عاوز أشترى فيرنا 2008

[ahawit]

السلام عليكم يا رجماعه
أنا بفكر أشترى فيرنا 2008 بس مش عارف العربيه دى هتستحمل مشوايرى انا مشوارى للشغل كل يوم 40 كيلو تقريبا وبعدين بسمع كلام عن الوكيل بتاعها فى مصر انه سىء جدا ايه رأيكم بصراحه؟

[mada33]

العربية ممتازة هي معايا من 10 أيام وعملت لحد دلوقتي 750 كم
السحب ممتاز
العفشة ممتازة
التكيف تلاجة
وأنا جبت الكاملة مانيوال 1600 ففيها كماليات ظريفة
وعلي فكرة ارتفاعها عن الأرض كويس بس عيبها الوحيد انها ضيقة من ورا شوية بس الموضوع ده مش مهم بالنسبالي.
بالنسبة للتوكيل أنا لسة مرحتلوش لكن متهيائلي أن التوكيل مش بالسوء اللي الناس بتقوله والدليل أنا الشكاوي هنا مش من أكتر من شخصين أو ثلاثة والباقي ليسوا ملاك سيارت هيونداي أساسا.

ياراب أكون أفدتك ومطولتش عليك

[ahawit]

أفدتنى طبعا وشكرا جدا على إهتمامك بس المشكله أن أغلب أراء الناس مش بيشكروا فى غبور وفى ناس بتقول أن فى عيوب فى الفيرنا والأحسن تجيب عربيه متقفله بره مصر.
عموما ألف مبروك ليك وربنا يباركلك فى عربيتك ويديك خيرها ويكفيك شرها آمين

[ramysultan]

يابشا انا مش معايا فيرنا بس اعرف ناس كتيييير جدا معاهم وبيشكروا فيها
وبالنسبه للسعر ده انت مستحيل تلاقي عربيه مش متقفله فمصر الا الرينو كليو وطبعا الرينو مش محبب للناس
وبالنسبه لشكاوي الناس في المنتدي لو هاتفترض انهم 100 شخص بيشتكوا فهو في مايزيد عن 10000 شخص مش بيشتكوا ولو مش فارق معاك الحجم ممكن تشوف الجيتز وده مش معناه ان الفيرنا وحشه

[zakiali]

العربية ممتازة هي معايا من 10 أيام وعملت لحد دلوقتي 750 كم
السحب ممتاز
العفشة ممتازة
التكيف تلاجة
وأنا جبت الكاملة مانيوال 1600 ففيها كماليات ظريفة
وعلي فكرة ارتفاعها عن الأرض كويس بس عيبها الوحيد انها ضيقة من ورا شوية بس الموضوع ده مش مهم بالنسبالي.
بالنسبة للتوكيل أنا لسة مرحتلوش لكن متهيائلي أن التوكيل مش بالسوء اللي الناس بتقوله والدليل أنا الشكاوي هنا مش من أكتر من شخصين أو ثلاثة والباقي ليسوا ملاك سيارت هيونداي أساسا.

ياراب أكون أفدتك ومطولتش عليك

لسه 750 كم وبتشغل التكييف !

[Hossam.Hamdy]

العربيه كويسه جدا وحلوه معايا من 2006 ومعنديش مشاكل تقفيل ..المشاكل اللى واجهتها علبة الشكمان اللى فى النص كانت بتحك و خليتهم يغيروهالى بواحده تانيع بعد ما زهقونى...
وكان عندى عضه فى الفتيس فى الاول و الثانى و اتحلت الحمد لله...

التوكيل مشكلته انهم ممكن يكون فى حاجات انت تشتكى منها فى العربيه و ميعملوش حاجه فيها...بس ده طبعا متوقف على ضمير المهندس والصنايعي...

من المهندسين المحترمين المهندس محمد رمضان فى فرع قليوب و الراجل ده كان شغال فى مرسيدس فى اسكندريه و بعدين غبور

[Fouad Ezz]

وأنا جبت الكاملة مانيوال 1600 ففيها كماليات ظريفة

مبروك (متأخرة)
أنا ناوي علي الفيرنا إن شاء الله (كاملة مانوال) زي حضرتك ... ياريت تقولي إية هي الكماليات الظريفة دي ... علشان أغلب الصور عنها للفيفا

[Fouad Ezz]

لسه 750 كم وبتشغل التكييف !

هو المفروض الواحد يستني أد إية علشان يشغل التكييف
مش المفروض الواحد يجربة أول ما يستلم السيارة
ولو إستلمت في الصيف (النار) وشغلت التكيف مع سواقة هادية ... إية اللي ممكن يحصل ... (هل ده خطأ قاتل يعني؟)

[mada33]

أنا ناوي علي الفيرنا إن شاء الله (كاملة مانوال) زي حضرتك ... ياريت تقولي إية هي الكماليات الظريفة دي ... علشان أغلب الصور عنها للفيف

الكماليات هي :
1-أربعة زجاج كهرباء مع امكانية غلق التحكم من عند اللي سايق ( يكون هو بس المتحكم عشان الأطفال)
2- مفتاح ريموت مع انذار.
3- سخان للزجاج الخلفي.
4- امكانية طي الكنبة الخلفية.
5 -فتح الشنطة وتنك البنزين من الداخل.
6- مرايتين في الشماستين الأماميتين.
7- rpm.
8 - درج للتخزين علي يسار السائق ( لزوم الفكة للمنادي بتاع العربيات )
9- كاسيت cd مع أربع سماعات.
يعني حاجات أنا شايفها ظريفة ماكنتش موجودة في ال128 بتاعتي الله يحسن اليها

[mada33]

هو المفروض الواحد يستني أد إية علشان يشغل التكييف
مش المفروض الواحد يجربة أول ما يستلم السيارة
ولو إستلمت في الصيف (النار) وشغلت التكيف مع سواقة هادية ... إية اللي ممكن يحصل ... (هل ده خطأ قاتل يعني؟)

والله الأراء اختلفت في الموضوع ده لكن أولا :
الكتالوج ذكر مجموعة من الأشياء يستحسن مراعاتها في أول 2000 كم
وليس منها تشغيل التكيف .
ثانيا أنا لما شغلته ماحسيتش غير بفرق بسيط جدا في صوت الموتور ودوسة البنزين
وأنا من النوع اللي بيسوق بهدوء مش عايز أجري بالعربية ( مع انها مغرية جدا للجري)
وأنا سألت سؤال هنا في المنتدي لقيت أراء متضاربة البعض بيقول شغله عادي والبعض بيقول متشغلوش
لكن بصراحة مع الحر اللي احنا فيه ده لازم أشغله أمال أنا جايب عربية زيرو ليه؟
وعلي العموم أنا مشغلتوش غير بعد 500 كيلو ( لما جتلي الجرأة ) ومش بشغلة غير في الضرورة لحد ما أعمل صيانة الألف وهسأل في التوكيل عن الموضوع ده

[mada33]

العربيه كويسه جدا وحلوه معايا من 2006 ومعنديش مشاكل تقفيل ..

وانا كمان الحمد لله كنت خايف جدا من الأراء اللي شفتها هنا في المنتدي لكن العربية زي الفل مافيهاش أي عيوب وهي موديل 2008

[Fouad Ezz]

شكرا يا Mada ربنا يعطيك خيرها و يكفيك شرها .... وإن شاء الله أحصلك قريب ... مبروك مرة تانية

[Nile_Storm]

وانا كمان الحمد لله كنت خايف جدا من الأراء اللي شفتها هنا في المنتدي لكن العربية زي الفل مافيهاش أي عيوب وهي موديل 2008

للامانه يامادا
مفيش عربيه مفيهاش عيوب
هوا في نظري ابرزهم التابلوه شكله مش بيعجبني الصراحه بس احسن من غيره بمراحل

لكن هي عربيه ممتازه علي قد سعرها
واي سؤال عنها انا تحت امرك

[mohamedok]

السلام عليكم يا رجماعه
أنا بفكر أشترى فيرنا 2008 بس مش عارف العربيه دى هتستحمل مشوايرى انا مشوارى للشغل كل يوم 40 كيلو تقريبا وبعدين بسمع كلام عن الوكيل بتاعها فى مصر انه سىء جدا ايه رأيكم بصراحه؟

لو عاوز تشترى فيرنا روح اشترى الفيفا فورا ومهما سمعت عن الفيرتا اياك تشترى المصرى وباذات من غبور لان عيوب الصناعه مش هيه المشكله بس العطله والمشاوير لابو رواش وقليوب يعنى حضرتك هتشعر انك شغال عند غبور

الفيفا سياره مشهوره عالميا بالسمعه الممتازه والمبيعات العاليه جدا وبعدين مستورده بالكامل وشكلها من الامام احلى من الفيرنا وسحبها اعلى بكتير على الرغم من انها 1500
واهم حاجه فيها عفشتها الجباره وكمان عاليه عن الارض ومناسبه جدا لشوارعنا وكمان مفهاش مشكلة فى الثبات ومش بتحدف يمين زى الفيرنا والكاوتش بتاعها هانكوك كورى مش زى الفيرنا وحجات تانيه كتير .......... شوف الينك ده وانت هتعرف كل حاجه . تحياتى

http://www.nilemotors.net/Nile/showthread.php?t=25173

[mada33]

للامانه يامادا
مفيش عربيه مفيهاش عيوب
هوا في نظري ابرزهم التابلوه شكله مش بيعجبني الصراحه بس احسن من غيره بمراحل

لكن هي عربيه ممتازه علي قد سعرها
واي سؤال عنها انا تحت امرك

شكرا يا نايل ستورم علي اهتمامك وان شاء الله أنا بجهز مجموعة مشاراكات أحاول أضيف بيها حاجة للموضوع الجميل بتاعك ( دليل شامل عن الفيرنا )