Tweet
اولا انا بعتذرلكم علي التأخير في كتابة الحلقة الثالثه نظرا لظروف عملي الخاصه
زي النهاردة يا جماعه كنا طالعين علي العين السخنة انا وجروب من اصحابي بالنجمة الساطعه ال 128 و طبعا المرادي مقدرتش اطنش خالص وطلعت شيكت قبلها بيوم علي العربية وقبل ما اغطيها سئلتها انا مضايقك في حاجه يا حاجه قالتلي لا قولتلها يعني بكره هنوصل بالسلامه بدون اي مشاكل قالتلي عيب هو انا وعدتك بحاجه قبل كدا ونفذتها قولتلها وده العشم بردك
المهم طلع علينا اليوم الصبح لميت صحابي كلهم وبينا علي العين السخنه شاطئ اسمه ضي القمر طبعا احنا منعرفش في الشاطئ ده بس قولنا هنسئل عليه وخدنا طريق السويس خوفا من مقالب الست 128 ووصلنا للعين السخنة بعد سواقه 4 ساعات لان الحاجه مبتعديش سرعة ال 60 كيلو وجت مرحلة الاسئلة علي الشاطئ كل ما نسئل حد يقولنا لسه قدام يا كابتشن فضالنا علي كلمة لسه قدام يا كابتشن دي لحد ما لقينا نفسنا دخلنا علي كمين أمن دلولة وسئلناه قالنا معرفش شاطئ بالاسم ده كمل طوالي لقيت نفسي بلف حوالين جبل وتحتينا البحر وفوجئنا اننا خلاص بينا وبين الزعفرانه مفيش 40 كيلو وقولنا نبرشط علي اول شاطئ يقابلنا وامرنا لله علشان عربيتي شكلها بتهنج ومش هتستحمل تشمي اكتر من كدا المهم وصلنا لشاطئ مجهول الهوية ولقينا واحد شكله قتال قتله طالعلنا 10 جنيه النفر يا بيه كل واحد فينا دفع ولا اتكلمنا كلمة ودخلنا بالعربية علشان انزلها معايا البحر اشمعنا هيه يعني المهم كنا واخدين الشاطئ لحسابنا ولسه بنقول يا هادي ونازلين البحر واوبس لقينا المعلم ده مغرق الشط
ودي صورة المعلم
واول ما الرجالة شافو منظره كلهم جريو من البحر علي العربية وقالو مش هننزل الميه هنا بينا نرجع علي السخنة قولتلهم ماشي يله بينا وطلعنا علي العربية وقولنا مش هنلبس هدومنا تاني خلينا بقا وننزل السخنه علي الميه علطول وواحنا راجعين لقينا الضابط بتاع كمين امن الدولة بيوقفنا خير يا حلوين لحقتم تتمتعوا بالبحر قولنله لا سيادتك ملحقناش ولقيته بيقولي انزلي انتا بقا كدا وكل الحلوين من العربية ولقينه جمع علينا كل العساكر اللي في المكان قولتله خير في ايه قال للي جنبي انتا مش كنت سايق وانتا رايح وليا انا اني كنت قاعد جنبه قولتله لا حضرتك انا اللي سايق وانا رايح ووانا راجع قالي انتا بتستعماني كمان وصاحبي يقوله والله مبعرفش اسوق اساسا
المشكله ان صاحبي ده في شبه مني واحنا رايحين كان هو لابس كاب ونضارة وانا كنت من غير كاب ونضارة ولما رجعنا وهو غير هدومه خلع الكاب والنضارة وانا لبست الكاب بتاعي
المهم سين وجيم وانتو بتعملوا ايه وكنتوا بتجيبوا ايه من البحر وفتش العربية ياابني وقلبوا ال 128 حته حته كنت عايز اقولهم حرام عليكم هيه مش ناقصه تشويه اساسا وقولتله يا عم الحاج انا راجل خريج علوم كمبيوتر وناس هندسه وحقوق قولتله دي منظر ناس تكون بتاجر في المخدرات واحلي حاجه صحابي اللي لبسين المايوه اما نزلو من العربية كل العربيات اللي معديه علي الكمين عمالين يصوروهم علي انهم مجرمين والكمين مقلعهم والحمد لله عدت علي خير وخدنا بعضنا وطلعنا علي السخنه بعد ما اتفضخنا وال 128 بقا شكلها شوارع ولما وصلنا لبوابة الشط لقينا جيش بني أدمين واقفين عايزين يدخولو الشاطئ بالعربية وقولت مبدهاش روحت مزنق نفسي وسطهم بالعربية واحلي حاجه كل العربيات كانت بتتحك وتتخبط ومحدش عارف ينزل يبص علي عربيته فيها ايه وانا طبعا عربيتي كدا كدا رمه وشكلها مسخره وقولت هدخل بيه الشط يعني هدخل بيها الشط واول مره احس بقوة العربية وهي بتدفع العربيات اللي قدامها في البوابة بتاعت الشط هههههههه وقضينا اليوم في الزحمه المقرفه دي بعد ما كنا ملاك زمانا في شط القنافد وكنا واخدين الشط كله لحسابنا
وبعد ما اليوم خلص واحنا راجعين قالولي ادخل من طريق القطامية وانا اقولهم بلاش خلينا في طريق السويس اأمن ولو العربية عملتها معانا نعرف نتصرف وطبعا بعد الحاح شديد وافقت وقولتلهم انتوا اللي تتحملو المسئولية انا مش مسئول عنكم من دلوقتي وطلعنا علي طريق القطامية وانا بقول يا رب استرها عدي اليوم ده علي خير وطول ما انا ماشي عربيات واقفه عطلانه وانا قلبي الطيب اقفلهم يقوللي معندكش شوية مايه يا كابتن واديله مايه مع اني عارف اني كدا بضحي بنفسي في قلب العربية وفضلت اوزع الميه علي كل عربية عطلانه وعايزه مايه وقلبي في رجلي وقولت هخلي ازازة واحده معايا احتياطي وخدت الطريق ده في 3 ساعات بحكم السرعه النفاسه لعربيتي ووصلت عند جسر السويس ولقيت العربية بدخن ولا اكنها بتشرب شيشه تفاح علي قهوة بلدي
وعداد الحرارة لقيته ضرب في السقف قولت اشطه العربية هتولع يا رجالة انزلو بسرعه واتصلت بواحد حبيبي جالي بعربيته ونزل تحت العربية لقي سلك المروحة بتاعت الريداتير وقع من الثيرموثتات ورجعها تاني والمروحه دارت واليوم عد علي خير والحمد لله وقولت دي اخر مره اسافر بيها بالعربية تاني
Comment