عملت صيانة الالف للفيرنا

[mada6680]

النهاردة روحت عملت صيانة الالف كيلو
الى هيا تغيير الزيت والفلتر وشوية تظبيط كدة على العفشة
المهم الصيانة كلفت 143 جنية
مكنش فيه زيت غير توتال حطيت منه 5000
بس انطباعى عن العربية بعد تغير الزيت وتشغيل التكييف بحس ان العربية سحبها تقيل جدا وصوت الموتور ملحوظ بعد ما بقفل الزجاج
الحقيقة انا فى التيريوس كانت 1500 مش 1600 وكان صوت العربية عالى اصلا بالنسبة للتيريوس بس مكنتش وانا ماشى بحس بتقل السحب والصوت العالى دة الى يحسسك ان انت محمل على الموتور جامد جدا
التكييف اداءه ممتاز الحقيقة
العربية من غير التكييف رشيقة ونعمة جدا وسحبها عالى لكن لما بشغل التكييف بحس انى راكب 127

[ahm128]

منتظريين رد من اصحاب الخبرة فى الفيرنا

[MohammedAladel]

أنا مش معايا فيرنا بس هوضح نقطة بخصوص الزيت التوتال هو معايا فى الميجان كويس بصراحة لكن حاسس إن فيه زيت أفضل وفيه عضو هنا سالته عن الزيت التوتال قال لى إنه حطه فى عربيته وخلى صوت الموتور على شوف كتالوج عربيتك بيوصى بزيت نوعه إيه وحطه

[loshabih]

اولا عربيتك مفروض يتحطلها 10000 مش 5000 ...بلنسبه للتقل ممكن لما يكونوا عملوا رجلاش للفرامل بقت زيادة ومتقلة العربية..كده كده التكييف هياثر علي السحب بس مش لدرجة 127 هيا فعلا بتبقي سحب قليل مع التكيف وده عشان قوي
اما موضوع الصوت لان العربيه شبه مش معزولة وتقفلها سيئ جدا ..دا في حتت فلعربية مش مرشوشه وعلي الصاج...حتي الباب لو فكيته هتلاقي حتت مش مرشوشة لو بصيت تحت الدواسات بتاعت البنزين وكده هتلاقي الحته دي مش معزولة وممكن تلاقيها مش مرشوشه كمان ...

[MohammedAladel]

يعنى إيه رجلاش الفرامل إيه فايدته ؟

[lost2008]

العربية معايا بقالها 3.5 سنة و اكتر حاجة عجبانى ان سحبها حلو سواء التكييف شغال او مش شغال, فا اكيد عندك حاجة مش مظبوطة او تكون بتنقل بدرى.

[mada6680]

هما فعلا شدو الفرامل شوية يعنى فرملة اليد بقت من رفعة صغيرة كدة بتكلبش العربية
احتمال اكون عشان انا بنقل بدرى لانى لسة طالع من اوتماتيك بس انا سافرت بالعربية من غير تكييف فعلا السحب ممتاز والصوت ناعم جدا لكن بعد التكييف بلاحظ قلة السحب الى يحسسك ان التكيف حمل على العربية دا غير استهلاك البنزين الى بيزيد بشكل ملحوظ
دا غير طبعا شوية صفافير هوى طبعا جاية من سوء التقفيل وبانت لما قفلت الزجاج وشغلت التكييف

[loshabih]

هما فعلا شدو الفرامل شوية يعنى فرملة اليد بقت من رفعة صغيرة كدة بتكلبش العربية
احتمال اكون عشان انا بنقل بدرى لانى لسة طالع من اوتماتيك بس انا سافرت بالعربية من غير تكييف فعلا السحب ممتاز والصوت ناعم جدا لكن بعد التكييف بلاحظ قلة السحب الى يحسسك ان التكيف حمل على العربية دا غير استهلاك البنزين الى بيزيد بشكل ملحوظ
دا غير طبعا شوية صفافير هوى طبعا جاية من سوء التقفيل وبانت لما قفلت الزجاج وشغلت التكييف

كدا في احتمال فعلا ان الفرامل مشدودة زياده
اما موضوع استهلاك البنزين هيفضل كده لحد 5000 تقريبا وهيقل ان شاء الله

[Kareem Fawzy]

الرجلاش عالى قوى ارجعلهم تانى