طلب العون من اهل الخبرة - هيونداى ماتركس

[ENG_AAHMED]

هذه اولى مشاركاتى واتمنى العون من اهل الخبرة

وفقنى الله فى شراء سيارة هيونداى ماتركس موديل 2005 واكتشفت ان صاحبها بيستعمل بنزين 80 لمدة عام كامل تقريبا ):

دلوقتى عاوز اعرف اعمل ايه فى الفترة اللى جاية لتنضيف تنك البنزين وايه هى اهم الاساسيات اللى لازم اعمل اول ما استلم العربية - علما انى جديد فى هذا المجال

وجزاكم الله خير - اخوكم محتاس

[MohammedAladel]

هو معنى إنه بيستخدم بنزين 80 إن التانك وسخ وإنه لو كان بيستعمل 90 أو أعلى كان هيبقى التانك نضيف ؟
نظافة التانك على حسب البنزينة اللى بتفول منها مش على حسب نوع البنزين

إنت المفروض إنك تشوف هى بتشتغل أساسا بنزين إيه وتغير فلتر البنزين وتحط منظف حقن
ولو عايز تنظف التانك يبقى لازم تفك الطبة بتاعته من تحت وتفضى البنزين اللى فيه

[Samir Elshahawy]

أولا.. ألف مبروك عليك و ربنا يؤتيك خيرها و يكفيك شرها و شر الطريق و بالنيابة عن كل نجوم هيونداي بأرحب بيك نجما جديدا في قسم النجوم

- بداية أستخدم بنزين 92 من محطة موثوق بها
- يفضل أستخدام منظف رشاشات جيد
- لو فيه مشاكل في السحب أو دخان أو تأخير في تشغيل المحرك أنصحك بزيارة موضوع اللمهندس / هاني ميخائيل أو كتابة مشاركة تشرح فيها شكواك بالموضوع التالي :

http://www.nilemotors.net/Nile/287642-speed-service-center-enghany.html

كما يمكنك الاتصال بالمهندس / هاني شخصيا علي تليفونه المكتوب داخل الموضوع

[ENG_AAHMED]

اشكرك على ردك م/ سمير واللى لاحظته من التجربة ان السحب عادى ومفيش اى مشكلة انا فوجئت بس لما صاحبها قالى فقلقت

معنى كده انى استخدم منظف رشاشات جيد واستخدم بنزين 92 على ال 80 اللى موجود ولا لازم افضى التنك من ال 80 الاول

بجد انا سعيد بمشاركتى معكم فى المنتدى

ويا ريت تنصحنى اعمل ايه فى الاول
زى تغير الزيت و نصحونى بسير الكاتينة يتغير كمان ايه تانى

[Ashraf_Ibrahim]

عادي جدا منظف انجكشن وحط 92 مفيش اي مشاكل بدون ما تفضي التانك او حاجة
لا تقلق يا عزيزي

[dragking]

غير فلتر البنزين بالاضافة لمنظف الرشاشات واعتقد يجب تنظيف البوابة عند اي ميكانيكي

[ENG_AAHMED]

ايه المطلوب اعمله تانى اول ما استلم العربية غير منظف الرشاشات ؟؟؟

[Ashraf_Ibrahim]

عداد العربية عامل كام؟!

[ENG_AAHMED]

عداد العربية عامل 103000 كم - موديل 2005 كورى
وصاحب العربية تقريبا مش مهتم بيها لدرجة انها محتاجة غسيل من بره وجوه تقريبا متغسلتيش من سنة ):

[Ashraf_Ibrahim]

طب بص اديها طقم سيرفيس كامل واعتبر ان العربية متعملهاش صيانة خالص
يعني طقم سيور
طقم بوجيهات
طقم فلاتر
وغيرلها الزيوت بتاعتها كلها من فرامل وباور وموتور وفتيس وكله

[motoxp]

كلام سليم جدا يا اشرف

سرفيس كامل و ان شاء الله هتضبط معاك

[ENG_AAHMED]

اشكرك على ردك

ممكن حد يساعدنى ويعرفنى اسعار قطع الغيار ايه ؟؟ وايه افضل مكان

[motoxp]

ابراهيم البنا فى التوفيقية ممتاز

وبرضه فيه هناك جورج حلمى برضه كويس

عايز تعرف سعر ايه بالضبط ( فلتر البنزين ب 110 جنيه اصلى )

البوجيهات ngk واحد شمعة ب 55 جنيه