سؤال لاخواني بخصوص التأمين (مصر للتأمين) و الاصلاح في التوكيل لحادث

[CryptonX]

السلام عليكم,

علشان اكمل مسلسل الغم الي انا عايش فيه :) الحمد الله على كل شيء ..


العربية كانت اتخبطت زمان حاجة بسيطة كدة (حكة في الاكصدام الامامي) و الفوج لايت اتحرك من مكانه (بقى ممسوك بمسمار واحد يعني) بصراحة كسلت اصلحها و قولت خليها كدة كانت العربية لسة جديدة ...

الحمد الله كنت ماشي في امان الله في الدائري على 90 او 100 مثلا .. ماشي بين عربيتين ولاقيت كاوتش عربية نقل مرمي قدامي .... مش كاوتشة كاملة يعني بس حوالي نصف كاوتشة مثلا ... و نايمة على الارض .. وللاسف مكانش ينفع اهدي انا على الدائري و معرفش مين طاير ورايا .. (الله يعلن ده طريق بكره طول عمري)..


فخبطت في الكاوتشة ... و توقعت يعني انها حاجة هبلة ... و فوجئت بصوت اصدام عنيف جدا !! بس الحمد الله تمالكت نفسي من الخضة و محدفتش يمين ولا شمال على الناس الي جنبي .. و كملت طريقي عادي ..


وانا ماشي حسيت باصوات غريبة !! كان في هواء داخل في العربية كانك فاتح الشباك يعني ... ) وصوت حاجات بتجرجر و بتدحرج !!!!


حاولت اقف على جنب .. فشلت طبعا بسبب البني ادمين الي بيجيوا ياخدوا غرز من على اقصي يمين الطريق ... فنزلت في اول منزل و كان منزل التجمع الخامس ... خفت اقف برده علشان الوقت كان 11 باليل و معايا مراتي ... قفلت ادخل التجميع احسن .. دخلت التجمع و الاصوات لسة شغالة ... ووقفت اول شارع التسعين بعد الكمين الدائم الي هناك ده .. وقلت اتفرج عي حصل !


جالي زهول بصراحة ...
الفوجلايت الي كان مربوط ... اختفى !! ملوش وجود ! .. مفيش الا سلك مدلدل وفيه لمبة مطفية !
لقيت مياه بتنزل من العربية ... حاولت اعرف هي ايه و اكتشفت انه تانك رشاش المياه بس الحمد الله مطلعش مخروم .. ده الخرطوم و الموتور كانوا راكبين فيه اتفكوا ... .ركبتهم بايدي ...


المشكلة بقى لقيت الاكصدام متدمر تماما من تحت .. لما تشوفه من وشه تقول مفيش حاجة حصلت بس اتفك من تحت (المسامير ولا الكليبسات معظمها وقع) ... وصوت الهواء عرفت كان ايه .. الجزء الي فوق الكاوتش (بين الاكصدام و الكاوتش) اعتقد اسمه الكارتيرة .... متاكل .. كانه معضوض او مقصوص منه جزء كبير ...


و اخيرا لقيت "شيء" مدور عامل زي المغناطيس بتاع لعب الاطفال ... راكب في فيشة ... مدلدل في الارض ! واعذروا جهلي الميكانيكي .. اكشتفت بعد محاولات عديدة .. انه الكلاكس بتاع العربية !! معرفش ايه الي جابه هنا و ايه الي وقعه ...


طبعا انا مصدوم ! كل ده من حتة كاوتش نقل ؟ كلمت واحد صاحبي جالي . قالي احمد ربنا انها معملتش حاجة في قاعدة المحرك او في الردياتير ... قلتله يابني دي كاوتشة !!! قالي تحب تخبط في كاوتشة على سرعة 100 من غير فرامل و نشوف حيحصلك ايه ؟؟ بصراحة انا مش متخيل ازاي !! بس ماعلينا !!!


كدة العربية محتاجة تقريبا :
- اكصدام جديد
-فوج لايت كامل جديد
-كارتيرة
-تركيب الكلاكس مكانه ( انا حشرته بافيز جوة و صوته بقى عامل زي عربيات الكارو علشان لازق في الفايبر بتاع الاكصدام)
- مرايا يمين (الزجاج فقط من خبطة سابقة)


طبعا انا عارف الكلام ده حيخشله في 4000 - 5000 جنيه بالراحة في التوكيل ..


الفكرة اني مؤمن مع مصر للتامين بس تامين بتحمل 500 جنيه (0.05% تقريبا) مهما كان الحادث ..
بس انا متعاملتش معاهم خالص و للاسف فقدت رقم المندوب الي امنت معاه ..


و في افكار كتير في دماغي ...
اولا .. هل لو صلحت في التوكيل ... حدفع 500 جنيه برده و لا في مصاريف اخرى ؟
- هل انا الي بدفع و بعدين بيديوني شيك ؟ و ده يطرح النقطة التانية ...
هل في مراكز تبع مصر للتامين نفسهم يصحلوا العربية على حسابهم وانا ادفع نسبة التحمل بس؟؟


دلوقتي انا كنت شاري العربية في يناير ... يعني الترخيص و التامين حيتجددوا في يناير القادم .. المفروض اني لو مكنتش استعمل التأمين طول السنة حاخد 20% في خصم على التجديد ... فهل لو سبتها كدة و جيت اجدد حيصلحوهالي ؟ ولا حلبس انا ؟؟


المشكلة اني بقيت كاره العربية و مغسلتهاش من اكتر من اسبوعين ! .. وهي ماشية مش محتاجة تصليح فوري يعني بس انا خايف البس في موضوع التامين ده عند التجديد .. وفي نفس الوقت .. اخري ادبر ال 500 جنيه بتوع التحمل .. انا استحالة استحمل اي مبالغ اضافية اخرى ؟؟؟


فهل حد مامن مع مصر للتامين يعرف اي حاجة ؟؟؟


شكرا لكم.

[Ayman-Ahmed]

لا حول ولا قوة الا بالله.شاء الله وما قدر فعل.

اللى هقدر افيدك بيه انك تروح جراج مصر للتامين_وسط البلد وتخش على اى مندوب هناك وتساله على التفاصيل.

بالنسبة للدفع انت هتدفع والشيك هيتصرف بعدها ب10-15 يوم.

[IronHead]

بص يا سيدى, انت عشان تدفع بس ال 500 جنيه لازم تروح مركز تصليح تبع مصر للتأمين
غير كده لو صلحت فى اى حته غير الورش اللى تبع مصر للتأمين هتدفع المبلغ وتسترد بعد اسبوعين,
لو هتصلح فى التوكيل هتتحمل 10% من اجمالى فاتوره الاصلاح ده زائد ال 500 جنيه
فى كل الاحوال لازم تبلغ شركه التأمين وهيبعتولك مندوب يعاين العربيه ولازم يبعتولك الموافقه قبل اجراء اى حاجه
ولو اجمالى تقدير الخسائر زاد عن 5000 او 10000 جنيه مش تذكر قوى لازم تعمل محضر بوليس
وفى الاخر الحمد لله على كل شئ

[verna2008auto]

مرحب هيونداي تيم
زميلي العزيز
الف حمد لله علي سلامتك اولا
ندخل في الجد

لو معاك البوليصة او رقم التأمين

1- ارفع سماعة التليفون للدليل اسألهم علي رقم مصر للتأمين
2- كلم حد هناك وقولهم انا تأميني تبع انهي فرع
3- حاول تعرف ( مخلصاتي ) بسوة (مندوب) في التأمين نفسة ممكن يدلك علي ورش بتصلح بالكامل علي حساب التأمين من غير ما تدفع انتا ولا مليم احمر ممسوح ( هيا بتكسب من التأمين نفسة )
* انا اعرف مخلصاتي منهم .. يعني من 6 شهور اداني رقمة وانا با أمن
اعتقد ان تأمين مصر للتأمين (جنية دهب )الزمن دة وورش كتير ممكن تاخد البوليصة والعربية وتستلم عربيتك بعد يومين بدون مصاريف

لو انتا فيرنا .. مصاريفك ممكن تكون
190 جنية طقم فوجات ديبو بتاع بلدة والفانوس القديم خلية استبن
200 جنية يوم ما يتمعظم الاكسدام ورشة ب 70- 120 جنية علي لون العربية حسب مكان الرش ونوعة بطقم كلبساتة
80 جنية كارتيرة
كلبسة كلاكس ب 3 تعريفة
وشويه مصاريف حباشتكنات كده لزوم المصاريف
انتا اخرك اصلا في الاصلاح لو انتا ( ريتشي مان ) 750 -900 جنية
شوف كده وقولي اية الاخبار
اخوك عاصم 01222223482
علي رأي الميكانيكي ..( ماهي العربيات لازم تتخبط انتا بتبيتها في البيت وهاتحطها في باترينة )
وربنا يجعلها اخر الصدمات

[CryptonX]

الف شكر للردود السريعة .. و الله يسلمكم جميعا .

العربية Elantra 2012 مش فيرنا .. فاعتقد التكلفة حتكون اعلى من الرقم المقترح, انا بحاول اعثر على الوثيقة في وسط كم الورق و حكلهمهم واقولكم عملت ايه.

شكرا مرة اخرى.

[DEVILRIDER]

اللى انا اعرفه ان انتا بتدفع الاول لانى مجرب مصر للتامين فى حادثة النترا ٢٠١٢ متكلفة حوالى ٥٥٠٠٠ و ادفع الاول كله و صاحبها خد جزء مخدش كله و كان تامين شامل

[Samir Elshahawy]

أولا .. حمدا لله علي سلامتك أنت و الاسرة أهم حاجة

ثانيا.. ماينفعش تبقي علي الدائري و في التجمع الخامس يعني قريب مني (10 دقائق) و ماتفكرش تتصل بيا حتي لو الفجر ... هأنزل و اجي لك و الكلام ده لأي حد من نجوم هيونداي مش لك أنت بس
أحنا سايبين ارقام تليفوناتنا علي المنتدي للهدف ده

ثالثا.. زي ما اخونا عاصم قالك و الاخوة كلهم قالوا لو معاك البوليصة هتلاقي فيها ارقام التليفونات أو ساعات المندوب اسمه بيكون فيها و فيها رقم تليفونه أتصل بيهم و أعمل معاينة للعربية عندهم هما هايقدروا الخسائر و هايقولوا لك علي الورش اللي بيتعاملوا معاها أو تعملها في التوكيل و تدفع و بعد كده بتأخد شيك منهم بعد خصم نسبة التحمل و الاهلاك و لازم تسلم لهم قطع الغيار القديمة

كمان ممكن تكلم كريم منير هو هايفيدك أكثر في موضوع التأمين و الاصلاحات تبع التأمين

و علي فكرة انا باحاول أكلمك بقالي فترة تليفونك مقفول علي طول أو غير متاح , أنا كنت عايز أطمئن عليك بس

[sayedmagic]

انا كنت عامل حادثة تشبه حادثة حضراتك فكل اللي اقدر افيدك فيه شوية اسعار من التوكيل لاني صلحت هناك الكلام ده من 10/2011 يعني من سنه كانت الاسعار كالتالي اكصدام 1200 فوج لايت 600 +لمبة 40 الكلام ده من فاتورتي اللي هدفعته

[Samah AbdAllah]

حمدالله على سلامتك يا كريم
المهم انك بخير انت والمدام
لو صلحت فى التوكيل او اى مركز تابع ليه هتدفع الاول وبعدين تسترد قيمة التامين بعد 15 يوم

[Hosam_Optrawy]

الف سلامه عليك ياكريم الحمد لله انكوا بخير معلش جت بسيطه

[CryptonX]

اللى انا اعرفه ان انتا بتدفع الاول لانى مجرب مصر للتامين فى حادثة النترا ٢٠١٢ متكلفة حوالى ٥٥٠٠٠ و ادفع الاول كله و صاحبها خد جزء مخدش كله و كان تامين شامل

شكرا للمعلومات

أولا .. حمدا لله علي سلامتك أنت و الاسرة أهم حاجة

ثانيا.. ماينفعش تبقي علي الدائري و في التجمع الخامس يعني قريب مني (10 دقائق) و ماتفكرش تتصل بيا حتي لو الفجر ... هأنزل و اجي لك و الكلام ده لأي حد من نجوم هيونداي مش لك أنت بس
أحنا سايبين ارقام تليفوناتنا علي المنتدي للهدف ده

ثالثا.. زي ما اخونا عاصم قالك و الاخوة كلهم قالوا لو معاك البوليصة هتلاقي فيها ارقام التليفونات أو ساعات المندوب اسمه بيكون فيها و فيها رقم تليفونه أتصل بيهم و أعمل معاينة للعربية عندهم هما هايقدروا الخسائر و هايقولوا لك علي الورش اللي بيتعاملوا معاها أو تعملها في التوكيل و تدفع و بعد كده بتأخد شيك منهم بعد خصم نسبة التحمل و الاهلاك و لازم تسلم لهم قطع الغيار القديمة

كمان ممكن تكلم كريم منير هو هايفيدك أكثر في موضوع التأمين و الاصلاحات تبع التأمين

و علي فكرة انا باحاول أكلمك بقالي فترة تليفونك مقفول علي طول أو غير متاح , أنا كنت عايز أطمئن عليك بس

الله يكرمك يا باشمهندس سمير كلك ذوق دائما .. والله انا مبحبش اتاقل على حد خصوصا ان الموضوع بسيط والعربية ماشية يعني ... و بعتذر لحضرتك عن التليفون بس انا الفترة الي فاتت مكانتش في حالة صحية ولا نفسية كويسة و بسيب التليفون مغلق يا مرمي في البيت على طول .. الحمدالله.

انا كنت عامل حادثة تشبه حادثة حضراتك فكل اللي اقدر افيدك فيه شوية اسعار من التوكيل لاني صلحت هناك الكلام ده من 10/2011 يعني من سنه كانت الاسعار كالتالي اكصدام 1200 فوج لايت 600 +لمبة 40 الكلام ده من فاتورتي اللي هدفعته

الله يكرمك طمنتني الاسعار اعتقد معقولة جدا شكرا جزيلا..

حمدالله على سلامتك يا كريم
المهم انك بخير انت والمدام
لو صلحت فى التوكيل او اى مركز تابع ليه هتدفع الاول وبعدين تسترد قيمة التامين بعد 15 يوم

الله يسلمك يا مدام سما .. شكرا انا حخليهم يصلحوا في اي حتة ان شاء الله صالون حلاقة بتاعهم :) المهم مدفعش انا شلن :)

الف سلامه عليك ياكريم الحمد لله انكوا بخير معلش جت بسيطه

الله يسلمك يا حسام . شكرا ..