بخصوص لا هيونداي بعد اليوم..

[Ahmad Allawy]

السلام عليكم..
استكمالا لموضوع الباشمهندس عمرو واللي بيقول فيه لا هيونداي..
انا شايف ان الموضوع محتاج شوية معلومات زيادة عشان نعرف نحدد فين المشكلة بالظبط.. وعلي اساس كلام الملاك لهيونداي..
هنقدر نحدد الشكوي هيتقال فيها ايه بالظبط..

انا كل اللي عايز اعرف بصراخة..
هل الناس اللي معاها عربيات غير الفيرنا بيعانوا نفس معاناة ملاك الفيرنا..؟؟ (في القاهرة..)
هل الناس اللي معاها فيرنا برة القاهرة مرتاحين مع التوكيل و مفيش فيه مشاكل..؟؟
هل الناس اللي معاهم عربيات غير الفيرنا مرتاحسن و مبسوطين مع التوكيل..
او علي الاقل مش بتخرج العربية من التوكيل فيها مشاكل جديدة غير اللي كانت داخلة بيهم..؟؟


كل اللي عايز سعادتكم تقولوه..

موديل العربية..
مكان وجود سعاتك.. المحافظة يعني..
مركز الصيانة اللي بتروحله

تعليقك او نوع المشاكل اللي بتقابلك..
هل عدم توافر قطع غيار؟
تأخير؟
عدم اهتمام بتقفيل الشغل؟
وساخة عربية؟؟
تخبيط العربية؟؟
سرقة او صياع حاجات منها؟؟
مشاكل تانية؟؟

او اي تعليق عند حضؤاتكم..

والف شكر علي التعاون..

[Ahmad Allawy]

في ايه يا جماعه..؟؟
انا كنت فاكر ان الموضوع يهم مالكي هيونداي اكتر من اي حد تاني..
بس واضح انه مش كده..

[Hesham A.Megid]

موديل العربية: فرنا - جيتز - ميتركس
مكان وجود سعاتك.. المحافظة يعني: الاسكندريه
مركز الصيانة اللي بتروحله: غبور السلطان حسين

تعليقك او نوع المشاكل اللي بتقابلك..
هل عدم توافر قطع غيار؟ محتجناش قطع غيار الحمد لله غير حاجات بسيطه اوي و كانت كلها موجوده
تأخير؟ ساعات مش دايما، بس بيبقي تأخير بسيط
عدم اهتمام بتقفيل الشغل؟ لا
وساخة عربية؟؟ لا
تخبيط العربية؟؟ لا
سرقة او صياع حاجات منها؟؟ لا
مشاكل تانية؟؟ ساعات مش بيعملوا كل حاجه اقولها، و لازم قبل مستلم اراجع عشان اشوف ايه اتعمل و ايه لأ.


بصراحه مش شايف التوكيل بالسوء الفظيع اللي الناس بتحكي عليه ده! يمكن عشان انا في الاسكندريه، و تقريبا كل الشكاوي في القاهره.

[theking2690]

موديل العربية..ماتريكس
مكان وجود سعاتك.. المحافظة يعني..القاهرة
مركز الصيانة اللي بتروحله:قليوب


لسه لحد دلوقتى متعاملتش معاهم غير مره واحده فى صيانة الالف و الحمدلله فى المره ديه المعامله كانت كويسه و العربيه قعدت ساعتين منهم نص ساعه استراحة غداء

[Ichabod]

السلام عليكم.
هل الناس اللي معاهم عربيات غير الفيرنا مرتاحسن و مبسوطين مع التوكيل..
او علي الاقل مش بتخرج العربية من التوكيل فيها مشاكل جديدة غير اللي كانت داخلة بيهم..؟؟

ياريت الناس تقول رأيها .
خصوصا ان عربيات زى الألنترا و الجيتز تحفة بس الخوف كله من التوكيل

[Hossam.Hamdy]

المشكله يا حماده كلها فى الاتى:
تأخير العربيه جدا و بتكون الصيانه بسيطه
الاهمال من الصنايعيه
مش بعملو كل الشكاوى اللى بقول عليها العميل
فى مهندسين بتهتم و فى مهندسين مكبرين دماغهم
عندهم ناس مش بتفهم كويس طبعا مش كلهم

[Ahmad Allawy]

كلام جميل جدا لحد دلوقتي في امور بدأت تتضح..
الا وهي ان التوكيلات اللي برة القاهرة افضل من القاهرة..
روح اعمل صياناتك في اليكس بقي يا حسام.. :) :) :)

وانت يا عم مهدي مستني و متربص انت.. ماشي.. ربنا يسهل و تجيب حاجة بقي و تخلصنا.. :) :) :) وجعت دماغي يا اخي.. :)


لسة عايزين ردود اكتر و تقييم عملي عشان نقدر نحدد مكان المشكلة مع غبور ف ايه بالظبط..

[Nile_Storm]

السلام عليكم
منور يا مستر اوبل :)
مع انك بتحسسني اني اللي عندهم فيرنا عندهم مرض مثلا و بتكشف عليهم
بس عامه الاستطلاع اهه
تعليقك او نوع المشاكل اللي بتقابلك..
هل عدم توافر قطع غيار؟ لا طبعا
تأخير؟ بس هما بيتاخرو بس مواعدهم ممظبوطه يعني لو قالك الساعه 1 تخلص 1 و كده بس ممكن يكون الشغل بسيط و ميستاهلش كل ده
عدم اهتمام بتقفيل الشغل؟ لا
وساخة عربية؟؟ لا
تخبيط العربية؟؟ لا
سرقة او صياع حاجات منها؟؟ لا بجد دي عندهم امانه جدا مره عامل ادامي و الله و الله لقي نظاره شمس قيمه جدا واقعه تحت الكرسي دخل مكتب الاستقبال بنفسه يدور علي صاحبها مع ان محدش شافه وهو بياخدها ...غيري :)
مشاكل تانية؟؟ لا يكمن الزحمه بس مع التزامهم بالمواعيد مفيش مشكله

[Ahmad Allawy]

السلام عليكم
منور يا مستر اوبل :)
مع انك بتحسسني اني اللي عندهم فيرنا عندهم مرض مثلا و بتكشف عليهم
بس عامه الاستطلاع اهه
تعليقك او نوع المشاكل اللي بتقابلك..
هل عدم توافر قطع غيار؟ لا طبعا
تأخير؟ بس هما بيتاخرو بس مواعدهم ممظبوطه يعني لو قالك الساعه 1 تخلص 1 و كده بس ممكن يكون الشغل بسيط و ميستاهلش كل ده
عدم اهتمام بتقفيل الشغل؟ لا
وساخة عربية؟؟ لا
تخبيط العربية؟؟ لا
سرقة او صياع حاجات منها؟؟ لا بجد دي عندهم امانه جدا مره عامل ادامي و الله و الله لقي نظاره شمس قيمه جدا واقعه تحت الكرسي دخل مكتب الاستقبال بنفسه يدور علي صاحبها مع ان محدش شافه وهو بياخدها ...غيري :)
مشاكل تانية؟؟ لا يكمن الزحمه بس مع التزامهم بالمواعيد مفيش مشكله

يا باشا الله ينور عليك..
مش كده والله بس انا شايف اصلي حسام ابن خالي حسام حمدي اللي انا رادد عليه ده.. واللي انت اكيد تعرفه.. شايف الويل في غبور.. ومسابش فرع للصيانة مراحوش..
وفي كل مكان خناقة.. و العربية بتدخل بعيب تطلع ب2..
المواعيد ماشي تمام.. بس انت برضه مقولتش انت بتروح انهي مركز صيانة..
و مشاكل التوكيل بقي انا مش اللي هاقولكم عليها..
الامثلة اللي انا كاتبها دي من واقع شكاوي الناس في المنتدي هنا..
مش حايبها معايا من بيتنا ولا من جريدة صفرا.. :) :) :)
وانا عن نفسي عشان خاطر الواد الغلبان اللي مش عارف يشوق من رجله ده..
نفسي يكون غبور انضف توكييل في مصر..
يا جدعان ابوه في السعودية كلمه و قاله شوف بيعه للعربية بالمشاكل اللي فيها دي كلها..
لك انت وحدك ان تتخيل..!!!!!

ولا انا غلطان يا حسام؟؟

[Nile_Storm]

هههههههههههه
عادي ياباشا
مش قصدي
و ربنا يصلح حال توكيلات مصر كلها
بس ايه رايك في مستر اوبل دي
ولا اوبلاوي احسن :)

[Ahmad Allawy]

هههههههههههه
عادي ياباشا
مش قصدي
و ربنا يصلح حال توكيلات مصر كلها
بس ايه رايك في مستر اوبل دي
ولا اوبلاوي احسن :)

امين يا رب..
يا باشا كل اللي ييجي منك حلو..
زي ما تحب..
:)

[Hossam.Hamdy]

تمام يا حماده...بس استاذ عاطف ساعتها ضيطنى جامد وحليلى حاجات كثير...راجل عشره على عشره و مكانه مش فى التوكيل ده

[Ichabod]

انا شايف كلام هنا حلو

http://www.nilemotors.net/Nile/showthread.php?t=23843

ايه النظام يا علاوى .. هنجيب هيونداى ولا أيه ؟

[Ahmad Allawy]

انا شايف كلام هنا حلو

http://www.nilemotors.net/Nile/showthread.php?t=23843

ايه النظام يا علاوى .. هنجيب هيونداى ولا أيه ؟

بقي انزل من الماني و اركب هيونداي.. ولا كوري..؟؟
بيتهيألي صعب شوية ..

يا اما في حالة واحدة بس.. انها تكون لقطة كسر زيرو و سعرها واقع.. (شروط تعجيزية.. :) )

[ahmedfd]

موديل العربية..النترا 2008 أوتوماتيك
مكان وجود سعاتك.. المحافظة يعني..القاهرة
مركز الصيانة اللي بتروحله:قليوب

إتعاملت معاهم مره واحده فى صيانة الالف ولما حجزت المعاد كان بعدها بيوم في أبورواش و يومين في قليوب فأنا إخترت قليوب علشان ظروف الشغ.
العربية متأخرتش(ساعتين تقريباً) و خرجت نظيفة بدون حاجة ناقصة أو مشاكل الحمد لله.