فيرنا 2013

[mohamed5800]

عايز اعرف هوة لسة فية فرنا جديدة وفى اى مكان بتتباع وسعرها كام وتسليم فورى ولا حجز وهل هية اختيار موفق ولا لأ

[mstool]

بتتباع اة و بيغالوا فى تمنها اليومين دول جامد فى المعارض على سمعة انها ناقصة و مش موجودة خالص و الطلب كتير و دة كلام غلط معمول عشان يطلعوا منة سبوبة حلوة عن تجربة لما لاقيتها مغلينها الفين تلاتة و اقل معرض الف عن الاسعار الرسمية رحت قلت مش هشتريها غير كسر زيرو لاقيت 3 معارض من اللى اتفقت معاهم بيكلمونى اقول لكل واحد انا لاقيت برة سعر اقل يقولى تعالى و مش هنختلف لما اتزنقوا و ملاقوش يبعيوا و البيعة طارت قال نبيع باى حاجة ما هوا لو كان كلامهم صح من الاول و ناقصة و هو كدة و لو لاقيتها برة ارخض هاتها مكنش هيكلمونى تانى و يرضى باللى قولتة للاسف حسسونى انى بتعامل مع تجار مستعمل مش معارض بس للاسف ازمة ضمير و عايزين يلهفوا اى حاجة من الزبون و خلاص
فاثبت على مبدائك بذات لو هجبها كاش لو قسط لازم يستغلوك فى الف جنية زيادة دة اللى انا اكشفتة
موضوع اختيار موفق دية حسب استعمالك و احتياجك للعربية الفيرنا مش بتاعت جرى مع انها مغرية اوى للجرى فرامل ضعيفة صاج ضعيف بس محتمل عن عربيات تانية كتير عفشة عايزة تربيط كتير لو فى شوارع مبهدلة موتور معمر جدا سواقة سهلة جدا شوف اللى يناسبك كمان لو عايز عربية اعادة بيع بتاعها نمرة 1 فى مصر و قطع غيار اصلية رخيصة جدا عن جميع العربيات الحديثة يبقى الفيرنا مميزة اوى بالكلام دة و الثبات المعدوم للى بيجروا جامد فوق ال 120 بخ تقفيل مصرى ( اكيد فاهمنى ) خامات فانوس رمضان الصينى الغالى شوية مش ارخص واحد
حضرتك كدة هتقدر تحدد لنفسك ان كانت تنفعك ولا لا حسب الاستعمال و احتياجك
عموما لو حد زود او شكر فى الفيرنا اكتر من اللى قولتة يبقى منحاز و بيحبها فبيجامل لان فعلا هيا الفيرنا مش اكتر من كدة بس سوق العربيات هنا فى مصر اهم حاجة سعر اعادة البيع و قطع الغيار المتوفرة و الرخيصة عشان كدة هيا منتشرة بطريقة مش هتكلم عليها يعنى

[ملك فرنا]

الفرنا فى اى معرض موجودة و الاستلام فورى وهى اختيار موفق جدا

[mohamed5800]

طب وبالنسبة للسعر بقت كام دلوقتى

[mohamed5800]

سؤال كمان معلش هوة الفيرنا مفهاش مرايات كهرباء ولا فوج لايت امامى فى اعلى فئة مانيوال

[A_H_M_A_D]

سؤال كمان معلش هوة الفيرنا مفهاش مرايات كهرباء ولا فوج لايت امامى فى اعلى فئة مانيوال

في المانيوال لأ , موجودين بس في الاوتوماتيك

[El Prince]

و هى قليلة ليه يعنى ؟
وقفوا انتاجها مثلاً ؟

[sabregas2010]

العربية موجودة ممكن التجار يظهروا انها قليلة فى السوق عشان يرفعوا السعر

[Ultramisho]

اختيار موفق ان شاء الله

موتور قوي وسحب ممتاز
صالون مساحته مش كبيرة لكن بيشيل عادي
تكييف ثلاجة
قطع غيار عند البقال وببلاش
سعر اعادة بيع كويس وخفيفة لو عاوز تبيع مابتعدش على قلبك
في منها ازاز فيميه كمان

عيبها مايتجريش بيها فوق 100-110
وواطية عاوزة المطب يتاخد بالعرض بس ممكن تجنط ب 14 او حتى 15 وهتبقى تمام
انتشرت كتاكسي يعني ابعد عن الابيض خالص لو فيه وخليك في الغوامق احسن الفيراني شيك عليها
تقفيلها على ادها

باختصار سحب وتكييف واعتمادية وصيانة ببلاش تنفع في شوارع مصر ومايتخافش عليها

تقبل مروري

[mohamed5800]

شكرا ليكو كلكم هوة انا الموضوع باختصار انى عمرى ما فكرت فيها بس الخطوبة وتوضيب الشقة فوقعت فى عدة اختيارات هاقولكم عليها فيات بونتو 1300 شيفرولية افيو و لانوس ولوجان بس انا فاضلت الفيرنا عنهم علما بأنى هاشتريها كاش لان المستعمل مش برتاحلة وهوة عامل زى البطيخة وانت ونصيبك

[hassanin_lada]

افيو افضل والله اعلم