بدايه مشواري مع الماتريكس ...............

[liquidator]

بسم الله الرحمن الرحيم ...توكلت علي الله ...كانت اول كلاماتي عندما استلمت مفتاح عربيتي الجديده ماتريكس 2008 التركي

بس قبل ماتكلم عنها اسمحولي اوجه شكر كبير لاخويا وصديقي احمد عبدالله (liquidator)لان من اول مافكرت في العربيه دي وطرحت اسئلتي عنها في احدي المواضيع الخاصه بالماتريكس متاخرش ورد علي كل اسئلتي بمنتهي الامانه وكان معايا خطوه بخطوه واتقابلنا في مصر واداني العربيه اسوقها وجربها كي يطمئن قلبي اكثر ...ومتاخرش عليا في اي مساعده وكان اخر مره اتقابلنا في فيها يوم استلام عربيتي وكان بيشوف العربيه معايا في الاستلام كانه فعلا بيستلم العربيه لنفسه
وقضينا مع بعض يوم جميل جدا.
اجمل حاجه في عربيتي انها عرفتني بشخصيه جميله زي شخصيه احمد عبد الله وربنا يديم المعروف..........

بالنسبه لعربيتي:
ماتريكس تركي مانيوال-لونها اسود
استلامتها يوم الجمعه (23-5-2008)
من فرع غبور اللي في طريق صلاح سالم واستلمت العربيه بعد حجزها ب 3 ايام فقط

اسباب شرائي للماتريكس:
1.عربيه واسعه بشكل ملحوظ وكنت محتاج الميزه دي عشان عائلتي
2.بسافر كتير جدا يعني كنت محتاج موتور 1600
3.تعدد اماكن التخزين
4.وضعيه قياده مريحه ليا وفي نفس الوقت عاوز اللي يركب معايا يكون مرتاح وخصوصا في السفر الطويل
5.سياره اعاده بيعها جيد وسهل
6.قطع غيار وصيانه مش مكلفه بدرجه كبيره
7.فيها جميع الكماليات اللي انا محتاجها
8.تصممها الداخلي والخارجي كان عجبني اوي

الاشياء اللي استلمتها مع العربيه:
(الكوريك-الاستبن-الولاعه-الاريل-كتالوج السياره-كتالوج السي دي-شنطه العده بس انا مستغرب اني مفيهاش غير مفك ووصله الكوريك ومفتاح العجل بس-اتنين مفتاح واتنين ريموت لونهم اسود)
ياريت ياجماعه لو حد لسه مستلم ماتريكس يقولي انا نسيت حاجه ولا لا او في اي حاجه مختلفه عن اللي انا استلمته
علي فكره وانا بستلم قلولي هستلم الضمان مع صيانه الالف.

انطباعي عن العربيه:
انا استلمت العربيه عامله 40 كم بصراحه انا مش سوقتها غير 20 كم ودي تقريبا المسافه من غبور للمطار وبعد كدا ركنتها في المطار وسافرت ..يعني ملحتش اقيمها تقيم فني ولا احتي اعلق نمر....
بس بصراحه اول مركبتها ارتحت اوي وحسيت ان دي العربيه اللي هتكمل معايا المشوار.وضعيه القياده فيها جميل جدا وممتع وخصوصا ارتفاع المقاعد وجود العدادات في المنتصف مدي مستوي رؤيا جيد كبر حجم الزجاج والمرايات الجانبيه كان مديني احساس اني شايف كل حاجه ومالك الطريق وكمان بتدي احساس بالثقه والمتعه في القياده الخروج والدخول للسياره سهل جدا ومريح.... بصراحه حسيت ان دي العربيه المناسبه ليا.

بالنسبه للعيوب اكيد ملحقتش افتش عن العيوب بس بصراحه الشي اللي لاحظته التقفيل التركي اقصي تقدير له مقبول مش اكتر من كدا وده بالنسبه ايضا الخامات الداخليه اقصي تقدير لها جيد مش اكتر من كدا بس فعلا مفيش حد بياخد كل حاجه .

الفروق الملحوظه بين الماتريكس التركي عن الكوري:
التركي:فيها لمبات اضائه بين الشمستين الي في الامام مقسمه الي جزئين جزئ للسائق وجزئ للراكب الامامي-جراب نضاره -وجود رف خلفي في صندوق الامتعه_الراديو سي دي(لونه اسود ماركه هيونداي وبيه وصله usb )-الريموت منفصل عن المفتاح-المصابيح الاماميه مقسمه الي جزئين من الاضائه-نوع الاطار في التركي برللي-لايوجد مخرج كهربائي في الشنطه(power out let)-المريات الجانبيه اكبر من الكوري.

كدا ابقي انضميت للمتريكساويه ادعولي ربنا يباركلي فيها ....
وإن شاء الله لما ارجع من شغلي واسوقها هدي انطبعاتي عنها اول باول بنتهي الامانه والحياديه وشكرا لكل من ساهم برائ او نصيحه:)

ألف مبروك عليك يا سيدي و خللي بالك منها بقي ...
بس ايه الكلام الجميل ده ... والله ده كتير عليا .. و بعدين أنا حاسس اني ماتعبتش في حاجه عشان يتقال عني كل ده .. الموضوع عادي والله , هو احنا مش اصحاب وللا ايه ؟
ربنا يديم المعروف و المحبه و يباركلك في دلوعتك و حبيبة قلبك الجديده !! :)
تحياتي لك .

[timo_crosswind]

الف مبروك يا باشا و ربنا يبارك فيها و يكفيك شرها
انا استلمت الماتركس يوم 7/5/2008 يعنى فى الغالب عربيتى و عربيتك كانو على نفس المركب العربية ممتازة من حيث الراحة و الكماليات الحاجة الوحيدة اللى مضيقانى ان الفتيس تقيل شوية عن الاكسيل اللى كانت معايا، انا حعمل صيانة اللاف يوم الثلاثاء 3/6

الف مبروك ياباشا ربنا يديك خيرها ويبركلك فيها ...بس ممكن سؤال بعد اذنك؟
عربيتك تركي بردو؟
الحاجات اللي استلمتها مع العربيه زي الحاجات اللي انا استلمتها واللي زكرتها في اول الموضوع؟
عربيتك فيها مخرج كهربائي بالخلف في الشنطه ولا لا؟
انت استلمت شريحه معدنيه مع المفاتيح مدون عليها رقم المفتاح عشان لو لا قدر الله ضاع تعمل واحد جديد في التوكيل ولا لا؟
عندك في العربيه راديو سي دي هيونداي ولا كاسيت؟
وانا اسف لاطالتي في الاسئله والف مبروك مره تانيه:):)

[timo_crosswind]

ألف مبروك
وفعلاً أحسنت الإختيار ماتريكس عربية أكثر من ممتازة
بس أنا كان عندى إستفسار
الكورى أغلى ولا التركى
الكورى أفضل ولا التركى
بسم الله ماشاء الله لا قوة إلا بالله
ربنا يحفظهالك من العين ومن شر الطريق

الف شكر علي مداخلتك وعقبال مانبارك لعربيتك
بالنسبه لسؤالك لا اعتقد ان في ماتركس كوري بينزل دلواقتي اللي بينزل دلواقتي بس التركي وسعره بالنسبه للمانيوال 84 الف جنيه والاتوماتيك 91 الف جنيه مصري
عموما عربيتن واحد ماعدا بعد الاختلافات في التجهيز زي ماذكرت في اول الموضوع واكيد في اختلاف في التقفيل لصالح الكوري
واي سؤال انا تحت امرك
المجمل الماتريكس عربيه جميله جدا والتقفيل التركي مش هيضيقك وتقريبا مش هحس بفرق بينه وبين الكوري بشكل كبير

[timo_crosswind]

الف مبروك يا باشا و ربنا يبارك فيها و يكفيك شرها
انا العربية معايا من اكتوبر 2007 يعنى حوالى 7 شهور وهى عربية زى الفل
على فكرة العربية فيها مخرج كهرباء فى الشنطة الخلفية على الشمال

ومفيش راديو سي دي
اللى موجود تسجيل عادى Jvc

شكرا ياخي العزيز لمداخلتك والف مبروك لك هيا فعلا عربيه جميله وانا ارحت لما ركبتها.
اما بالنسبه لموضوع الكاسيت ده مش موجود عندي اللي موجود عندي راديو سي دي به وصله usb هيونداي والكتالوج بتاعه مكتوب عليه هيونداي لونه اسود وكبير .
انا عندي الشنطه الخلفيه لايوجد بها مخرج كهربائي
وياريت لو في حد معاه ماتريكس جيبها جديد يشارك معانا الموضوع لمعرفه الفروق
وشكرا

[timo_crosswind]

ألف مبروك عليك يا سيدي و خللي بالك منها بقي ...
بس ايه الكلام الجميل ده ... والله ده كتير عليا .. و بعدين أنا حاسس اني ماتعبتش في حاجه عشان يتقال عني كل ده .. الموضوع عادي والله , هو احنا مش اصحاب وللا ايه ؟
ربنا يديم المعروف و المحبه و يباركلك في دلوعتك و حبيبة قلبك الجديده !! :)
تحياتي لك .

ياباشا انت تستاهل اكتر من كد وربنا يديم المعروف ويجلعها معرفه خير.
احنا فعلا اصحاب واخوات كمان:):)

[timo_crosswind]

:):)وشكرا للجميع لمن ساهم بمداخلتهم وعقبال مانبارك للجميع إن شاء الله

[bassam nagy]

الف الف مبروك وربنا يباركللك فيها ويديك خيرها ويكفيك شرها
اما بالنسبة للتركى بدايتة موديلات 2008 والحاجات الية استلمتها كلها مظبوطة والفانوس الامامى مختلف فى الشكل القديم زى الية مع احمد اما الشكل الجديد بداية 2006 كورى و2007 كورى و2008 الفانوس الامامى مقسم للنور العالى والواطى

[timo_crosswind]

الله يبارك فيك ياباشا وشكرا لردك.بالنسبه للمخرج الكهربائي اللي في الشنطه فعلا مش موجود في التركي وموضوع الشريحه المعدنيه بردو مش موجود؟وشكرا مره خري

[bassam nagy]

عفوا على اية ولو محتاج اى استفسار انا تحت امرك

[timo_crosswind]

عفوا على اية ولو محتاج اى استفسار انا تحت امرك

شكرا ياقائد بس ممكن في حاجه انا كنت بستفسر عليها ياريت بس تجوبني عليها
واضح انك ماخدتش بالك منها في مدخلتي اللي فاتت .

[bassam nagy]

بالنسبة للمخرج الكهربائى موجود عندى فى الشنطة بس العربية كورى
اما الشريحة المعدنية انا مش عارفها بالظبط

[liquidator]

بالنسبة للمخرج الكهربائى موجود عندى فى الشنطة بس العربية كورى
اما الشريحة المعدنية انا مش عارفها بالظبط

الشريحه المعدنيه يا بسام .. اللي بتيجي في ماديلية المفاتيح و مطبوع عليها رقم المفتاح عشان لو المفتاح ضاع منك ... عرفتها ؟

[timo_crosswind]

تمام كدا انا عارف ان العربيه الكوري فيها المخرج الكهربائي بس التركي لا فانا حبيت اتاكد من المعلومه دي بس ...موضوع الشريحه المفروض ان كان بينزل مع اي مفتاح عربيه شريحه معدنيه مدون عليها رقم بحيث لو فقدت المفتاح بتعمل مفتاح جديد من التوكيل بارقم ده بس الشريحه دي انا مستلمتهاش ولما سئلت عليه قلي مبقاش بينزل في الموديلات الجيده .........عموما الف شكر للتعاون

[bassam nagy]

اة اة عرفتها تمام افتكرتها شكرا ياحمد
معرفش التركى بينزل فيها ولا لا بس ممكن حضرتك تسال مصطفى او اى حد من الاخوة الية معاهم التركى

[timo_crosswind]

احمد باشا منور انت فين ياقائد ...موضوع الشريحه عملي قلق حسواكا زي مانت عارف:)