تقرير بالصورعن سيارتي النترا (أفانتي) 2011 / gdi - m16

[propagaanda]

السلام عيكم يا هيونداوية يا جامدين قوي .....
بعد سؤال كل الأعضاء الكرام بالأخص الاستاذ Hossam99 عن سيارتي الأفانتي m16 - GDI قبل شراءها
أحب اقدملكم تقرير شامل و مفصل عنها بناءا على رغبات الهيونداوية الأعزاء
ملحوظة صغيرة: السيارة بالكامل صنعت في كوريا (حتى طقم الدواسات) كتالوجها بالكوري حتى البيانات اللي على قايم الباب بالكوري ما أقصده انها بالمواصفات الكورية و ليست مصنعة للاستيراد بتاتا
العربية عاملة معايا 600 كيلو و بجد محترم ادائها جدا في كل حاجة


بسم الله نبدأ ......
السيارة هيونداي النترا (أفانتي) - موديل 2011 فضي 1600cc - GDI




المحرك: من نوع GDI (Gasoline direct injection)
140 حصان
خلينا نحكي يعني اي جي دي اي ..... فكرته بسيطة جدا عبارة عن طلمبة بنزين ميكنيكية شغالة عالتاكيهات و 4 بخاخات بتصب البنزين مباشرة في غرفة الاحتراق (ده بيزود القوة و يوفر في الوقود و تكاليف الصيانة لأن مفيش مانيفولد ولا مسطرة رشاشات ولا حساسات كتير بسيط بس عملي)
و سير الكاتينة جنزير زي الانترا بتاعة غبور
تقييمي : غبور ضحك على كل واحد جاب النترا من غير GDI
العربية ماشية على 150كم/س .... على 3 ار بي ام
السحب عالي جدا ... الصوت مش مسموع غير في السرعات العالية
من الاخر الموتور ده ثورة فعلا !!!!
ده شكله


و ده لما شلت الكفر ,,,, هتلاقوا الموضوع مختلف عن ال DOHC ., وكمان هتلاقو طرمبة البزين اللي بتلمع دي فوق الكامة اللي جوه






خلصنا المحرك .... ندخل عالفتيس
الفتيس 6 سرعات ستبترونيك حقيقة محترم جدا و مريح العربية أوي و الستبترونيك بتاعه كويس بس مش بحتاجله كتير الأوتوماتيك مريحني الصراحة

استهلاك البنزين لسه محسبتوش بس محسيتش انه كبير لما جربتها

نجي للشكل الخارجي.....
العربية شكلا مش هتكلم كتير عنه بس فعلا هيونداي خربت الدنيا يا النترا و RB , veloster

دي اسم الأفانتي و بعدها علامة الGDI



واضحة الكاميرا في الصورة هي و الحساسات أصليين ....





مرايات اشارات بنواكل جاية معاها .....




وكل النواكل بتاعتها محفور عليها AVANTE



جنوط 16 بوصة (فرامل ABS+EBD)....






سامحوني مالحقتش اصور كل تفاصيل العربية من برة عشان المغرب اذن عليا

العفشة بقى ....
انعم بكتير من السيراتو نفس نعومة الكورولا و ايضا بفضل الجنوط ال 16
الثبات جيد جدا بفضل قاعدة العجلات المهولة دي
الفرامل ممتازة و ABS شغال بجدارة و عن تجربة صوته بان مرة معايا لما زحفت عشان اجربه
الايروديناميكس بتاعتها جيدة جدا مش سامع صوت الهوا خالص

نيجي بقى للشكل الداخلي....
العربية فخمة و واسعة بمعنى الكلمة و خصوصا الكنبة الخلفية ... أماكن تخزين كتير جدا تقفيل أكتر من رائع العزل ممتاز شكل التابلوه خيالي .... الكماليات غزيرة الصراحة
الكراسي مريحة مع امكانية ضبط الارتفاع

المفتاح سكينة بانذار و فتح الشنطة ....



الكماليات كالتالي ....

تكييف تتش أوتو 2 زون + ionizer
+ سخانات كراسي
التكييف تلاجة و في عز الحر جايب المروحة على اول درجة (المروحة 8 سرعات) و درجة الحرارة دايما مش بقللها عن 22 ... لكن التكييف محترم و الdual zone بتاعه جربته فعلا 2 زون بجد
و لو مستعجل دوس أوتو و سيب التكييف يدلعك لوحده


سي دي 6 اسطوانات بتحكم من الطارة
ب 6 سماعات و صوت جيد جدا و التحكم من الطارة في كل حاجة فيه
بلوتوث كامل صوته واضح و مزود ب Mute



أوتوماتيك 6 سرعات
العدادات شكلها صراحة جميل و بتنور أول مابتدور العربية مع كلمة WELCOME
بحس انه طيارة
مع كمبيوتر رحلات كامل مكمل


كاميرا خلفية على شاشة التابلوه مع المارشدير
حساسات خلفية على شاشة العدادات
الميزة دي بقى عندي بالدنيا لأن ظهر العربية عالي قوي مش بشوف حاجة من القزاز .... بجد الكاميرا واضحة و الشاشة متقسمة و بتشتغل مع الحساسات أوتوماتيك اول ماتجيب ال R
حتى لو قافل الساوند سيستم




ساوند سيستم كامل DVD - MP3 cd changer 6 CDs
USB w AUX w IPOD
مفيهوش GPS للأسف




4 زجاج كهرباء

مرايات كهرباء



مرايات ضم



فتحة سقف موضح مايك البلوتوث في السقف مع جراب نظارة



ECO drive system



10 ايرباج



و طبعا السائق و الراكب الامامي

انوار أوتوماتيك

كراسي جلد أسود طبيعي



جنوط 16
ABS-EBD
فوانيس شبورة




وده مصدر كهرباء للراكب الأمامي



خلاصة الكلام ان السيارة فعلا تستحق كل الاحترام ... و اللي يقول انها هي هي السيراتو يبقى ماركبهاش ولا ركب سيراتو
تقييمي النهائي:
المحرك قوي GDI ده محرك تاني خالص غير ال DOHC
(انا جبت 180كم/س ار بي ام و كنت خايف بس هي كانت عايزة تقفل الأمبير)
العفشة ناعمة بس
الثبات معقول بعد 180كم/س خلي بالك من مطبات الهواء لكن برضو مش هتضر أوي
التكييف ممتاز لايؤثر على السحب (كمان بيفصل بسرعة)
العربية واسعة و عريضة خصوصا من ورا
الشنطة واسعة بس مش أوي
تستطيع التنافس بكل سهولة مع المازدا و الانسر و الكورولا و السيراتو و السيفيك بجدارة
الرؤية الأمامية كبيرة جدا لكن الخلفية وحشة
الكبوت صغير أوي أوي ... و ده هايضايق في الصيانة بس ربنا ساخط في الكبوت و نافخ في الزجاج كبير جدا ما شاء الله

ده كان تقريري عن السيارة بتمنى منكم الدعاء ربنا يكفينا شرها و يدينا خيرها
Dr,Ahmed

[zangry]

الف مبروك وربنا يباركلك فيها ويكفيك شرها ويديك خيرها

[motoxp]

ممتازة ربنا يباركلك فيها و يكفيك شرها والف مبروك

[Ghosts]

ألف مبروك و ربنا يكفيك شر ولاد ...... الحلال اللى ماليين الشوارع اليومين دول .

[HOSSAM99]

و عليكم السلام و رحمة الله
ألف مبروك و لا شكر علي واجب
و أنا فرحان لحضرتك جدا
لكن لي طلب عليك بأذكار الصباح و دعاء السفر و الرقيه الشرعيه و قراءة القرآن

{... فَاللّهُ خَيْرٌ حَافِظاً وَهُوَ أَرْحَمُ الرَّاحِمِينَ }يوسف64

بسم الله ما شاء الله لاقوة إلا بالله

[ahmedmohamed7]

ما شاء الله ولا حول ولاقوة الا بالله ):)
جميلة جدا جدا ما شاء الله :) ربنا يبارك لحضرتك فيها :)

[PoweRPassioN]

ألف مبروك وربنا يبارك لك فيها ويديك خيرها ويكفيك شرها
مواصفات زي الفل ما شاء الله

بس ما قولتش منين وبكام ؟؟

[TAMERHASSAN]

ما شاء الله عليها ربنا يباركلك فيها و يكفيك شرها والف مبروك

[freeman207]

الف الف مبروك ربنا يديك خيرها ويكفيك شرها

[MNabeih]

لأ بجد ما شاء الله لا قوة الا بالله, ربنا يديك خيرها و يكفيك شرها
سؤال بقي لو سمحت, بكام؟؟

[Mohammed]

1000 مبروك

1000 مبروك يا دكتور .. ربنا يبارك فيك وفي العربية ويحفظك ويحفظها ان شاء الله ..

العربية رائعة فعلا .. بس أنا عندي استفسار صغير ..

بصرف النظر عن سياسات غبور .. أنا أعتقد إن الموتور ال GDI بيعتمد على نسبة انضغاط أعلى.. 11.5 لتوليد ال 138 هورس بور دول وده بيحتاج بنزين فيه نسبة أكتان أعلى .. 97 RON والله أعلم.

وعشان كده الموتور الD-CVVT ممكن يكون الاصلح لل Europe & Mideast وبيحتاج بنزين unleaded أو إن ال92 ممكن يشغله تمام.

يا ريت لو حد ممكن يؤكد المعلومة ويفيدنا جميعا وعشان حضرتك كمان تحافظ على موتور عربيتك وربنا يبارك وألف مبروك مرة تانية.

تحياتي
محمدابراهيم

[M_Marwan]

ما شاء الله جميله

هيا ال gdi ديه هيا الخليجى ؟؟ وكام سعرها ؟؟

[eng/muhamad]

1- اشتريتها منين ؟
2- السعر كام
3- الالوان المتاحة ايه ؟
4- فى كماليات اعلى من كده و لا لا ؟

[memo823000]

ماشاء الله لاقوة الا بالله الف مبروك وربنا يباركلك فيها
بصراحه انا مشعارف هيونداى هتروح لحد فين
عايزين تفاصيل المعرض - عنوان - تليفون - اسعار ومواصفات العربيات عنده

عندى استفسار - هو التكييف ال two زون يعنى المفروض فيه فتحتين قدام الكنبه اللى ورا وليها زراير لوحدها وياريت صور؟؟؟

[dr_darsh]

ربنا يديلك خيرها ويكفيك شرها