فيرناوى جديد ومحتاج رأيكم

[ggaamm]

السلام عليكم ورحمة الله وبركاته

أنا الحمد لله غيرت العربية من اسبوعين وجبت فيرنا 2008
وكان عندى حبة استفسارات عليها

أولاً الموتور اللى فيها 1500 سى سى 12 صباب وهو متغير مش بتاع العربية لأنها جابت وش وصاحبها قرر يغيره كله

دلوقتى انا عاوز اعرف هل الفرق كبير بينه وبين ال1600 ؟؟ مع العلم انى ركبت ال1600 وحسيت ان عربيتى اسرع فى التجميع مع ان الطبيعى ان الموتور الأكبر يكون اشد .. ولا ممكن يكون الموتور الجديد اللى راكب ده فيه حاجة زيادة او مش بتاع الفيرنا اصلاً !!؟؟


ثانياً نيجى للمشاكل اللى خنقانى :

1- بحس برجرجة فى الكاوتشات فى الطلعة السريعة " شبه حرق " .

2- لما بزود بنزين اوقات بسمع صوت كركرة كده خفيفة مع انى بحطلها 90 او 92 .

3- فيه دايماً صوت صفارة عالى جاى من جنب العربية من ورا ومستمر على طول مالعربية دايرة .

4- كذا مرة اكون مشغل التكيف واحس بأن العربية بتموت كده وتتسحب اول مالتكيف يشتغل واول مايفصل تنطلق وده عالسرعات المتوسطة .

5- حصل معايا حاجة تانى بخصوص التكيف وهى انى مرتين اكون ماشى وفجأة أسمع صوت خبطة قدام وصوت رفة كده زى بتاعت رمان بلى العجل واول ما أهدى واطفى التكيف تسكت !!
ولو شغلت التكيف تانى مش بتظهر ,, فهى بتيجى بظروفها لكن المرتين وانا مشغل التكيف واول ما أطفيه او اطفى العربية يسكت الصوت ومايظهرش بعدها !!

6- دايماً بحس بنتشة عالتانى اول ما أكبس بنزين واوقات تظهر عالتالت بس بتكون خفيفة .

7- من حوالى 3 ايام كده غيرت المية كلها لمية خضرا وفجأة تانى يوم اسمع زى صوت تنفيس وانا مشغل التكيف روحت طافى ونزلت لقيت بخار جامد من خرطوم الفايظ روحت فاتح القربة وسبتها شوية ويعدين كملت فى طريقى ,,, راح الصوت لكن فجأة ببص عالحرارة لقيتها عدت النص وقفت على طول وبطلت العربية وسبتها شوية وفتحت الريدياتير وطبعاً المية فارت كلها .. المهم زودتها تانى بعد مادورت وعادى كأن مفيش اى حاجة !!
وبصراحة انا قلقان وهتجنن فى نفس الوقت من الموقف ده ومش عارف السبب وكمان خايف يتكرر

8- عندى صوت خبطة ورا السواق كده ومابيظهرش غير لما باخد حفرة حنينة .. روحت لبتاع العفشة وفكينا المساعد وبصينا عالياي وعملنا البدع وبارضو الصوت زى ماهو وآخر ما يأس قالى شوف حد بتاع شكمان يمكن يكون هو السبب !! .. وبصراحة انا مش عارف سبب الخبط ده ايه مع ان المساعد سليم والياي بارضو وكل العفشة مربطة وسليمة .



دلوقتى انا بقى عاوز منكم شوية نصايح بخصوص العربية وعاوزكم تظبطونى :))

وعلى فكرة انا غيرت كل السيور وغيرت زيت وطبعاً البوجيهات وفلتر بنزين ومية الريدياتير ودورت على فلتر التكيف وعرفت ان ملهاش :)) وغيرت تيل قدام ورجلاش فرامل خلفى وركبت جنط 15

أيه ناقص كده اشيك عليه وايه المفروض اعمله وكمان ايه حل المشاكل اللى فوق دى كلها
مع العلم ان اى حد اقله على اى مشكلة يقولى احطها على الجهاز وطبعاً أقل طلعة للجهاز ب 40 جنيه ههههههههههههه

تحياتى للجميع ومنتظر مشاركتكم

[ggaamm]

مشكلة تانى ياجماعة نسيتها معلش :

اوقات بحس ان صوت الموتور عالى لوحده كده كأنى مزود بنزين وال rpm بيبقى رافع .. يريت تشوفولى حل الحوار ده كمان

[misoalex]

ايه العيوب دى كلها يا باشا
اولا الف مبروك بس انت مكشفتش على العربيه كويس ليه واخدتها على كده بكام ..؟؟

[sabregas2010]

الف مبروك على العربية
بس كان لازم قبل ما تشتريها كنت تروح التوكيل او اى وكيل صيانة معتمد يكشف على العربية ويقولك اذا كانت سليمة او فيها عيوب
عموما اعتقد الحاجات دى كلها بسيطة ان شاء الله

[HAITHAM1985]

السلام عليكم ورحمة الله وبركاته

أنا الحمد لله غيرت العربية من اسبوعين وجبت فيرنا 2008

مبروووووووووك

وكان عندى حبة استفسارات عليها

أولاً الموتور اللى فيها 1500 سى سى 12 صباب وهو متغير مش بتاع العربية لأنها جابت وش وصاحبها قرر يغيره كله

عااااااااااادى

دلوقتى انا عاوز اعرف هل الفرق كبير بينه وبين ال1600 ؟؟ مع العلم انى ركبت ال1600 وحسيت ان عربيتى اسرع فى التجميع مع ان الطبيعى ان الموتور الأكبر يكون اشد .. ولا ممكن يكون الموتور الجديد اللى راكب ده فيه حاجة زيادة او مش بتاع الفيرنا اصلاً !!؟؟

الفرق قليل لأن مكانيكا الموتورين واحدة وهيبان الفرق لو شديت مع واحدة تانية 1600 لسه جديدة

ثانياً نيجى للمشاكل اللى خنقانى :

1- بحس برجرجة فى الكاوتشات فى الطلعة السريعة " شبه حرق " .

دى غالبا بسبب الجنط اللى أنت حطيته غالبا الجنط مش مناسب وكنت أفضل إنك تكتب مقاسات الكاوتش علشان نعرف نساعدك أكتر لأن المسموح إنك تعلى المقاس درجة وعرض الكاوتش درجة عن مقاسات العربية القياسية بمعنى لو كان الجنط 14 والعرض 165 يبقى ممكن يكون 15/175 ...... بس هيا مشكلة أكييييييد متعلقة بالجنط أو هوا الكاوتشات أو ترصيص أو ظبط زوايا ودى كلها حاجات تتعمل فى مكان واحد

2- لما بزود بنزين اوقات بسمع صوت كركرة كده خفيفة مع انى بحطلها 90 او 92 .

لو بيبقى صوت تاكيهات يبقى التاكيهات عايزه تتظبط ولو صوت كركرة فتيس فده موال تانى وهيا غالبا تاكيهات بس غريبة لأن الموتور جديد يعتبر

3- فيه دايماً صوت صفارة عالى جاى من جنب العربية من ورا ومستمر على طول مالعربية دايرة .

الصوت ده لو بيبقى موجود وأنت ماشى على سرعات يبقى من الإزاز أو المرايات عندك إزاز مش حابك فى القفل

4- كذا مرة اكون مشغل التكيف واحس بأن العربية بتموت كده وتتسحب اول مالتكيف يشتغل واول مايفصل تنطلق وده عالسرعات المتوسطة .

5- حصل معايا حاجة تانى بخصوص التكيف وهى انى مرتين اكون ماشى وفجأة أسمع صوت خبطة قدام وصوت رفة كده زى بتاعت رمان بلى العجل واول ما أهدى واطفى التكيف تسكت !!
ولو شغلت التكيف تانى مش بتظهر ,, فهى بتيجى بظروفها لكن المرتين وانا مشغل التكيف واول ما أطفيه او اطفى العربية يسكت الصوت ومايظهرش بعدها !!

كل اللى أنت قولته عن التكييف ده إحنا كلنا مرينا بيه ...... التكييف كمكون ميكانيكى كهربى يعتبر عبء على المواتير حتى 1800 سى سى مع إن فيه ناس كتيييييير هاتعارضنى بس مش مشكله ....... من ناحية تانية تكوينات التكييف لابد وان تكون كلها سليمة حتى يعمل التكييف بسلاسة ويكون تأثيره على السحب أقل ما يمكن " الكومبريسور + بلية الكومبريسور + الوصلات + الشحن + سير التكييف اللى هوا غالبا عندك سير المجموعة + المراوح " دى أغلب حاجات لاااااااازم تشيك عليها وأنا حاسس إنها البلية مادام التكييف يعمل بصورة مرضية

6- دايماً بحس بنتشة عالتانى اول ما أكبس بنزين واوقات تظهر عالتالت بس بتكون خفيفة .

النتشة دى يأما منك لأنك مبتشلش رجلك من على الدبرياج بنعومة ........ أو لا قدر الله دى بدايات أعراض طقم دبرياج

7- من حوالى 3 ايام كده غيرت المية كلها لمية خضرا وفجأة تانى يوم اسمع زى صوت تنفيس وانا مشغل التكيف روحت طافى ونزلت لقيت بخار جامد من خرطوم الفايظ روحت فاتح القربة وسبتها شوية ويعدين كملت فى طريقى ,,, راح الصوت لكن فجأة ببص عالحرارة لقيتها عدت النص وقفت على طول وبطلت العربية وسبتها شوية وفتحت الريدياتير وطبعاً المية فارت كلها .. المهم زودتها تانى بعد مادورت وعادى كأن مفيش اى حاجة !!
وبصراحة انا قلقان وهتجنن فى نفس الوقت من الموقف ده ومش عارف السبب وكمان خايف يتكرر

غالبااااااااااااااااا المروحة مشتغلتش ودى مشكلة ترموستات فالحل إنك تركب ترموستات تشتغل على حرارة أقل زى مثلا 95 مش 105 أو 112

8- عندى صوت خبطة ورا السواق كده ومابيظهرش غير لما باخد حفرة حنينة .. روحت لبتاع العفشة وفكينا المساعد وبصينا عالياي وعملنا البدع وبارضو الصوت زى ماهو وآخر ما يأس قالى شوف حد بتاع شكمان يمكن يكون هو السبب !! .. وبصراحة انا مش عارف سبب الخبط ده ايه مع ان المساعد سليم والياي بارضو وكل العفشة مربطة وسليمة .

أنا برجح إنها مشكلة شكمااان بردوه

دلوقتى انا بقى عاوز منكم شوية نصايح بخصوص العربية وعاوزكم تظبطونى :))

وعلى فكرة انا غيرت كل السيور وغيرت زيت وطبعاً البوجيهات وفلتر بنزين ومية الريدياتير ودورت على فلتر التكيف وعرفت ان ملهاش :)) وغيرت تيل قدام ورجلاش فرامل خلفى وركبت جنط 15

أيه ناقص كده اشيك عليه وايه المفروض اعمله وكمان ايه حل المشاكل اللى فوق دى كلها
مع العلم ان اى حد اقله على اى مشكلة يقولى احطها على الجهاز وطبعاً أقل طلعة للجهاز ب 40 جنيه ههههههههههههه

تحياتى للجميع ومنتظر مشاركتكم

كان لازم تتحقق من العربية قبل شرائها بإنك تروح التوكيل وتكشف عليها على الأقل تعمل إختبار كبس للمكنه وده كان ممكن تعمله بره التوكيل وبيتكلف 150 جنية أو أقل ......... لأن أنا وقعت فى نفس الغلطة ولكن ربنا ستر

تحيـــــــــاتى و جمد عضمك كده وإشرب بيريــــــــــل

[ggaamm]

ايه العيوب دى كلها يا باشا
اولا الف مبروك بس انت مكشفتش على العربيه كويس ليه واخدتها على كده بكام ..؟؟

الله يبارك فيك ياباشا .. وبالنسبة للكشف فمجاش فى بالى خصوصاً وانى من سوهاج فهيكون من الصعب انى اخد العربية مشوار 600 كيلو للتوكيل عشان اكشف عليها :))

وكمان انا مش بثق فى اى توكيل فى الأقاليم وبحسها فلوس عالفاضى

اما بالنسبة للعربية فهى كانت بتاعت واحد صديق واخدتها على 40 وهى مانيوال كاملة

وشكراً لمرورك الطيب

[ggaamm]

الف مبروك على العربية
بس كان لازم قبل ما تشتريها كنت تروح التوكيل او اى وكيل صيانة معتمد يكشف على العربية ويقولك اذا كانت سليمة او فيها عيوب
عموما اعتقد الحاجات دى كلها بسيطة ان شاء الله

الله يبارك فيك ياباشا وعلى الله تكون بسيطة عشان مش ناقص وش بصراحة :)

[ggaamm]

كان لازم تتحقق من العربية قبل شرائها بإنك تروح التوكيل وتكشف عليها على الأقل تعمل إختبار كبس للمكنه وده كان ممكن تعمله بره التوكيل وبيتكلف 150 جنية أو أقل ......... لأن أنا وقعت فى نفس الغلطة ولكن ربنا ستر

تحيـــــــــاتى و جمد عضمك كده وإشرب بيريــــــــــل

هههههههههههههههه
حاضر هجمد ههههههههههه

الله يبارك فيك ياباشا .. وبالنسبة للكشف فمجاش فى بالى خصوصاً وانى من سوهاج فهيكون من الصعب انى اخد العربية مشوار 600 كيلو للتوكيل عشان اكشف عليها :))

وكمان انا مش بثق فى اى توكيل فى الأقاليم وبحسها فلوس عالفاضى

أولاً أنا بشكرك جزيلاً على أهتمامك وردك الوافى وربنا يجزيك كل خير

بالنسبة لأول مشكلة بتاعت الرجرجة فأنا جايب الأبعاد المظبوطة لأنى سألت على الموضوع ده والناس هنا فيها بركة وفادتنى بالأبعاد المناسبة بالنسبة لل15 .. فأنا كده هشيك بقى على الزوايا والترصيص خصوصاً وانى بحس برعشة بعد ال100 بس اللى اعرفه ان الجنوط السبور مش بتحتاج ترصيص !!

نخش بقى على صوت التكتكة فده انا مش عارف اوصفهولك لكن هحاول ,, بص هو عامل زى صوت العربيات الكربيراتير القديمة لما تحسها واخدة كهربا زيادة كده بص تحسه مدى على شبه تسقيفة خفيفة .

اما بقى صوت الصفارة فده بيظهر اكتر وانا واقف بالعربية ، هوصفهولك : عارف لما تيجى تشغل الكونتاك على تانى تكة وتثبت عليها مش بتسمع صوت كده زى " فووووت" وشوية ويسكت ؟؟!!
أهو هو ده نفس الصوت بس بيفضل على طول مش بيسكت عندى .

بالنسبة للتكيف فكده واضح ان لازملها مشوار لبتاع التكيفات يراجع الكبس والذى منه وياخد اللى فيه النصيب وأمرنا لله وربنا يباركله :)))

أما النتشة فدى بحسها وانا بزود بنزين حتى لو مش دايس دبرياج اصلاً يعنى لما تدوس فرامل كده بتهدى وبعدين ارجع ازود تانى احس العربية هتجرى وبعدين تنتش وتكمل عادى .. وكمان انا عندى العربية اقل حاجة تطلعها امريكانى ومش عارف هل ده ميزة ولا عيب ,, يعنى انا مع والدى نوبيرا تحس انك لازم تحرق بنزين عشان تفحط فى الأرض لكن دى لأ ممكن شوية بنزين صغيرين تخليها تفحط وتخرب الدنيا !!!

اما موضوع السرمستات فالعربية كانت زى الفل قبل ما أغير المية هى ماعملتش كده غير لما غيرتلها المية وحبيت انضفها واعملها منظر يعنى ههههههههههه ،، طيب هراجع موضوع السرموستات ده تانى .

على العموم هى واضح ان لازملها كشف كمبيوتر بس المشكلة انى مش بثق فى الكلام ده وبحسه ضحك عالزبون ولهف للفلوس وبس ،، لأنى كذا مرة بالنوبيرا اعمل كشف ومايطلعش اى حاجة وادقع بارضو ال 40 جنيه واوقات بيدى خطأ فى حاجة ماتطلعش العيب ، فأنا بصراحة مقلق منه خصوصاً وان عندى هنا مافيش صنايعية تعتمد عليهم !!

يعنى انا ممكن اروح مكان محترم وادفع 200 جنيه واصلح العيب ولا اروح مكان اى كلام وادفع 100 جنيه على خمس مرات كل مرة بعشريناية ومايتصلحش فى الآخر :))

على كل حال شكرا ياكبير مرة تانى وآسف لو تعبتك معايا

[MEDO84EG]

الف مبروك و ان شاء الله بسيطة

[ggaamm]

الف مبروك و ان شاء الله بسيطة

الله يبارك فيك ياجميل .. وشكراً على مرورك

[mangaa]

8- عندى صوت خبطة ورا السواق كده ومابيظهرش غير لما باخد حفرة حنينة .. روحت لبتاع العفشة وفكينا المساعد وبصينا عالياي وعملنا البدع وبارضو الصوت زى ماهو وآخر ما يأس قالى شوف حد بتاع شكمان يمكن يكون هو السبب !! .. وبصراحة انا مش عارف سبب الخبط ده ايه مع ان المساعد سليم والياي بارضو وكل العفشة مربطة وسليمة .

علاج الموضوع ده وبجد ... اغسل العربية وشحمها تشحيمة محترمة في بنزينه محترمة وارفعها واغسلها من تحت بالكمبروسر وخلي الراجل يتقل شوية بالمية والكمبروسر على الحتة اللي فيها الصوت ... صدقني العيب دة كان عندي بالظبط في 2009 ودوخني وهبلني .. رحت شحمت العربية ورفعتها وغسلتها الصوت راح :)

[aymn6666]

انا ليه استفسار من ناحيه الموتور
المفروض ان 2008 مفيش فيها 1500
تتاكد ازاي شوف عداد الكيلو عندك ديجيتال ولا بكره
المشكله بقا لو طلع ديجيتال لان كده العربيه1600 مش 1500
وده يعيب العربيه
ثانيا المرور ميرخصش موتور اقل من السعه الاصليه للعربيه
يعني لو عربيتك 1600 مينفعش تسقط موتور 1500 لاكن ممكن تسقط موتور 1600-1800-2000 وانت طالع
انما تقل مينفعش
ولازم تتاكد ان الموتور مثبوت عل الرخصه

[ggaamm]

علاج الموضوع ده وبجد ... اغسل العربية وشحمها تشحيمة محترمة في بنزينه محترمة وارفعها واغسلها من تحت بالكمبروسر وخلي الراجل يتقل شوية بالمية والكمبروسر على الحتة اللي فيها الصوت ... صدقني العيب دة كان عندي بالظبط في 2009 ودوخني وهبلني .. رحت شحمت العربية ورفعتها وغسلتها الصوت راح :)

ياسلااااااااام !!

بالبساطة دى :)

طيب ياريت انا مستعد اغسلها مرتين مش مرة بس الصوت يغور فى داهية

طيب وطلع ايه بقى اللى بيعمل الصوت ؟؟

اعتقد سؤال محرج وصعب الإجابة عليه
ههههههههههههههههه

شكراً للإفادة ياباشا وهجرب موضوع التشحيم والغسيل ده يمكن يفلح

تحياتى

[ggaamm]

انا ليه استفسار من ناحيه الموتور
المفروض ان 2008 مفيش فيها 1500
تتاكد ازاي شوف عداد الكيلو عندك ديجيتال ولا بكره
المشكله بقا لو طلع ديجيتال لان كده العربيه1600 مش 1500
وده يعيب العربيه
ثانيا المرور ميرخصش موتور اقل من السعه الاصليه للعربيه
يعني لو عربيتك 1600 مينفعش تسقط موتور 1500 لاكن ممكن تسقط موتور 1600-1800-2000 وانت طالع
انما تقل مينفعش
ولازم تتاكد ان الموتور مثبوت عل الرخصه

عداد الكيلو ديجيتال !!!
والعربية عاملة 88 ألف

المفاجأة بقى ان الرخصة القديمة مكتوب عليها 1500

والموتور الجديد الوش بتاعه مكتوب 12 v
يعنى كده هو 1500 بارضو ولا ايه ؟

والعربية كانت مرخصة 3 سنين ودى اول ترخيص ليها اللى انا هعمله .. هى رخصتها خلصت من فترة حوالى 8 شهور وكانت مركونة وكده وانا ماشي فى الإجراءات ومطابقة البصمة والكلام ده وهى واخدة منى وقت لأنها مرور مدينة نصر وانا فى سوهاج

فأيه الوضع كده ؟؟

[misoalex]

الله يبارك فيك ياباشا .. وبالنسبة للكشف فمجاش فى بالى خصوصاً وانى من سوهاج فهيكون من الصعب انى اخد العربية مشوار 600 كيلو للتوكيل عشان اكشف عليها :))

وكمان انا مش بثق فى اى توكيل فى الأقاليم وبحسها فلوس عالفاضى

اما بالنسبة للعربية فهى كانت بتاعت واحد صديق واخدتها على 40 وهى مانيوال كاملة

وشكراً لمرورك الطيب

مبروك مره تانيه ربنا يديك خيرها ويكفيك شرها
وان شاء الله تظبط المشاكل اللى فيها وتريحك