عندى مشكلة زيت الماتور بينقص فى فيرنا

[ahmed9003]

السلام عليكم ورحمة الله وبركاته

أستأذنكم عندى مشكلة فى عربيتى الفيرنا زيت الماتور بينقص جامد اول مرة كنت حاطط زيت موبيل ون 10000 لقيت ابتدى ينقص بعد 3000 كيلو ولما مشيت بيه 8000 ك لقيت الزيت موجود على المؤشر فى مقياس الزيت عند المينيمم (اقل نقطة) واضطريت ازوده.
بعد كده بقيت احط زيت شل 5000 وبرضه بلاقيه بينقص نقص ملحوظ بعد 3000 ك وبيوصل برضه لاقل نقطة فى المقياس

ملحوظات
العربية شاريها مستعمل من 7 شهور موديل 2005 كورى 1600 سى سى فول اوبشن
الزيت يتم تغيره فى التوكيل مع تغير الفلتر فى كل مرة
التوكيل لماعرضت عليهم المشكلة لم يفيدونى بحل لها
العربية بركنها فى جراج ارضيته سيراميك ولا يوجد نقطة زيت بالاقيها تحت العربية
لايوجد اى لون للعادم (بشهادة التوكيل)
العربية من تحت لما برفعها واشوفها من تحت ناشفة لا يوجد اثر لاى زيوت

ارجو الافادة جزاكم الله كل خير

[akmm]

متابع ؟؟؟؟؟؟؟؟؟؟؟؟؟ وباهتمام .

[khalid_adel]

اكيد في مره صاحب العربيه القديم حط لها زيت تقيل والماتور اخد عليه للاسف وبالتالي لو حطيت زيت نضيف مش حينفع مع الماتور خلاص وحينقص
جرب كده حط سيراتيك بتاع ليكوي مولي وحط زيت 5 الاف بتاعهم اللي اسمه سوبر فورميولا بس خد بالك السيراتيك بينقص الزيت شويه بعد 1000 كيلو فلازم تزود شويه تاني وده اول مره بس وبعد كده ان شاء الله يظبط معاك

[beshomilan]

ممكن تكون بتحرق على العربيه فى الغيارات جدا والزيت مبيستحملش فبيتبخر
مفيش روايح عندك خالص وانت حارق على الغيار؟؟

[ahmed9003]

شكرا استاذ خالد

اشكرك استاذ خالد على اهتمامك وردك عليا بس استحملنى علشان انا مش خبير اوى فى العربيات

يعنى ايه " سيراتيك" بتاع ليكوي مولي ده زيت ولا اسم شركة ولا مادة بتضاف الى الزيت اصل انا عمرى ما سمعت عنه قبل كده

وبعدين يعنى ايه الماتور خد على الزيت التقيل ومش حينفع احط زيت نضيف تانى هوا الزيت اللى بينقص ده بيروح فين اصلا

وهل الزيت التقيل ده غلط على الماتور على المدى البعيد

وهل سيراتيك ده نوع نضيف ولا الاحسن احط شيل او موبيل ولما ينقص ابقى ازوده والامر لله

وهل فى شك ولو واحد فى الميه انه يبقى اولسيه الكرنك بس يمكن بيسرب ببطء شديد

معلش انا مطول عليك فى اسألتى بس عشان افهم ولعل غيرى يستفيد

وجزاكم الله كل الخير وجعله فى ميزان حسناتك

[ABO MALEK]

اشكرك استاذ خالد على اهتمامك وردك عليا بس استحملنى علشان انا مش خبير اوى فى العربيات

يعنى ايه " سيراتيك" بتاع ليكوي مولي ده زيت ولا اسم شركة ولا مادة بتضاف الى الزيت اصل انا عمرى ما سمعت عنه قبل كده

وبعدين يعنى ايه الماتور خد على الزيت التقيل ومش حينفع احط زيت نضيف تانى هوا الزيت اللى بينقص ده بيروح فين اصلا

وهل الزيت التقيل ده غلط على الماتور على المدى البعيد

وهل سيراتيك ده نوع نضيف ولا الاحسن احط شيل او موبيل ولما ينقص ابقى ازوده والامر لله

وهل فى شك ولو واحد فى الميه انه يبقى اولسيه الكرنك بس يمكن بيسرب ببطء شديد

معلش انا مطول عليك فى اسألتى بس عشان افهم ولعل غيرى يستفيد

وجزاكم الله كل الخير وجعله فى ميزان حسناتك

السيراتك مادة بتحافظ على الموتور من التآكل بتضاف قبل وضع الزيت الجديد أيا كان نوعه...ويقال انه من التوافق ان تضع زيت ليكوى مولى كما قال لك العضو..السيراتك ده بحوالى 120-130 مش فاكر بالضبط..وعندهم مادة يقال انها بتمنع تسريب الزيت....ده الإجابة على الشق الأول من أسئلتك

الثانى:أين يذهب الزيت؟
انا فى نفس مشكلتك مع اللانوس والميكانيكى دور كتير جدااااااااااااااااااا وفى الأخر قالى انى بحرق على الغيار وانا فعلا بعمل كده(غريزة) وكنت بستعمل زيت وطنية وغيرت اخر غيارة للزيت ليكوى مولى 5000 كم=120 جنيه والجركن مش متبرشم من جوه للعلم يعنى...ومحطتش اى اضافات اخرى حتى الآن وفات منهم 2500 ومعدل النقص اتحسن انما لم بمنع بس صوت الموتور مع الزيت حاسس انه عالى شويتين يمكن علشان وطنية اتقل من شوية..
لاحظ انى بغير من معدنى لمعدنى
مش من تخليقى لمعدنى(انت كده بتنزل)
لما كان معايا الفيرنا كانت بنتقص 1/2 كيلو فى الغيارة وقالولى ان ده العادى بتاعها وفى نفس الوقت انا اتعودت على كده كنت بحط شل الأصفر.
وجرب تعمل فلاشنج للموتور وان شاء الله هيتظبط معاك بعد ده..مادام مفيش مرض عضوى يبقى اكيد نفسى و ربنا يطمنا على موتورك فى القريب العاجل بالمشيئة.
وشكرا

[ahmed9003]

اشكر الجميع على الاهتمام والرد انا مشاركاتى قليلة بالمنتدى بس فعلا انا سعيد انى لاقى كل الحب والاهتمام ده من الاعضاء ربنا يجازيكم خير

بالنسبة لموضوع الحرق على الغيار انا بنقل الغيار لما ار بى ام بيجى عند تلاتة وساعات اقل كمان

وقليل جدا لما اغير وانا فوق التلاتة ار بى ام وما افتكريش انى عمرى غيرت عند اربعة او تلاتة ونص كمان

وبالنسبة للريحة اللى ممكن تتشم عند الغيار ما اعتقدش ان فيه ريحة مع العلم انى بكون قافل الشباك وحتى لو فتحه مش بشم حاجة غريبة

بس انا عايز اسأل هل يوجد فى شل او موبيل زيت ليكو مولى ولو مش موجود باجيبه منين

وكذلك مادة السيراتك موجودة فين وهل التوكيل بيقبل يحط المادة ديه عادى

حاجة اخيرة يعنى ايه
(لاحظانى بغير من معدنى لمعدنىمش من تخليقى لمعدنى(انت كده بتنزل))

ان للاسف مش فاهم الجملة ديه وحتى مش عارف شل 5000 اللى انا بحطه زيت معدنى ولا تخليقى

وشكررررررررررررررررررررر كتير ليكم جميعا واسف للاطالة

[khalid_adel]

احب اشكر العضو ابو مالك على التوضيح والمساعده
بص ياسيدي لما بقولك زيت نضيف يعني زيت تخليقي اما الزيت العادي زي شل الاصفر ولا الاحمر ده زيت معدني واقل في الكفاءه ولزوجته عايه وبيقعد في العربيه بالكتير 5000كم ان ماكنتش اقل
الموضوع انك لو حطيت مره زيت معدني في العربيه (زيت تقيل) اللي بيحصل ان خلوصات الماتور بتوسع لان ده زيت تقيل وكثافته اكتر فزي ماتقول بيتعود على كده وصعب انك ترجعه تاني
عشان كده بقولك حط سيراتيك (منتج من ليكوي مولي لاضافات الزيت) وده حبيبات سيراميك وبتعمل على تقليل الخلوصات دي عشان الماتور يرجع زي زمان بس دي في اول مره بتلاقي الزيت نقص شويه في اول مره وزوده وان شاء الله مينقصش تاني وانصحك تحط زيت ليكوي مولي سوبر فورميولا بعد كده او فيسكو 20-50 ودول مش بينقصو وتمام
ليكوي مولي ليهم كذا فرع وحتلاقي موضوع اعلاني هنا في المنتدي وليهم صفحة على الفيس بوك liqui moly egyp

[hany63]

طب ما تقيس كبس الموتور عشان تتطمن ليكون صاحبها الاولاني قرص عليها جامد لا قدر الله و على فكره كان فيه دفعة فيرنا كان فيها نفس المشكله من وهيا زيرو

[ahmed9003]

ربنا يجازيكم خير على المعلومات القيمة اللى بعرفها لاول مرة رغم ان عندى عربية داخل على اربع سنين بشكركم جدا وانا فعلا دخلت على صفحة ليكوى مولى واتعرفت عليها اكتر وكتابتلهم ومستنى ردهم

بشكركم تانى وتالت وعاشر وربنا يجعله فى ميزان حسنتاكم

[Ashraf_Ibrahim]

اهم سؤال محدش سأله لحضرتك
العربية دي موتورها عامل كام كم؟!
انا شاكك في حاجة هتتأكد بعد ماعرف عداد العربية عامل كام كم !

[ahmed9003]

اشكرك استاذ هانى على اهتمامك وانا معنديش مشكلة ان اقيس كبس الماتور ديه سهلة بس ممكن اعرف ايه الفائدة من القياس ده (بجد انا مش عارف) ولو طلع الكبس كويس يبقى اعمل ايه ولو طلع وحش تبقى ايه المشكلة وبالنسبة لصاحبها اولانى هى كانت واحدة ست والعربية واضح جدا انها ماكنتش متهانة انا تانى يد وكانت عاملة بيها من سنة 2005 العداد كان 82000 كم

[ahmed9003]

عداد العربية يوم ما اشترتها كانت عملة 82000 كم وبعد استعمال سبعة شهور العربية عاملة 102000 كم

[ahmed9003]

اشكرك استاذ هانى على اهتمامك وانا معنديش مشكلة ان اقيس كبس الماتور ديه سهلة بس ممكن اعرف ايه الفائدة من القياس ده (بجد انا مش عارف) ولو طلع الكبس كويس يبقى اعمل ايه ولو طلع وحش تبقى ايه المشكلة وبالنسبة لصاحبها اولانى هى كانت واحدة ست والعربية واضح جدا انها ماكنتش متهانة انا تانى يد وكانت عاملة بيها من سنة 2005 العداد كان 82000 كم

[Ashraf_Ibrahim]

عداد العربية يوم ما اشترتها كانت عملة 82000 كم وبعد استعمال سبعة شهور العربية عاملة 102000 كم

كدة تقريبا انا حطيت ايدي على العيب واتأكدت منه !
بص هو فيه عيب مشهور بيظهر في الفيرنا بعد 70000 كم تقريبا -مش كل العربيات لكنه مشهور- وهو اويل سيل كرنك خلفي
دا بيخلي الزيت ينقص
اتأكد منه ولو كدة غيره فورا وهتلاقي الزيت مظبوط ومش هينقص منك تاني