خبط الrb ومحتاج رايكم فى تصليحها

[atyam]

بسم الله الرحمن الرحيم

الحمد لله وقدر الله وماشاء فعل

من يومين خبط عربيتى الاكسنت ار بى فى رصيف شمالى مخدتش بالى منه وجاب العتبة الشمال اللى تحت الباب بتاعى والعتبة اتطبقت لجوه والصورة التالية لشكل الخبطه


المهم تانى يوم الخبطه روحت التوكيل وقولت اعملها تبع التامين وانا مامن مصر للتامين
وفى التوكيل قالولى ان العتبه هتحتاج تتغير وسعرها 2500 جنيه ومصنعيات
فك وتركيب العتبه 500 جنيه
فك الفرش الداخلى 150
دهان العتبه 250 جنيه


وروحت شركة التامين بالمقايسة والمهندس اللى بيعاين قالى مشوفتش اى حد تانى يعملها من غير متغير العتبه؟؟ ونزل طبعا فى سعر المصنعيات

ودلوقتى انا مش عارف اعملها فى التوكيل وهيدفعونى مبلغ كبير وهعد فتره على ما شركة التامين تردهولى بعد ميقصو منه حوالى 20% ولا اشوف سمكرى كويس يعملها سمكرة من غير مغير العتبه؟

[M.belal]

يا فندم ممكن حضرتك تعملها من غير ما تغير العتبه
سمكرى نصيف يردهالك صح وترشها مش هتكلفك 300ج ولا 400 حتى ع الاكتر
انا عندى كان العتب مش باين اساسا السمكرى بيشده بحاجه كده اسمها شداد وبيساوى الاخرام وبعد كده المعجون والرش بيدارى كل حاجة
اسعارهم دى مستفزة جدا

[eng.m7md.ali]

انت عارف يعني ايه تغيير عتب في مصر؟

[drmagieed]

توكل علي الله وروح لسمكري نضيف ومش هتعرف العتبة السليمة من المخبوطة ... وبالتوفيق إن شاء الله وخللي بالك

[HOSSAM99]

قدر الله و ما شاء فعل
الخبطه بسيطه الحمد لله
حضرتك هاتتفق مع سمكري إنه يعملها و ليكن بكره هاتوديله العربيه هايردها بأسياخ نحاس بتتلحم في المكان المخفوس و بتتنطر و بيجلخ و ينعم و تطلع علي بوهيجي و هايرشها مش هاتاخد يومين
و مبتعبش العربيه
لكن حضرتك تقطع العتب و تركب عتب جديد هي دي الأهانه الصريحه للعربيه
بالتوفيق

[د. علاء ابراهيم]

اللى اتقال فى التوكيل ده شىء لا يرضى ربنا ابدا
يا عم دى بسيطة خالص
السمكرى يردها بس على السخن و تترش عند واحد بتاع دوكو كويس
و بس خلاص
الموضوع بسييط اوى و اى حاجة غير كده مش بس هتكون فلوس زيادة اتصرفت لكن هتكون اذية للعربية

[minicooper20]

هى العتبه دى لحام و لا كلبسات

[Hmatchy]

هو لو فى امكانية انك تسمكر عند سمكرى نضيف و تدهن العتبة ب 250 جنيه فى التوكيل علشان تضمن ان ميكونش فى اختلاف فى اللون

[atyam]

الف شكر للردود وفعلا انا مش ميال خالص لكلام التوكيل وان شاء الله اشوف سمكرى كويس يعملها

[limo81]

هو لو فى امكانية انك تسمكر عند سمكرى نضيف و تدهن العتبة ب 250 جنيه فى التوكيل علشان تضمن ان ميكونش فى اختلاف فى اللون

تمام....فكره حلوه

[drmagieed]

طيب دلوقتي إنت مقولتش لنا عملت أية في الموضوع ده علشان الناس في المنتدي تستفيد

[atyam]

مهو لو كان جديد كنت اكيد هقول ياباشا
بس قررت انى ممشيش ورا كلام التوكيل وبعد رمضان ان شاء الله هشوف سمكرى كويس يعملها لانها مش مستاهلة تغير عتب بردو
والف شكر للمتابعة :)

[drmagieed]

علي فكرة أنا بأسأل لأن العتبة عندي خدت خبطة أقل من بتاعتك شوية وإتردت علي البارد ودهنت بعدها ... وربنا يوفقك للصح وإبقي طمنا عليك

[atyam]

علي فكرة أنا بأسأل لأن العتبة عندي خدت خبطة أقل من بتاعتك شوية وإتردت علي البارد ودهنت بعدها ... وربنا يوفقك للصح وإبقي طمنا عليك

ياباشا تسلم على السؤال وان شاء الله اول مصلحها هقول عملت ايه بالظبط

[عقاري الصوابر]

هو لو فى امكانية انك تسمكر عند سمكرى نضيف و تدهن العتبة ب 250 جنيه فى التوكيل علشان تضمن ان ميكونش فى اختلاف فى اللون

كلامك مضبوط جدا علشان لون العربيه والعتب مايتغيرش وبالتوفيق إن شاء الله