تقرير عن زيارة غبور فرع العبور وصيانة ال 1000

[fanky_fanky]

السلام عليكم ....

ده تقرير عن زيارتي لغبور العبور وصيانة الألف للفيرنا وهحاول اني اكون حيادي واحكي اللي حصل بالظبط ويارب يكون فيه افادة ليكم.

هحكيلكم من البداية .. كنت يوم الجمعة مش عارف العنوان بالظبط عملت موضوع هنا في المنتدي قلت اني رايح يوم السبت ومحتاج اعرف وصف غبور العبور من صلاح سالم .. ورد علي صديقنا Ayman-Ahmed وقالي وصف تفصيلي للطريق .. ف توكلت علي الله يوم السبت الصبح ونزلت رحت..

وصلت التوكيل الساعة 10 تقريباً .. استقبلني الاول عامل الجراج .. ودخلت ركنت العربية ووقفت حوالي 20 دقيقة وجالي مهندس الأستقبال .. سالني في اي مشاكل في العربية .. قلتله لأ الحمد لله مفيش غير مرايةا لصالون كانت وقعت مني من كام يوم لوحدها والله .. بعدلها لاقيت المراية طلعت في ايدي .. قالي خلاص نخلص وبعدين اطلع علي قسم الهياكل يلزقوها .. تمام قلتله تمام، قالي طب والزيت هتحط 10000 ولا5000 وهما طبعاً بيستخدموا زيوت شل .. انا كنت عامل حسابي علي 10000 بس قلت اسأل المهندس بردو انهي افضل قالي ال 10000 افضل لموتور العربية .. قلتله خلاص نتوكل علي الله ونديها 10000 .. قالي ماشي حضرتك اتفضل في الاستراحة وخلال ساعتين هننده علي رقمك وكانت الساعة بقت حوالي 10.30 ...

دخلت الأستراحة وكنت مبسوط جدا لاني هقعد في التكييف وانا صايم بقي ومفرفر

فضلت مستني عمال الف والعب في الموبيل ودخلت ال show room قلت اتفرح علي العربيات الجديدة وادخل الحمام اغسل دماغي من التعب علشان افوق لحد ما الساعة بقي 12.30 يعني كان عدي ساعتين تقريباً ومحدش نده علي الرقم بتاعي .. قلت انا هستني ربع ساعة واروحلهم .. مكملتش 10 دقايق لاقيت الرقم بيتنده .. رحت استلمت ورق العربية ورحت للمهندس شرحلي انهم غيروا زيت وفلتر وان العربية الحمد لله مفيهاش مشاكل .. وقالي اتفضل عند الخزينة علشان تدفع وتختم كتيب الضمان وتروح تستلم العربية.

رحت الخزينة دفعت بالظبط 293.5 قيمة الزيت والفلتر وخدت الفاتورة رحت عن جراج الصيانة استلم العربية .. وقفت عند بوابة عليها امن اخد مني نسخة من ورق دخول وخروج السيارة من الصيانة ونده علي سواق جاب العربية لحد عندي .. ولما حاولت ادي السواق اللي جاب العربية تيبس .ز رفض وقالي لأ ياباشا خلاص ... وبكده كانت الصيانة خلصت وقلت هطلع علي الهياكل لانها مش في نفس مكان الصيانة العادية.

طلعت بالعربية .. الصراحة حسيت انها مختلفة للأفضل .. صحيح محستش بفرق كبير بس كان في فرق ... واتجهت علي قسم الهياكل... رحت لاقيت بتاع الأمن واقف علي بوابة الهياكل بيقولي .. اسف مش هقدر ادخل العربية .. ليه ياعم؟ قالك اصل عندنا تعليمات مندخلش غير السمكرة والدوكو .. قلتله احنا هنهرج .. انا مشتري عربية جديدة والمراية تقع واجي التوكيل وتقولي كده .. انا عايز المسئول عن قسم الهياكل اتكلم معاه ... قالي طب حضرتك اتفضل اركن العربية بره وادخل قابله ...

دخلت وانا مغلول وناوي اتخانق واعمل مشكلة كبيرة .. المهندس قابلني قلتله مش معقول كده المراية تقع والعربية جديدة وعايزني اجي المشوار ده تاني علشان الزق المراية ما انا مش هلزقها بره لاني ماليش دعوة انتم المسئولين .. قالي خلاص احنا هنعملها لحضرتك اتفضل دخل العربية .. دخلت العربية استلمها مني سواق تاني ودخلها للفني .. ورجعهالي بعج ربع ساعة وكانت المراية ملزوقة وكله تمام .. خدت العربية وروحت البيت وانا مبسوط اني خلصت من المشوار بتاع الصيانة.

الانطباع النهائي .. المكان محرتم وشكله شيك .. ومريح نفسياً والتعامل محترم مع الناس اللي هناك .. نسيت اقول اني نسيت موبيلي عند الخزنة ورجعت سالت عليه لقيته عند الموظف .. وبغض النظر عن موقف الهاياكل بتاع المرايا ده .. الا اني ارتحت نفسياً هناك ...

وأسف جداً جداً للأطالة واتمني اكون قدرت اقدم تقرير معقول عن الزيارة

[م.محمد علاء]

شكرا على التقييم..
أنا مريت بتجربه مريره في مركز أبو رواش..
من أول مدخلت التناكه في كل الوشوش..زحااااااام رهيييييب..
العربيه كان فيها شكوى..طلعت بيها..
عصبتني حاجه بقى..مهندسة الإستقبال بتقولي شيل وش الكاسيت والأريال و الولاعه.و كفاية السجاير. و خليهم معاك.
قولتها معايا إزاي يعني؟!؟!
قالتلي أي حاجه خايف عليها خليها معاك..
قولت بقى كلام من نوعية إثبتيها مع العربيه إنها داخله بيهم.و أكيد أنا مش حشيل شكاره و أحط فيها الحاجات دي.
الخلاصه..خدمة العملاء سيئه ولا تشعرك براحه نفسيه.

[fanky_fanky]

شكرا على التقييم..
أنا مريت بتجربه مريره في مركز أبو رواش..
من أول مدخلت التناكه في كل الوشوش..زحااااااام رهيييييب..
العربيه كان فيها شكوى..طلعت بيها..
عصبتني حاجه بقى..مهندسة الإستقبال بتقولي شيل وش الكاسيت والأريال و الولاعه.و كفاية السجاير. و خليهم معاك.
قولتها معايا إزاي يعني؟!؟!
قالتلي أي حاجه خايف عليها خليها معاك..
قولت بقى كلام من نوعية إثبتيها مع العربيه إنها داخله بيهم.و أكيد أنا مش حشيل شكاره و أحط فيها الحاجات دي.
الخلاصه..خدمة العملاء سيئه ولا تشعرك براحه نفسيه.

هو في العبور محستش بتناكة .. بس فعلا حصل موضوع الولاعة ووش الكاست ده معايا بس موصلتش للطفاية والاريال .. وانا عملت زيك بس عرفت انهم بيعملوا كده علشان ميوجعوش دماغهم .. رحت شايلهم وسبتهم في شنطة العربية

[Ashraf_Ibrahim]

مبروك صيانة الألف يا عزيزي
بالفعل زيت 10000 افضل للموتور
وعقبال ال 100000 كم ان شاء الله
انا مزورتش غبور العبور بس ناوي ان شاء الله اعملهم زيارة بدون صيانة زيارة للتقييم ليس الا :d

[fanky_fanky]

مبروك صيانة الألف يا عزيزي
بالفعل زيت 10000 افضل للموتور
وعقبال ال 100000 كم ان شاء الله
انا مزورتش غبور العبور بس ناوي ان شاء الله اعملهم زيارة بدون صيانة زيارة للتقييم ليس الا :d

الله يبارك فيك ياصديقي

المكان حلو ويستحق الزيارة

[koshary]

مبروك ياباشا على الصيانة ربنا يباركلك فى عربيتك

[fanky_fanky]

مبروك ياباشا على الصيانة ربنا يباركلك فى عربيتك

الله يبارك فيك ياكبير وربنا يسترها علينا كلنا

[S O P H O S]

مبروك الصيانة
والحمد الله ان اليوم عدي كويس ..

[mshmshm3]

كلام جميل ده بالنسبة لفرع العبور لكن فرع ابو رواش مش كدة خالص

[fanky_fanky]

مبروك الصيانة
والحمد الله ان اليوم عدي كويس ..

الله يبارك فيك

والله انا كنت شايل هم اليوم بس الحمد لله دي زي الفل

[fanky_fanky]

كلام جميل ده بالنسبة لفرع العبور لكن فرع ابو رواش مش كدة خالص

انا مرحتش ابو رواش ولا قليوب لان دي اول صيانة ليا اعملها في توكيل .. لان الفيرنا اول عربية زيرو اجيبها الحمد لله

[Ayman-Ahmed]

الف مبروك على الصيانة والتقرير الجميل والوافى وبامر الله مطروحش الا للصيانات.

[fanky_fanky]

الف مبروك على الصيانة والتقرير الجميل والوافى وبامر الله مطروحش الا للصيانات.

الله يبارك فيك .. وربنا يكفينا كلنا شر الطريقو شر العربيات ويدينا خيرها ...

[شارلي شابلن]

بس لي سؤال بسيط ليه زيت ال 10000 افضل للموتور .. وشكر

[BUNSH]

مـــــــــبروك على الصيانة وربنا يباركلك فيها ..

انا مرحتش ابو رواش ولا قليوب لان دي اول صيانة ليا اعملها في توكيل .. لان الفيرنا اول عربية زيرو اجيبها الحمد لله

كويــــــــــس انك مروحتش قليــــــــــوب