يرجاء الافادة

[toktok]

حجزت سيارة ماتريكس مانيوال من غبور من يومين
وارجو من الاخوة الاعضاء المحترمين الافادة هستلم اية من الاوراق
وثانيا هستلم اية مع السيارة من عدة وخلافة
واخر حاجة نصيحتكم اخلى بالى من اية وانا بستلم لانى دة اول مرة اشترى فيها سيارة على الزيرو
شكرا مقدما.......... واسف للتطويل

[zoza]

الف مبروك مقدما
الاشياء اللي استلمتها مع العربيه:
(الكوريك-الاستبن-الولاعه-الاريل-كتالوج السياره-كتالوج السي دي-شنطه العده بها مفك ووصله الكوريك ومفتاح العجل -اتنين مفتاح واتنين ريموت لونهم اسود)
خد بالك افتح الكبوت وتاكد من غطاء صباع البطاريه الموجب فقط لانى بعد ماستلمت ومشيت لقيته تانى يوم مفكوك وكان حيقع
فى 2 مسمار تثبيت لافيز الراجع خلف الماتور لقيتهم فكينه وخدوه ولما روحت صيانه الاف قال منهم لله ده مش موجود الا فى تركيا ياريت تخطف رجلك وتجيبه وتعيش انت ياحج

[Neurovit]

الف مبروك مقدما واحتمال تستلم خلال 5 ايام شغل من الحجز او اسبوع
1-هاتستلم ورقة من عندهم موضح فيها ايه هاتسلمه في العربية من عدة وخلافه وايه مش هاتستلمه محطوط جنبة علامة X
2- تبص بس من الخارج على حالة العربية اي خبطة اي خدش معيب اي حاجه مرشوشة او دهان مختلف وان شاء الله مدام هاتسلم من التوكيل مش تقلق كتير
انا لسه مستلم فيرنا هاف اوبشن يوم الجمعه 23/5 من توكيل بورسعيد
3-الموظف هايشغلك الكاسيت ويشغلك الراديو لو فيه CD جهزهاا ممكن تجربها
والتكييف سخن وبارد هايشغله او اطلب منه يشغله والاضاءة ومساحات اكنها عربية مستعملة ميهمكش ممكن تكون حاجه معلقه !
4- ارفع الكبوت وبص يمكن عينك تلقط حاجه غريبة اومش عاجباك واستفسر براحتك متمضيش استلام الا ما تشوف وهما بصراحه ناس زوق جدا جدا
5- متمشيش على الجير الاول كتير مجرد تحرك السيارة بس ولحد ما توصل البيت بالسلامة تنقل ما بين الغيارات كلها متمشيش على غيار واحد طول الطريق(نقلا عن كتالوج السيارة )
انا زي حالاتك برضه كانت اول مرة وخلي بالك لو مكنتش ركبت سيارة باور قبل كده هاتحس اكنك بتسوق لاول مرة في حياتك( انا مركبتش غير لادا قبل كده ) وياريت تجيب معاك زميل... الصحبة كويسة برضه
6- فوت على اي معرض واطلب منه نمر تجارية هاتمضي على اقرار وتصور له البطاقة ورخصتك وتاخد النمر على طول إيجارها بيتراوح من 25 ج لحتى 100 جنيه لليوم الواحد( وتحسبها 24 ساعه مش ليلة) كده محدش يقولك فيالطريق تلت التلاته كام ولا تبرز اي معلوم.
7- انا استلمت ورقة من دفتر عندهم زي ايصال استلام وباقي الورق لسه معرفوش لاني هاستلمه غدا ان شاء الله الاثنين 26/5

[bassam nagy]

الف الف مبروك
اتاكد من الاستيبن والكواريك والولاعة والاريال الخارجى والكاتالوجات كاتالوج العربية والكاسيت
لف حول العربية واتاكد من انها لايوجد بها خدوش جرب التكييف والكاسيت
والف مبروك

[smsmbakr]

الف مبرووك
اتأكد من الكاسيت والتكييف وبص على الاستبن
ولف حول العريبة علشان الخدوش ومتنساش الكوريك والعدة والضمان والكتالوج

[toktok]

:)مش عارف اشكركم ازاى ......؟؟؟؟؟
الف الف شكر على رد جميع الاعضاء المحترمين ..ربنا يدوم محبتكم على المساعدة
وعقبال مانبارك لجميع من ساهم فى الرد....
بصراحة المنتدى دة اكثر من رائع بمحبة الاعضاء والمشرفين علية
لانى استفت منة حاجات كتير مكنتش اعرفها ---ربنا يبارك فيكم
معلش لدى ملحوظة للاخ zoza اية2 مسمار تثبيت لافيز الراجع خلف الماتور
وشكرا

[اسلام ابراهيم]

بالمناسبة اتأكد من لون العربيه كويس في النور علشان ساعات البويه بتبقى مش قد كده وبتبقى فيها عيوب
والف مبروك يا باشا