زيارة لتوكيل هيونداى العبور (كارتك) حاجة فوق الوصف

[salvationspirit]

يا جماعه انا بجد بشكر كل شخص عمل المنتدى ده وكل عضو فيه بيشارك انا تقريبا مليش غير اسبوع مشترك ولا افقه شئ فى العربيات بس اتعلمت فى المنتدى ده حاجات كتيره .. وانا على فكره من اسيوط وناوى اجيب الفرنا 2007 وان شاء الله هعمل صيانتها عند المهندس بهاء كارتك عشان انا اعجبت بشخصيته من غير ما اشوفه ويا رب الصيانه تكون من اول مره عشان انا لو رجعت اسيوط مش هعرف اجى تانى بس انا عاوز اعرف هيه الصيانه بتاعت 1000 اللى فى كارتك دى بكام ولا من غير فلوس وشكرا يا جماعه بجدددددددددد

[sh_masry]

http://www.nilemotors.net/Forum/viewtopic.php?t=2850&highlight=

[Eng: BAHAA Cartec]

السلام عليكم

الف شكر يا استاذ معاذ على هذة المداخلات المفيده لنا ونشكركم على حرصكم على ( كارتك )
ولكن انا كان نفسى ان اللى يرد ولا شريف ولا انا كنت عاوز م / محمد مصطفى هوه اللى يتكلم بنفسه ..
لكني اعتقد انه اكيد مشغول شويه ...

لذالك انا هاحكيلك اللى حصل باختصار يا أ / معاذ ( على فكره اسمك جميل اوى ) .....
المهندس محمد مصطفى من الناس اللى مابتحبش تركب وخلاص فهو حساس جدا
جالى م / محمد وكان بيشتكى من كذا مشكلة منهم الفتيس به عضه فى الغيار الثالث .
ولاكلام ده كان يوم الخميس اخر النهار واستلم السيارة عند انتهاء وقت العمل الرسمى
حيث ان مواعيدنا من ( 9 ص : 5 م ) طوال ايام الاسبوع .
المهم لقيت م / محمد جايلى اليوم التالى وهو يوم الجمعه صباحا و معاه ابن خالته أ / محمود
وهو ايضا معاه فيرنا نفس اللون ..... وكان عاوز يعمل الصيانة الاولى لعربية أ /محمود
وبرضه كام مشكله كده فى سيارة أ / محمود و قاللى انا عندى الفتيس لسه فيه عضه
المهم ان احنا وطينا الدبرياج شويه و السياره عجبة م / محمد لقيت أ / محمود بيقوللى ان
م / محمد كان واخد على طول على الفتيس الاوتوماتيك و فضلو يجربو السيارتين هما الاثنين
لحد لما بقو زي بعض والمهم ان هما نفس اللون ....

ارجو ان اكون اوضحت لك الصورة يا أ / معاذ .

اما الستاذ شريف فله منى عتاب بسيط وده من عشمى طبعا ( ايه يا عم مفيش اهلا .... ولا سهلا ..... ولا منور عندنا
ولا بيتك ومطرحك .... ولا صباح .... ولا مسا .... ولا كلمه كويسه .......
متشكرين يا عم على التحيه وعلى العموم هاتجيلى هاتجيلى :lol: :lol: :lol:

[sh_masry]

يا باش مهندس بهاء انت مش محتاج صباح و لا مسا .... ده بيتك و احنا اللى نقولك متشكرين على وقتك ده بالرغم من مسئولياتك و شغلك الكتير .......و انا مش عايز اسلم عليك كتير على الهوا لحسن الأعضاء يفتكروا انى شريك فى المركز وللا حاجه مع المهندس شريف ههههههههههه او اكون انا المهندس شريف شخصيا و متخفى علشان اجر الأعضاء عضو عضو لحد كارتك ههههههههههههه بس عموما المحبه فى القلب يا باشا و اتشرف بصداقتك خارج مجال صيانه السيارات ايضا , ده انت حبيبى من ايام الجيزه يا راجل ههههههه
a7'ook
Sherif

[معاذ الشرباصى]

م/بهاء

جزاك الله كل خير على كلامك الجميل, سعة صدرك و ردك على استفسارى

فعلا كلام م/محمد مصطفى لم يوضح اللى حصل ده كفاية, فيخلى الواحد يظن ان لم يتم عمل اللازم مع السيارة

رد حضرتك على الموضوع يدل على شخصية محترفة جديرة بالاحترام بجد, و يا ريت يبقى فى مراكز لخدمة المختلفة اشخاص مخلصين فى عملهم زى حضرتك

و فعلا اهتمامكم براحة العميل و رضاه عن مستوى الخدمة, هو ان شاء الله مفتاحكم للنجاح و التميز فى مجال يفتقر حاليا لمثل هذه الاساسيات فى التعامل

انا كان عندى اقتراح كمان لحضرتك, ان الادارة تعمل موضوع مثبت هنا فى رووم الهيونداى, بحيث يسيب الاعضاء اللى زاروا مركزكم انطباعتهم, بالاضافة ان اعضاء الموقع كافة يقولك على اقتراحتهم اللى اكيد بعض منها يفيدكم فى تطوير الخدمة, و التوسع ان شاء (يعنى يبقى عندكم نبض الشارع :lol: )

بالتوفيق ان شاء الله, و نتمنى لشراكتكم مع نايل موتورز تكون فاتحة خير عليكم

[ايهاب عبد العزيز]

فعلا الاعضاء كلهم حيروحوا هناك، انا بعد ما قرأت موضوع كارتك ده هنا فى المنتدى كان فيه واحد صاحبى لسه مشترى الفيرنا وعايز يعمل صيانة ال 1000 كيلو قلت له على موضوع كارتك ده قالى طيب نروح نجرب هناك خصوصا انه قريب من مكان شغلنا وان احنا سمعنا كلام كتير عن تكويل غبور والزحمه اللى فيه. اتصلنا بالتليفون وعلى فكره تليفونات المركز اتغيرت مش هى اللى فى الاعلان اللى على المنتدي اتضاف ليها رقم فى البدايه وحجزنا ميعاد كان الساعه 1 ونص يوم الاتنين اللى فات. المكان ممتاز الصراحه والناس مقابلتها حلوه وشغلهم برضه كويسه وميزه كبيره اوى انك تبقى قاعد فى الكافتيريا وشايف عربيتك وهى ببتصلح وايه اللى بيحصل فيها بالظبط. هما خلصوا فى حوالى ساعه صيانه ال 1000. وطلعوا جربوها اكتر من مره.
وهو بصراحه مركز نظيف وهادى ومحترم جداً. بس مع الاسف انا ما اتشرفتش بمقابله م/ بهاء لأنى ماحبتش انى اقول انى من نايل موتورز واتقل عليه فخلتها كده عادى يعنى.
وللأستاذ اللى كان بيسأل عليها هى فيها تغيير زيت وفلتر وتربيط العفشه وظبط للموتور ودفعنا حوالى 92 جنيه علشان صاحبى حط زيت شل 5000.
انا حكمى على المركز انه مش فنيا طبعا لأننا ما عملناش حاجه فنيه وانا خبرتى كمان ما تسمحش انى احكم عليه من الناحيه الفنية دى حسيبها للناس اللى بتفهم اكتر منى فى العربيات، انما الحكم عليه من ناحيه الاستقبال وجو الود اللى هناك واللى تلاحظه حتى من طريقة المهندس وهو شغال فى الصاله تحت، تحس انه بيتشغل وهى حابب الشغل ودى حاجه تخليك مطمن انه مش حيقلب عربيتك ويعملها اى كلام.
على فكره فيها هناك وصله انترنت لاسلكى اللى معاه لاب توب ممكن يعيش شويه على النت لغايه الصيانه ما تخلص انا بعت شويه إيميلات من هناك. بس الكافتيريا اللى هناك متهيأ لى انها غاليه شوويه (شاى + بيبسى = 8 جنيه)

[PAYOO]

انا كان عندى اقتراح كمان لحضرتك, ان الادارة تعمل موضوع مثبت هنا فى رووم الهيونداى, بحيث يسيب الاعضاء اللى زاروا مركزكم انطباعتهم, بالاضافة ان اعضاء الموقع كافة يقولك على اقتراحتهم اللى اكيد بعض منها يفيدكم فى تطوير الخدمة, و التوسع ان شاء (يعنى يبقى عندكم نبض الشارع :lol: )

بالتوفيق ان شاء الله, و نتمنى لشراكتكم مع نايل موتورز تكون فاتحة خير عليكم

أقتراحك جميل جدا يا دكتور معاذ

ولو أخدت بالك أني مثبت موضوع صديقنا "شريف المصري" وعن حكايته مع المركز وأضفت عليه التغطيه التي قمنا بها للمركز

وأنا أفضل أن يدخل كل عضو ويقول تجربته (سواء جيده أو سيئه) في موضوع مستقل ونتناقش فيها ومعنا المهندس "بهاء" إللي منورنا ومشرفنا وإللي معرفش يعمل لي حاجه في موضوع الأربعين جنيه بتوع أفتح الكبوت وأقفله (أنا مش عاوز أتكلم أهه يا باشمهندس "بهاء")

[PAYOO]

على فكره فيها هناك وصله انترنت لاسلكى اللى معاه لاب توب ممكن يعيش شويه على النت لغايه الصيانه ما تخلص انا بعت شويه إيميلات من هناك.

بس الكافتيريا اللى هناك متهيأ لى انها غاليه شوويه (شاى + بيبسى = 8 جنيه)

أيوه كده هو ده المطلوب المزايا والعيوب والنقض الصريح الشفاف وأحنا حقنا نقول إللي أحنا عاوزينه طالما حاسين إن المركز بقى بتاعنا ولازم كمان المركز يستجيب لنا أكتر طالما أحنا بقينا العملاء بتوعه

[معاذ الشرباصى]

ولو أخدت بالك أني مثبت موضوع صديقنا "شريف المصري" وعن حكايته مع المركز وأضفت عليه التغطيه التي قمنا بها للمركز

اصل انا كنت عاوز اكتب الاستفسار بتاعى فوجدت اكتر من موضوع على كارتك, علشان كده كان اقتراحى بعمل موضوع موحد

يبقى معنى, كده لو فيه استفسار يفضل يبقى فى الموضوع المثبت بتاع التغطية؟

[m_mostafa4]

السلام عليكم
أولا أسمحولى أرحب بالمهندس بهاء و أهلا بيك فى المنتدى و ننتظر منك المزيد من المشاركات و عشان الحق يا جماعة أنا فعلا كنت مختصر فى كلامى عن زيارتى للمركز و ده لعدم الأطالة و أنا كان كل هدفى أنى أوضح حاجة واحدة و هى أن المعاملة و الصيانة فى كارتك ممتازة و تستاهل منكم الأهتمام و خصوصا بالمقارنة بمعاملة غبور السيئة و عذرا أذا كنت أسأت التعبير
محمد مصطفى

[HiTcH]

طيب سؤال صغير يا جماعه

يعنى المركز مجهز لجميع انواع الصيانه بالنسبه العربيات الهيونداى؟؟؟؟
مش هحتاج اروح لغبور فى اى حاجه؟؟؟
الموضوع ده مهم جدا
لانى بشوف الناس بتشتكى من غبور ( شويه )
وياريت المهندس بهاء يدينا فكره عن الخدمات بشكل تفصيلى شويه ( معلش بقى هنتعبك )
وشكرا للردود مقدما

[Eng: BAHAA_Cartec]

السلام عليكم

الى أ/ HiTcH أهلا بيك يا ابو زومول انت هاى تك وانا كارتك .
بداية احب اوجه انتباه حضرتك الى أول موضوع فى قسم هيونداى .
فهو يتكلم عنا تفصيليا وليس من خلالنا ولكن من خلال تجارب أعضاء
نايل موتورز ....

ولو ملاقتش اجابه عن كل استفساراتك بلاغنى وانا هارد عليك ..

[PAYOO]

المهندس بهاء بيكلمك على الموضوع ده
http://www.nilemotors.net/Forum/viewtopic.php?t=2229

منورنا بجد يا باش مهندس بهاء

[وائل عطية]

الباشمهندس بهاء
شكراً على مجهوداتكم الكبيرة والملموسة بشهادة الجميع
كنت عايز أعرف من حضرتك بتعملوا الصيانات الدورية للاسبيرانزا ولا لأ؟
على فكرة أنا من سكان العبور يعني ليا عندك خصمين : خصم المنتدى وخصم الجيرة :lol:

[Eng: BAHAA_Cartec]

السلام عليكم

صباح الخير يا جارى .....؟؟؟؟
يا باشا تنورنا فى أى وقت .
ولكن بأكد ان انا فى كارتك توكيل معتمد لكل من هيونداى و اسكودا
ولكن لنا قسم خاص لغير سكودا و هيونداى .
وقطع الغيار للسبيرانزا غير متوفرة عندى بالتالى : هناك خياران اما
انيحضر العميل قطع الغيار أو تبليغ قسم المشتريات لاحضار المطلوب .