير من الموضوعات حتى اصبح المنتدى مرجعية لي ولبعض اصدقائي عند الحديث عن السيارت .. ولي استسفسار
انا استخرت الله وتوكلت عليه ونويت اشتري سيارة فيرنا نص كماليات ( وده اخري مقدرش ازود تاني )
انا عايش ب دمياط واقرب توكيل ليا في بورسعيد (40 كم بيني وبين التوكيل )
وحجزت سيارة عن طريق عرض سعر وذكروا اني ممكن استلمها من عندهم او من المركز الرئيسي بابورواش وقدامي حوالي اسبوعين على ما شيك السيارة يطلع من البنك ....
فهل الافضل ليا
1- اني استلمها من بورسعيد (علما بانه لاتوجد لديهم سيارات-مجرد سيارتين تلاته بس - في بورسعيد: بيذهب مندوب (ومعرفش هايعمل ايه بيها طول الطريق ) يروح يجيب العربية تاني يوم استلام شيك السيارة ) ام استلمها من ابورواش واختار زي ما انا عاوز واسوق انا بيها 220 كم لحد دمياط ؟
2- وهل ضروري يكون معايا نمر تجارية مؤقته عشان اعرف امشي بيها ؟
3- وايه المفروض ابص عليه في عربية زيرو ؟ وايه اشغله واتاكد منه.
4- وايه اوراق سيارة او اوراق ضمانات استلمها منهم ؟
5- ايه مفروض اعمله وانا ماش بيها لحد دمياط (4 ساعات تقريبا )!
دي اول مرة استلم عربية زيرو واول مرة هارخص زيرو فارجو تفاصيل كاملة
وجزاكم الله خيرا

د علاء

.................................................. ....
العضو المحترم ممنوع الكتابة باللون الاحمر لإنه مخصص للإدارة
برجاء مراجعة قوانين المنتدى

الادارة - 3

[hazem_khidr]

اولا الف مبروك:)
ثانيا ممكن تجيب العربيه انت بنفسك اضمن علشان ما تضمنش المندوبين ممكن يقرصوا علي العربيه ازاي في الطريق.
بالنسبه للنمر التجريه فللامان خد معاك نمرتين
بس انا جيبت عربيتين من القاهره زيرو محدش كلمني \
عموما لو عاوز ما تاخدش نمر يبقي تمشي من القاهره علي 5 كده حتلاقي الطريق كويس و مفيش عليه اي قلق
لو حد سألك قوله لسه مستلمها حالا و حروح ارخص بكره و يدوب بنقلها مع ابتسامه حتلاقيه مهما كان غلس ما عملش حاجه.
طبعا قبل ما تستلم تلف حوالين العربيه تشوف فيها حكه او خبطه او لون مغير و لو لقيت حاجه كده ما تستلمش
تشغل التكييف و الاشرات و الاضواء و الزجاج الكهربا و السنتر و كل كهربه العربيه تتكد منها.
لما تيجي ممكن تاخد الطريق كله مره واحده بس يستحسن فينص الطريق تقف تريح في اي كافيتريا نص ساعه و لا حاجه علشان ارهاقك و علشان العربيه
و الف مبروك مره تانيه:)

[Neurovit]

جزاكم الله خيرا

الف شكر اخ حازم ..وبافكر جديا فعلا اني اروح المركز الرئيسي
واسف اني كتبت باللون الاحمر (مكنتش اعرف;) )

[Salah_sr]

أولا مبروك و ثانيا لاتمشي فترة طويلة علي سرعة واحدة أما أقصي سرعة في التلين لازم تقرأ الكتالوج لأن كل عربية لها تلين غير الأخري و لكن أنا لسه جايب جيتز لزوجتي و كان التلين علي 80 و عدم المشي فترة طويلة علي سرعة ثابتة و لكن الألنترا أعتقد كانت السرعة أعلي بس مش فاكر و طبعا يستحسن تجيب نمر معاك من دمياط أو بورسعيد و لكن قبل أن تأجر النمر تأكد إن غبور ملتزم بالميعاد بتاع التسليم و ألف مبروك مرة أخري (و طبعا السفر ساعة خامسة ممتاز علشان حرارة الجو كمان )

[Nile_Storm]

الاخ نيوروفيت
اولا اهلا بيك في المنتدي هنا خصوصا اننا شكلنا زمايل خمنت كده من الاسم :)
ثانيا هتلاقي مضوع مثبت عن الفيرنا ان شاء الله يعجبك و يجاوبك علي كل اسئلتك
وعلي فكره انا عندي فيرنا هاف اوبشن برضه ممتازه و ان شاء الله تعجبك وربنا يباركلك فيها و مبروك مقدما :)

[som3aa]

الف مبروك على العربية اولا
يستحسن تستلم من ابو رواش لان انا شفتهم بينقلوا عربية من ابو رواش لمصر الجديدة و الشواق كان مشغل النكييف و الكاسيت و ماشى على سرعة عالية و كمان كان بيهزر مع جد قام دايس جامد على الفرامل الكلام دا انا شفته بعينى تخيل و انت مش شابف و على طريق سريع؟

2- وهل ضروري يكون معايا نمر تجارية مؤقته عشان اعرف امشي بيها

يستحسن بس اللى اعرفه ان لو معاك ورق العربية و نفس يوم الاستلام مسمحلك تسوقها منغير نمر (بس مش متاكد الصراحة) بس يوم مستلمت العربية كمين وقفنى وريته الورق قالى لسه مستلمها النهارده قلتله اه قالى طيب انت كده فى السليم و مبروك و مشيت عادى بس برده يستحسن يبقى معاك نمر.

3- وايه المفروض ابص عليه في عربية زيرو ؟ وايه اشغله واتاكد منه.

مع غبور اتاكد من كل حاجة مفيش خرابيش مفيش اصوات غريبة فى العربية, التكييف شغال و الكاسيت و جرب الراديو و شوف فى اى خبطات او اى حاجة فى العربية من بره او من جوه , الكراسى متثبتة كويس و لا بتعمل صوت , جرب ازاز الكهرباء و المرايات الكهرباء و انوار العربية و الستبن موجود و اتاكد فى فرامل ولا لأ(بهزر طبعا):d
و كبعا تاخد الضمان و ضمان الكاسيت و ورقة الاستلام و خطاب المرور (اتاكد من بيناته مطابقة للعربية اللى انت مستلمها).

5- ايه مفروض اعمله وانا ماش بيها لحد دمياط (4 ساعات تقريبا )!

متمشيش بسرعة عالية بس كده و متفتحش التكييف و فعلا يا ريت تريحها فى الطريق (لو فى ريست و لا حاجة)

[zakiali]

اولا مبروك عليك وإن شاء الله هتعجبك ياتري جبت لون ايه ؟ عموما

لازم لازم لازم تروح تسلمها بنفسك زي ما الزملاء قالوا وبعد كده تشيك علي كل حاجه فيها ولو لقيت خربوش واحد في اي حته متستلمهاش .. الأهم انك تزبط ضغط العجل عند اي حد عشان عندي مكنش مزبط . ويفضل في التليين متزودش عن 88 كم زي ما الكاتالوج بيقول وكمان متشغلش التكييف خالص مهما الدنيا كانت حر خصوصا انه مغري وبيتلج في عز الظهر ويا سلام لو كانت معاك كانز ببسي مثلج .. تبقي عاوز تجيب بطانيه وتنام في العربيه .. الورق بتاع العربيه في المرور بيخلص في يوم واحد بس لازم تروح من النجمه عشان تكمل الملف وتشتري الطفايه وتدفع التأمين وتزبط بتاع الفحص الفني وتركب النمر وترفع رقم الشاسيه والموتور ويستحسن تعمل التأمين 3 سنوات عشان مش كل شويه تروح وربنا يباركلك فيها ويبعد عنك الحاقدين ابقي اشتريلها غطا عشان عين اللي جاي واللي رايح ومسامير العيال الحاقده ومخالب الكلاب بليل واول ما تمشي بيها شغل شريط قران كده عشان ربنا يباركلك فيها .. بلاش نجوم اف ام دلوقتي :D

[Neurovit]

جزاكم الله خيرا على الردود كلها وحاسس اني كده معايا خريطة ازاي اشوف وازي امشي بيها لحد ما اوصل ان شاء الله
سؤال بسيط ...هو لازم اتصل ب ابورواش واعرفهم اني جاي استلم عربية ؟ ولا لازم اتصل بيهم مسبقا . ولو هاتصل ...بمين ؟

[Neurovit]

ألوان الفيرنا ؟

هل جميع الالوان متاحة في الهاف اوبشن ؟ ام لها الوان محدودة وحسب كماليات السيارة بيتاح الوان اكتر ؟

[M_HaFeZ]

سؤال يارجاله : النمر التجاريه دى بتتعلق فى اى الحالات ؟

[Nile_Storm]

الهاف اوبشنفيها كل الالوان زي الفل ابشن


اما موضوع النمر التجاريه فدي بتعلقها لغايه اما ترخص و الله اعلم

[smsmbakr]

لازم تركب نمر تجارية علشان تبقى في الامان

[timo_crosswind]

الف مبروك ربنا يديك خيرها ويكفيك شرها
بالنسبه لموضوع النمر التجاريه نصيحه مني ركبها علي الاقل لحد ماتوصل محافظتك
اللي حاصل معايا وانا جايب عربيتي في كمين في طريق القاهره الاسماعيليه الصحراوي وقفوني وعملو ليا مخالفه علي رخصه القياده ....لان في ناس في قمه قله الزوق
وللعلم ذوقيا المفروض يسبك وقولك مبروك لكن قانونا انت ماشية ازاي من غير تمر دي قضيه
مهما كان الوضع.....لو عاوز سفر مرتاح وامن دون مشاكل اجر نمره تجاريه لحد ماتوصل
والف مبروك مره تانيه