رابطة ملاك وعشاق الالنترا 2005-2006 الشكل القديم

[motoxp]

ارجو من كل واحد معاه الالنترا الشكل القديم الانضمام و نتفاعل مع بعض ونشرح المشاكل او اى تضبيط وتجديد و اسعار قطع غيار وحتى نكون مرجع لاى شخص يريد شراء هذا الموديل وشكرا

هبدا بنفسى النترا 2006 كحلى اوتو تكييف تاتش اعلى فئة وكيل عداد 85.000 الف .

[Hussein_Ramdan]

انا مش عارف بما انى امتلك الشكل الجديد
لكن انا من الناس العاشقة للشكل القديم وكان نفسى فيها لكن الظروف ماكنتتش تسمح
ولغاية دلوقتى هى ثابتة نفسها وبشكلها الفخم والجميل

[أحمد الجندى]

بحب وبحترم العربية دى جدا ياريت لو اصحاب العربية يقولولنا عن خبراتهم ومميزات العربية وعيوبها وكل حاجة عنها

[M.Mostafa80]

اخوكم محمد مصطفى عضو سابق بفولكس وعضو مستجد بهيونداى
معايا النترا 2006 وكيل تكييف تتش اوتو وسنسور بارك
ملاحظ ان ملاك الموديل دا هنا قليلين جدا
عندى مشكلتين
هما
استهلاك البنزين جوا البلد عالى قوى بتعمل 130 كم فى الصفيحه
وبرا البلد بالكتير 200 كم
المشكله التانيه بقالى فتره دايخ على الكرتيره الخلفى شمال ومش لاقيها خالص هى ودافر التراب

[motoxp]

1/ممكن اسأل حضرتك سؤال حضرتك عنك سى دى تشانجر فى الشنطة ولا ايه ؟
اصل انا عربيتى منغيره و كمان من غير حساس خلفى و الراجل قالى الوكيل نزل دفعة كده بصراحة هما مش فارقين معايا بس عايز اعرف ؟
2/بالنسبة لاستهلاك البنزين عندى كويس هو كان وحش جدا بس بعد السرفيس اضبط خالص
3/حاول تغير فلتر البنزين و البوجيهات و تنظف الفلتر الهواء او تغيره وتنظف الانجيكشن و ان شاء الله تضبط معاك
4/الكرتيره ممكن فى التوفيقية عند ابراهيم البنا
5/ ايه الفرق بين الوكيل و الخليجى لو تعرف ؟

[M.Mostafa80]

1/ممكن اسأل حضرتك سؤال حضرتك عنك سى دى تشانجر فى الشنطة ولا ايه ؟لا بدون سى دى تشينجر
اصل انا عربيتى منغيره و كمان من غير حساس خلفى و الراجل قالى الوكيل نزل دفعة كده بصراحة هما مش فارقين معايا بس عايز اعرف ؟انا اللى مركب الحساسات
2/بالنسبة لاستهلاك البنزين عندى كويس هو كان وحش جدا بس بعد السرفيس اضبط خالص
انا عامل السيرفيس كامل
3/حاول تغير فلتر البنزين و البوجيهات و تنظف الفلتر الهواء او تغيره وتنظف الانجيكشن و ان شاء الله تضبط معاك كل دول لسه مغيرهم واصلى
4/الكرتيره ممكن فى التوفيقية عند ابراهيم البنا
سألت عنده ملقتهاش وفى التوكيل وعند الجندى وعند ناس كتير جدا الظاهر مش هلاقيها غير استيراد
5/ ايه الفرق بين الوكيل و الخليجى لو تعرف ؟

الفرق فى دوره التبريد والشبكه الأماميه والأستوب لايت الخلفى وتكييف العربيه بيبقى اقوى والعزل بيبقى افضل عشان الحراره

[BraveHeart_13]

عن تجربة شخصية – أنا كان معايا إلانترا 2005 كاملة أوتوماتيك بس بعتها خلاص ولكن للأمانة كانت عربية جميلة جدا - وأنا هحكى تجربتى معاها عشان الإستفادة العامة لكل أحبائى من أعضاء المنتدى – وأعتقد ان العضو moxtop هيفتكرنى وبالمناسبة أنا برسله أحلى تحية لأنه عضو محترم جدا كما باقى الأعضاء جميعا – والحكاية بدأت لما الفتيس الأوتوماتيك بتاعها حياته انتهت فجأة وأنا فى منطقة نائية ، وبعد ما اتصلت بالتوكيل وقالولى هاتها عشان نصلح الفتيس ، رفعتها على ونش ووديتها أبو رواش وهناك قالولى هنشوف فيه إيه وهنتصل بيك بكرة – وتانى يوم المهندس كلمنى وقاللى للأسف مش هنعرف نصلحه ولازم تركب واحد جديد وسعره 25 ألف جنيه !!!
وطبعا حاولت معاه إنهم يصلحوه حتى لو كتبتله إقرار إن تصليحه على مسئوليتى الشخصية ولكنهم رفضوا وقالوا ماينفعش ولازم واحد جديد عشان سمعة الوكيل !!!
الأغرب إنه ماكانش قدامى إختيارات – يا إما أدفع 25 ألف عشان الفتيس فى عربية تساوى بالكتير أوى 75 ألف يا إما أشيلها على ونش تانى وآخدها برة التوكيل ومالهومش دعوة.
وفعلا شيلتها على ونش تانى وحطولى الفتيس القديم متفكك حتت بالزيت بتاعه فى شنطة العربية بمنتهى الإهمال مع فاتورة بـ 660 جنيه تمن فك الفتيس!! وكمان اكتشفت إن العربية اتسرق منها حاجات قيمة كانت موجودة فى تابلوه العربية ولما اشتكيت قالولى إنهم معلقين يافطة فى مدخل التوكيل بعدم مسئولية التوكيل عن محتويات السيارة !!!
وطبعا عشان غبور محتكر قطع غياره إضطريت أشترى فتيس استيراد من الحرفيين من محل (الدوينى) لصاحبه "حمادة الدوينى" سامحه الله ، لأنى عرفت بعد كدة ان التاجر ده بيجيب قطع غيار خردة من الوكالة ويبيعها فى الحرفيين على إنها إستيراد - والميكانيكى بعد ما ركبه إكتشف إنه فتيس خردة مش إستيراد وتالف تماما ولما اتصلت بالدوينى قاللى هات العربية عندى فى الحرفيين على ونش لتالت مرة ونغيره بواحد تانى وبعد ما وديتها مالقيتوش وقعد يحدفنى بالتليفون من تاجر لتاجر وبعدين قاللى فك الفتيس وهاته وخد فلوسه وهو دة اللى ليك عندى! بعد ما كان واعدنى ساعة الشراء إنه هيتحمل الفك والتركيب والنقل لو الفتيس فيه أدنى مشكلة وأنا ماتضايقتش من إنه رجع فى كلامه قد ما اتضايقت من أسلوب الكلام اللى أسوأ من أسلوب الحوارى بشوية وأخيرا لقيت فتيس تانى بـ 1800 جنيه وركبته واشتغل كويس بعد ما صرفت إجمالى 4300 جنيه ( تمن الفتيس + 3 أوناش + 3 مرات تغيير زيت أوتوماتيك + مصنعية توكيل + مصنعية ميكانيكى فك وتركيب مرتين + تاكسيات + نثريات أخرى).
للتنويه: الفتيس مش هو أول حاجة جبتها للعربية – قبل كدة كان فى ( مجموعة سيور وبلى وفلاتر 2000 ج – طرمبة بنزين 1300 ج – رشاشات 3000 ج – عمرة موتور كاملة 8000 ج ) ودى أسعار قطع الغيار فقط من التوكيل بدون التركيب.
ملحوظة: أنا اكتشفت بالصدفة صدق كلام الميكانيكى لما قاللى إن الدوينى بتاع الحرفيين بيجيب قطع الغيار خردة من الوكالة وبيبيعها فى محله فى الحرفيين على إنها إستيراد لأنى شوفته بنفسى بيحمل قطع الغيار الخردة على عربيات سوزوكى من الوكالة وعرفت إنه بيروح يجيب الخردة دى كل يوم إثنين من كل أسبوع.
وأنا هنا حكيت تجربتى للإستفادة وعشان غيرى مايقعش فى نفس المقلب اللى أنا شربته وأرجو إن الأعضاء يوضحولنا برده أى تجارب ليهم مع التجار المحترمين عشان الكل يستفيد ويقدروا يعرفوا بسهولة ممكن يشتروا من مين ويبعدوا عن مين.

[BraveHeart_13]

تصحيح: تحياتى للعضو Motoxp - معلش الحروف إتلخبطت وأنا بكتبها فى الرد السابق

[bo2loz898]

عايز اسعار المساعدين للالنترا 2005 ؟ و اجيب الاصلي احسن و لا kyp ؟
و عايز اغير تيل الفرامل و بفكر اجيب EBC ايه الكلام ؟

[motoxp]

التيل ebc green staff ب 600 جنيه
والطنابير 1400 جنيه امامى مفرغة drilled and slotted
المساعدين تقريبا الواحد ب 1000 الاصلى
افضل مساعد هات تقريبا المونورو

[bo2loz898]

مشكوووووووور يا باشا علي الاهتمام

[bo2loz898]

مش عارف عندي مشكلة لما بدور العربية تانية و انا لسه مبطل و هي ساخنة مش بتلقط علي طوووول زي و هي باردة بتفضل تقطع ك>ا مرة و بعدين تلقط مع العلم ان البطارية لسه جديدة و حالتها ممتازة الحمد
العربية النترا 2005

[bo2loz898]

انا سئلت علي المساعدين الاصلي في التوكيل الطقم كامل 4 مساعدين عامل 2000 و 200 ضريبة يعني 2200