باركولى

[Kareem Fawzy]

مليووون مبرووووك يا بشمهندس
ربنا يبارك لحضرتك فيها ان شاء الله
بس اهم حاجة ان التقرير يبقى شامل صور للعربية كلها علشان ينضم لاهم موضوعات القسم

[ahmed legend]

الف مبروك

[S O P H O S]

الف مبروك يا باشا ..

[koshary]

مبروك ياباشا

[Sindibad]

تقييم شامل للالنترا 2012 fully loaded

السلام عليكم

انا اخرت تقييمى من شهر 7 الى الن حتى اقيم السياره التقييم المضبوط
انا عملت بيها 3 الاف كيلو متر مابين السفر وداخل المدن وهى الى الأن عامله 5 الاف كيلو لأنى اشتريتها عامله 2 الف كم

هنبدأ من الخارج أولا

اللون :- أسود ملوكى وهو مخلى السيارة من الخارج تبدو ملمومة وليست كبيرة الحجم - رائع لما تكون السياره نظيفه وليس بها خرابيش - وحش لما يكون السياره مش نظيفة - كويس و احسن علشان العين
الشكل الخارجى :- اعتقد معظم الناس مجمعه على انها سياره ثورية الشكل وجميله فى نفس الوقت وانا شايف انها من اجمل السيارات المتواجدة فى السوق - تطوير حقيقى للشكل القديم - مس زى هوندا مثلا اللى صدمتنى بالشكل الحالى والسعر الحالى ايضا

جودة الدهان: ممتازة والسيارة كانت محكوكه حكه بسيطه فى الجنب لم تزيل البويه من على الرفرف وبالكاد تلاحظ التعرج فى الصاج

الصاج والهيكل الخارجى:- مش تقيل زى الألمانى ولكن ليس خفيف ايضا - وسط - الأبواب بتقفل وتفتح بسلاسة - تقفيلها ممتاز خاصة مع التموجات والتعاريج الكثيره مفيش فروقات وكله فى مكانه - المشكله فى ان اى خبطه هتكون عاوزه جراح متجميل مش سمكرى علشان يرجعها صح

الأضاءه الأماميه:- الواطى ممتاز - العالى علشان زينون فهو مكفى لتحت وانا عليته لفوق عند كهربائى وبذلك قتح مجال الرؤيه وأصبحت الأضائه ممتازة جدا

الشنطة:- هى واسعة الى حد ما يعنى اوسع من الهوندا السيفيك لكن اقل من الجيتا - لكنها فى رايي كافيه الى حد كبير ولكن فتحة الشنطة صغيرة لايمكن دخول اشياء كبيرة الحجم مثل كرسى صغير مثلا

اللأرتفاع عن الأرض :- تحك فقط فى المطبات الشاذة لكن معظم المطبات بتعدى عادى من غير ماتحك - يعنى نقول متوسطة الأرتفاع - لو حملت حمولات كتير السياره مش بتهبط كتير زى الشكل القديم لأن العفشه ناشفة مش طريه

الزجاج :- زجاج الأبواب والخلفى ملون ويفصل الحرارة بأمتياز يعنى متحسش بلسعة الشمس على ايدك او وجهك اما الزجاج الأمامى فهو من النوع الشفاف واعتقد انه يحتاج الى عازل حرارى

الحليات :- لا توجد حليات نيكل فى الأبواب او المقابض وده عيب من رأيى حتى النيكل فى فتحه الأكصدام الأمامى مش كتير ومش باين كان نفسى يبقى زى الجيتا أو الباسات لكن فيه اكسسوار نيكل كورى أصلى فى السوق ب 700-800 جنيه بيركب على حواف الأبواب ناوى اركبه فى العاجل ان شاء الله

المرايات :- الجانبيه مش طى كهربائى لكنها كبيره وموضحه الطريق جيدا و الداخليه مش ذاتية التعتيم وده عيب برضه لكن اعتقد ممكن اشتريها من بتوع الأكسسوار - لو حد عنده خبرة فى الموضوع ده يفيدنا

الزجاج الخلفى صغير والرؤيه ضعيفه عند الرجوع للخلف لكن حساسات الباركنج بتحذرك من اى عوائق خلفية مباشرة او خلفية جانبية

الجنوط مقاش 16 بوصه وشكلها الى حد ما جميل لكن كلاسيكى بعض الشىء - كان عاوز يبقى ثورى مثل السيارة نفسها والكاوتش ممتاز جدا وعريض وشكله حلو

يوجد فوانيس شبورة أضاءتها جميلة وقوية وكمان فى الخلف يوجد عواكس فى الأكصدام


الجوانب الأيجابية فى الشكل الخارجى كتير واكتر من السلبية واعتقد انها مرضية كتير

هكمل مع الداخل تباعا ثم الأداء على الطريق

سلام

م/ طارق منصور

[Motaz.Habib]

الف مبروك
ربنا يديكك خيرها و يكفيك شرها

[Sindibad]

نكمل التقييم

السلام عليكم

التقييم من الداخل:-

اولا وسائل الأمان:- توجد وسادتين و فرامل اي بى أس مفيش أي بى دي ولا اي اس بى وده طبعا بسبب غبور والمواصفات اللى بيطلبها - على العموم هى فيها الحد الأدنى من الأمان المطلوب وده طبعا بالأضافه لحزامات الأمان فى الأمام والخلف وهى مشدوده كويس بمعنى انها لما تفكها بترجع مكانها - الملحوظه دى كانت مضايقانى فى الهوندا سيتى

الكماليات:- المكيف تاتش منطقتين لضبط كل منطقه بدرجة حرارة مختلفه يعنى السائق غير الركب اللى جنبه - مفيش جريلة تكييف فى الخلف للكنبة التكييف ممتاز جدا وادائه عالى حتى فى الحر ولا يتسبب بهزه فى الموتور او عجلة القيادة - لكن بيأثر على سحب العربية خاصة فى الحر الشديد لكن التأثير لا يضايق لأن تقدر تعمل كيك داون وتفوت بسرعة عند اللزوم

الكاسيت ونظام الصوت :- جيد لكن لم يرقى لحالة الممتاز - الكاسيت زرايره ثقيله وتحس انه صينى من النوع الرخيص و انصح بتغييره لل GPS زى ما أنا ناوى وثمنه 2600 بالتركيب وبيشتغل مع المالتى فانكشن - يوجد وصلة يو أس بى وأى AUX - وايضا 6 سماعات - ويوجد بلوتوث للتحدث فى التليفون ويظهر رقم المتصل على الشاشة

أزرار التحكم الموجوده فى عجلة القيادة : عندنا على اليمين مثبت السرعة وعلى الشمال المالتى فانكشن - ملحوظه انا لم احتاج للمالتى فانكشن لأن الكاسيت مكانه فى متناول اليد واسهل فى التعامل - اما مثبت السرعة فهو من النوع المتطور وله عده خصائص منها انك تستطيع بعد تثبيت السرعة ان تزيد و تقلل السرعة من ازرار + و - يعنى تسوق من الدركسيون - ايضا تستطيع استعادة السرعة التى كنت مثبت عليها لو هديت سرعتك لأى سبب بضغطة زرار (+RES) ومن غير ما تدوس دواسة البنزين هتلاقى السياره سقطت نقله او اتنين حسب سرعتك اللى انت عليها دلوقتى والسرعة اللى انت كنت مثبت عليها وهتلاقى وحش انطلق بسرعة جبارة وييجى لحد السرعة اللى انت مثبت عليها ويعمل ستوب - جميل ومكانه فى الدركسيون افضل من الأوكتافيا مثلا اللى فى ذراع وراء الدركسيون

الفرش الجلد :- ممتاز لأنه معمول من الجلد المخرم خروم ضغيرة تعمل عملية تلطيف لحرارة الظهر ولونه رمادى - فيه منه بيج

الكراسى :- مريحة جدا - وطريه الى حد ما مش ناشفه ومش طريه قوى - وضع كرسى السائق يضبط لفوق وتحت ايضا - لكن مفيش دعامات الظهر (كان الأفضل تكون موجودة)

وضعية القيادة:- الرؤيه فى الأمام ممتازة - لكن فى الخلف ضعيفه لصغر حجم الزجاج الخلفى ووضعية القيادة مش تحس انك تحت زى السيفيك ومش تحس انك راكب الطريق زى الكورولا القديمة هى وسط وتقدر تضبط ده من ارتفاع كرسى

مساحات التخزين : كتيره وموجوده فى كل مكان - حامل الكواب ممتاز وواسع ويتسع لأكبر مج - يوجد كونسول كبير فى الوسط - يوجد اماكن تخزين فى الأبواب وعلى جانبى التابلوه فى المنتصف - وغيره


باور عجلة القياده :- ناعم جدا وسهل هو طبعا كهرباء (EPS electronic power steering) لكنه بيتقل على الطرق السريعة مش زى الموديل القديم - حدث تحسن كبير فى الموضوع ده واعتقد انهم استطاعوا حل المشكلة دى الى حد كبير


فتحة السقف :- لها عدة اوضاع وسهلة الأستخدام ومافيهاش اى افتكاسات

الباركنج سنسور :- الحقيقة ممتاز و عملى جدا لكن لا يوجد خريطة او شاشه توضح مكان العائق - لو ركبت ال GPS هيكون معاه كاميرا وده أفضل

خامات الدواخل :- التابلوه من الجلد - والأبواب ابضا من الجلد - بالأضافه لعحلة القياده لكن مقيض الجير بوكس لأ - الزراير تحس انها من نوع جيد وثقيله فى ايديك كده ومحملة - لون العدادات ازرق خفيف كعادة الألنترا القديمة والعدادات الدائريه تحسسك بالرياضية - لكن مفيش نواكل الا حته ضغيره فى مقبض الجير بوكس وده مأثر تأثير شديد على مظهر التابلوه


الموتور - طبعا 1600 سى سى - هادىء تماما تماما - لا تحس انك وانت واقف انه شغال - العزم بتاعه مش عالى قوى زى الألمانى لكن تجميعه وانت مش محمل كويس - ملحوظه فيه نظام اسمه ECO وده لو انت مشغله السياره بتوفر بنزين لكنها بتبقى تقيله فى التسارع جدا ولو مش مشغله السياره تسارعها جيد ولو شغلت على المانوال مود (ستبترونيك) حاجه رهيبه بصراحه تسارع جامد وقوه عاليه - استهلاك البنزين ممتاز فى الطرق السريعة 7-6 لتر لكل 100 كم - متوسط فى داخل المدن 10-11 لتر لكل كم مع مراعات ان البنزين يكون 92 وعلى فكره مفرقشى كتير ال95 معايا كنت مفكر انه هيكون أفضل كتير لكن لقيته مش فارق .


الجير بوكس :- 6 سرعات ونقلاته متحسش بيها خالص ناعمه وسلسه وبينقل بدرى لو على نظام Eco ومتأخر لو مش على نظام ال ECo - عند سرعة 120 كمظساعة الأر بى ام بيكون على 3100 وده ممتاز جدا لانك مبتحسش بصوت الموتور على السرعات العالية

عزل الكابينة :- جيد - الى سرعة 120 كمظساعة وبعدين تبدأ تحس بشوية صوت رياح كلما ازدادت السرعة لكن مع تشغيل الكاسيت على صوت واطى مفيش اى مشاكل لأنه بيغطى على صوت الرياح

العفشة :- لم تكن مريحة فى الأول لكن مع الوقت بالأضافه لأنى خليت الكاوتش نتروجين والضغك 28 الأمور اتحسنت - مما لا شك فيه ان العفشه الخلفية سيئه جدا مع النقر والمطبات اللى هى عباره عن شرايط بالعرض دى يتعمل صوت عالى ورجرجه فى السيارة و احيانا بلاقى السيارة طيزت ولامؤاخذه يعنى لو حد جنبى ممكن أخبطه بالجنب وده عيب خطير أيضا لما أحيانا يكون الأسفلت بايظ من السيارات النقل ومفيش استواء للأسفلت بلاقى السياره انحرفت بشده على اى جنب - لذلك لو واجهت حاجه زى كده فجأه وانا ماشى بأكون قلقان جدا وأحاول امسك عجلة القيادة كويس - لكن على العكس فى الطرق الممهدة السيارة ثابته وفى المنحنيات ممتازة

التقييم العام :- جيده الى جيده جدا - الفئات اللتى هى أفضل منها وفى نفس رانج السعر مفيش لكن ممكن تشترى أوكتافيا مستعملة حالتها حلوة مو 2010 - 2021 سبورت او اليجانس بنفس سعر الزيرو منها وهتكون صفقة أفضل فى رأيي .


ممكن تجيب الرينو الفلونس لكن الموتور بتاعها بصراحة مش قد كده خنيق وصغير على السيارة

الفورد الفوكس بديل معقول لكن سعر اعادة البيع فى الأرض ومش منتشره قطع غيارها ولا اكسسوارها


الهوندا سيفيك VTI موديل 2010 -2011 بديل ممتاز أيضا لكن شرط الحالة تكون ممتازة والأقتناء يكون لفتره طويله علشان سعر اعادة البيع


لكم جزيل الشكر والصور هارسلها تباعا وشكرا

[Ashraf_Ibrahim]

ألف مبروك على العربية
ويارب يحميهالك ويديلك خيرها ويحفظك من شرها يا رب

[sabregas2010]

الف مبروك وربنا يباركلك فيها ويحفظهالك

[chicobon]

الف الف الف مبروك ربنا يباركلك فيها

[ICE_MAN]

الف مبروك عليك العربية .. ربنا يباركلك فيها و يديلك خيرها و يكفيك شرها