ضفيرة الفيرنا

[amgadfox]

يا جماعة انا لسه مشترى عربية فيرنا موديل 2004 بس العربية مش مظبوطة خالص معايا ولمبة check كل شوية تنور وتطفي لوحدها والعربية ساعات تتخنق وانا ماشي على سرعة وتبطل ... المهم كشفت عليها طلع فيها شغل جامد فى الضفيرة واتقالى ان لازم اغيرها عشان فى فيش ناقصة واسلاك متوصلة بلدي مش داخلة على الكنترول اصلا ... فأنا عايز اعرف اجيب ضفيرة استيراد منين وبكام ؟؟؟؟ واعرف انها كويسة ازاى
وواضح ان العربية فيها مشاكل فى الموتور كتير فحتاج مساعدة الخبراء منكم بس المهم اشوف موضوع الضفيرة ده الاول

[Kefo_Honda]

الاحسن إن حضرتك تجيب المكنة بـالضفيرة استيراد طالما الموتور كمان فيه مشاكل

[HOSSAM99]

هاتها من الحرفيين إنما سعر الحقيقه ما صادفنيش قبل كده
للعلم الحرفيين هاتبقي أغلي حاجه بسيطه من محلات الإستيراد اللي بره
و أشتري علي التجربه و بعد كده لو طلع حاجه في الموتور أبقي صلحها أو لو إحتاج تغيير غيره
أبقي طمنا عملت أيه

[mahamedaraby]

الاول شوف الدنيا بايظه لحد فين بمعنى هل ده عيب ضفيره بس ولا موتور كمان علشان لو الاتنين يبقى وفر فلوسك وروح اشترح موتور بضفيره بالفتيس وريح نفسك لو الضفيره بس هاتها استيراد من الحرفين او فيه محلات بيتبعها جديده علشان هى تقريبا تصنيع مصرى الضفيره الاصليه بتاعت العربيه

[amgadfox]

بجد شكرا على اهتمامكم ... انا لما جيبت العربية كشفت اساسيات بس انما مكشفتش ماتور المهم لما كذا واحد شافها قالى الموتور خفيف شوية ولما روحت اغير بوجيهات لقيت البوجيه التالت والرابع جايبين زيت من تحت وبردو فى دخنه بيضا خفيفة لما بزود جامد ... فالما بدأت اشوف المشاكل دى لقيت لعب جامد فى الفيش والاسلاك وحاجات ملغية زى ما كتبت فى الاول
السؤال بقى : المكانيكي قالى احنا نغير الضفيرة وبعد كده نشوف الكنترول عشان احتمال يطلع بايظ فأنتوا ايه رأيكو اظبط حاجه حاجه ولا اغير الماتور بالضفيرة وهيكلف كام وهل هيبقى احسن ولا اعمل كل حاجه بمعرفتى وعلى ايدي ؟؟؟ وشكرا ليكم تانى

[weta]

اطلع علي التوكيل وعمل كشف شامل وهو هيحددلك ايه البايذ علي اساسه تبتدي المشوار ...راي الشخصي وديها التوكيل وصلحا في التوكيل بس هدفع جامد بس هتستلم عربيه زيرو ..او بعها علي عبها

[amgadfox]

يعنى هو التوكيل شغلوا عدل اوى انا شفت تجارب هنا ومع ناس اعرفها بيشتكوا من التوكيل جامد بس هي فكرة تشكر عليها طبعا ياباشا ولو مقدرتش اوصل لحل جذري هيبقى التوكيل اخر حاجه ان شاء الله

[asaeed]

مش لازم التوكيل... فيه مراكز خدمة معتمدة لهيونداي في أماكن كثيرة.... اسأل على أشهرهم سمعة وأمانة في الصنعة... وروح له وهتبقى انت الكسبان خصوصًا أن لما مركز خدمة معتمدة لهيونداي فقط... هيعرف العيب من فين بالضبط لأنه اتعرض عليه مشاكل كتييييييييير وقام بحلها أكيد..
بس خلي بالك لو الموضوع هيكتفي على الموتور والضفيرة بس هتبقى بسيطة... لكن لو العربية ملعوب فيها جامد... يبقى أنصحك متصرفش عليها جنيه.. وبيعها... لأنك انت مهما صرفت عليها هتبقى انت الخسران..

[helper]

بيييييييييييييع فورا
و لا كلمة و لا تروح و لا تيجي
هتندم اشد الندم لو عملت فيها اي حاجة
ولازم تعرف الي هتبيعهالوا الكلام دا علشان حرام و اخسر فيها احسن ما تخسر راحتك و هتضايق جدا
تغور وقفة الصنايعية