الساده ملاك الالنترا 2012 الرجاء الافاده

[ibnmoaz]

السلام عليكم .انا والحمد لله من ملاك الالنترا2012(ضمان غبور) عامل بيها دلوقتي 12000كم من 20-8-2011 بس من قبل صيانه 1000 وانا حاسس ان فيه صوت خبطه بسيطه قدام يمين قلتلهم عليها ربطو العفشه وقالولي تمام بس برضه ما رحتش روحتلهم في صيانه 5000كم واشتكيت برضه ربطو العفشه والفرامل وكنت واقف معاهم ومفيش فايده ونفس القصه حصلت في صيانه 10000كم. المشكله اني بكتشف الكلام ده بعد ما اروح(انا في الهرم وبصين في قليوب) بالاضافه اني مشغول قوي ومش فاضلهم بس اليومين دول الصوت بقي واضح ومضايقني جدا وسألت وسمعته لميكانيكي صديق قالي دا صوت مساعد وبصراحه لما قالي كده اقتنعت وافتكرت الصوت ده فى العربيه القديمه
فهل حد من الساده اللي معاهم العربيه دي حصل عنده العيب ده؟ ولا دا حاجه خاصه في عربيتي؟
التصريف السليم ايه مع غبور في وضع زي ده؟هيماطلو ويستهبلو ولا محترمين؟ مع العلم في الصيانات السابقه الواحد كان هادي وذوق(وانا مش كده خالص بس عشان البريستيج والعربيه وكده)
فما هو التصرف السليم يا كرام؟ افيدونا جزاكم الله خيرا

[Samir Elshahawy]

أخي الكريم ..

يشرفني أن أرد علي حضرتك بصفتي احد مالكي الألنترا 2012 و عامل بيها لحد الان أكثر من 13000 كم
الحمد لله لم ألاحظ أي صوت مثل هذا في العربية

و لكن انا من رأيي أنك تعرض العربية علي اكثر من مركز خدمة معتمد لهيونداي و تخليهم يطلعوا معاك و يجربوا العربية

و لو الكلام كله واحد عن انه عيب في المساعد الامامي اليمين يبقي تطلع علي غبور (أبورواش) و تدخل العربية هناك و معاك كل الاوراق متضمنة (اوامر الشغل السابقة - صور الفواتير - الضمان) و تخليهم يجربوا العربية معاك و تشوف هايقولوا أيه و هايعملوا ايه

لو هايتهربوا هنا ألجأ لعمل شكوي في خدمة العملاء و ابدأ الاتصال بجهاز حماية المستهلك و ياريت تضعنا معاك في الصورة علشان أحنا ناويين نبدأ ندعم السادة مالكي هيونداي في الامور اللي زي دي

كمان انا بأطلب من الاخوة الاعضاء الكرام اللي لهم علاقات مع التوكيل او يعرفوا حد هناك سواء في قليوب او ابورواش ان يتواصلوا مع الاخ صاحب الموضوع و نحاول معا نحل المشكلة دي و انا عن نفسي هأحاول أشوف برضه حد هناك في التوكيل يساعدك

[ibnmoaz]

الاخ الفاضل الكريم م .سمير
اشكرك جدا علي اهتمامك. وانا ناوي ان شاء الله اعمل اللي حضرتك قولت عليه . وان شاء الله ساواليكم ب الاخبار اول بأول

[original]

فعلا حضرتك تروح وتصر على حل المشكلة وأكيد ممكن يفوروا الجنب بالكامل ويكشفوا على المساعد بعد مايخلعوه لوحده مع إن الموضوع ده ممكن ياخد منهم وقت بس لو كده سيبهالهم وماتستلمهاش غير لما تتصلح..

[easy2002]

مهندس هاني ميخائيل معانا هنا ف المنتدى وكان ف غبور قليوب قبل كده كلمه وهوا ربنا يكرمه مش بيتأخر وهيعرفك تعمل ايه بالظبط

[Hussein_Ramdan]

بما انى كنت من ااحد ملاك اللنترا 2012
انا كنت عندى نفس المشكلة دى بظبط كانت شبة نتقير بسيط مش بتبان غير فى المطبات
وعملت مشاكل كتير فى ابو رواش وقليوب
وتم تغير علبة الدركسيون
ولكن للاسف لم يتنهى المشكلة
الى ان بعتها بس الشهادة لله انا مابعتش عشان المشكلة دى
العربية لا غبار عليها الا انها خفيفة جدا فى السفر
غير كدة العربية جميلة

[kbarema]

hامال بعت ليه

[aatif]

سيدى الفاضل انا انصحك انك تروح مركز مودرن سيرفيس اللى في شيراتون انا عارف انه بعيد عنك شوية بس دول ناس محترمين وفاهمين وانا كان عندى مشكلة فى الفتيس وكشفو علي العربية ولقو ان الكبالن كان مفكوكة شوية وصلحوها من غير ولا مليم
فعلى اسوأ الفروض هما ممكن يشرحولك المشكلة ايه بالظبط.
وللعلم انا عربيتى برضه 2012 اول فئة
وبالتوفيق ان شاء الله

[kbarema]

سيادتك هو مركز مودرن سيرفيس اللى في شيراتون ده تبع غبور يعنى معتمد الضمان عنده

[Hussein_Ramdan]

hامال بعت ليه

عادى لمجرد التغير والصراحة جاتلى باعة حلوة
انا كونت جايبها من 8 شهور ب 138500
وعملة 10000 كيلو
وبعتها ب 130000
قولت مش مشكلة ابيع واغير

[ls1090]

المشكلة ديه مشكلة مساعد بنسبة 100% والحل تغير مساعد
انا كان عندى نفس المشكلة ديه فى النترا 2008 ولعبوا بيه الكره لحد لما هبات فيهم وطلعت لمهندس هانى مصطفى مدير الصيانة مكتبه فوق فى ابو رواش انا سمعت انه راح قليوب اسال عليه راجل فى قمة الاحترام جاب مهندس جربه وقال المشكلة من المساعد بس العربية عاملة 18 الف رديت عليه لا انا مبلغ عن المشكلة ديه من 10000 كيلوا وكان معايه امر الشغل ومثبوت فيه الكلام وتم تغير المساعد
انت لازم تروح فى اسرع وقت لانهم ممكن يقولوا سوء استخدام بس انت معاك فواتير وثابت الكلام ده من الاول
روح وكشملهم جامد وخلى المهندس يطلع يجرب معاك العربية

[kbarema]

طب وناوى تجيب ايه غيرها

[Hussein_Ramdan]

ناوى على اسكودا فانتازيا
او كيا سبورتاج حسب الظروف بس توكيل كيا بيستعبط بيقولى احجز واستلم كمان ست شهور
دى تكون ناس ماتيت وناس اتولديت
دة الصراحة الى هيغلينى اصرف نظر عنها

[ahmedhawas]

سيادتك هو مركز مودرن سيرفيس اللى في شيراتون ده تبع غبور يعنى معتمد الضمان عنده

مودرن سيرفس جروب .. معتمد هيونداي وبيجو
وهو مش في مساكن شيراتون .. ده في جوزيف تيتو

[ibnmoaz]

السلام عليكم يا شباب.ربنا قدرني النهارده ورحت غبور ابو رواش بناءا علي نصيحه الاخ الكريم م سمير. واول ما دخلت وشرحت للمهندس عاطف(راجل محترم ومش بتاع افلام وحوارات) راجع اوامر الشغل من علي السستم باسماء المهندسين اللي انا قلتلهم علي العيب ده واتأكد من كلامي وبعد كده جرب معايا العربيه واول ما اتحركت العربيه كان في غطاء بلاعه جوه التوكيل داس عليه فسمع الصوت بوضوح فمكملناش ودخل علي عنبر العفشه علي طول وقالي حاضر علي طول.راقبت العربيه من الاسترحه وبالصدفه كانت اول عربيه عند شباك الاستراحه.رفعوها وجه مهندس تاني مع صنايعي وهزو هزتين من تحت العربيه وسابوها ومشيو.بعد نص ساعه نزلوا العلابيه وطلعوها بره.
استدعاني المهندس عاطف وخبطني بالحقيقه(العربيه عايزه علبة دريكسيون) بس هي مش موجوده الان هنبعت نجبها dhlوكلمني علي اول اىسبوع الجاي واداني موبايله الشخصي.طبعا علي قد ما كنت متضايق علي قد ماكنت مبسوط عشان ما قرفونيش وماطلوني .نزلت تحت الحسابات خد مني امر الشغل وقالي واضح عندي علي السستم ان علبة الدريكسيون هتتغير في الضمان واتعمل بيها طلب(افلح ان صدق) قلتله انا همشي اليوم ومعيش اي شئ يثبت ان جيت النهارده واتقالي كده. قالي متخفش كله مثبت علي السستم فمشيت .
ايه رأيكم يا شباب في الموقف ده ناقص حاجه كده كنت المفروض اعملها؟ وموضع علبة الدريكسيون ده مش بدري قوي علي عربيه زيرو وقياده نظيفه؟ والاخ الفاضل اللي قالي انه حصل معاه نفس الموقف هل بعد كده الصوت راح يعني فعلا عيب علبة دريكسون؟ وهل عشان هما ماماطلوش وقاوحو في الموضوع ده يبقي عارفين ان ده عيب في السياره؟
واخيرا جزيل الشكر لكل من اهتم وشاركني برأيه في هذا الموضوع. وادعيلو ان ربنا يتمها علي خير ويصدقو معايا.شكرا