أكسنت 2000

[friendship7897]

من فترة كنت بدور لوالدتي عن سيارة في حدود 40000 جم - شوفت إمبارح عربية هيونداي أكسنت 2000 - حالتها الخارجية جيدة - الميكانيكي بيقول إن متورها جيد - العربية مرشوشة كلها نظافة - البطارية جديدة - سير الكاتينة إشتراه وهيركبه جديد - الكاوتش متجدد من فترة وماشي تقريباً 30000ك ، رخصة سنة - الراجل كان عارض العربية بـ 38000جم على أساس أنه هينقل ملكيتها لينا عند الشراء ، أو 37500جم لو إحنا اللي هننقل خلال شهر على الأكثر لأنه خايف من مصروفات العربيتين ( تقريباً إسمها مصروفات الرفاهية )
مش عارفه كدة العربية سعرها كويس ولا غاليه ولا أيه .
وإستفسار تاني من فضلكم
العربية دي أخبارها أيه في قطع الغيار والصيانات وكل ما هو بخصوصها من ميكانيكا وكهرباء وإستهلاك بنزين أو ما شابه

في إنتظار مشاركاتكم
شكراً جزيلاً

[mado83]

اولا الكاوتش ماشى 30000ك ده كده مش جديد لانه بيتغير على 50 الف
الصيانات واسعار قطع غيارها معقوله مش غاليه
ولكن ايه الكماليات اللى فيها وهل هيا 1300 ولا 1500
وموضوع نقل الملكيه ده مش مشكله
والسعر كويس مش وحش
ولكن لازم لازم لازم يتم فحص العربيه جيدا وياريت لو فى بنزينه لان الميكانيكى برضو مش هيقدر يكشف عليها كويس
ولازم تعرفى حاله ضغط الماتور ولكن الاهم من الماتور هو شاسيه السياره ودواخلها
يارب اكون افدتك

[iWeLLy]

العربية دي ممتازة واسعار قطع غيارها ارخص قطع غيار في مصر تقريبا بس ده بالنسبة ل 1500 سي سي وتكييفها رائع ...السعر مناسب لعربية ما رشتش دواخل اصلا كل قطع غيارها كلام فاضي اكصدام ب 120 جنيه وفوانيس ب 40 جنيه ....لو اشتريتها نضيفة هتريحك جدا . برغم اني اشتريت عربية تانية بس لغاية دلوقتي مش قادر افرط فيها

[friendship7897]

اولا الكاوتش ماشى 30000ك ده كده مش جديد لانه بيتغير على 50 الف ( ما هو باين أنه مش جديد - بس فاضل له 20000 لغاية ما نفكر نجدده تاني )
الصيانات واسعار قطع غيارها معقوله مش غاليه ( كويس )
ولكن ايه الكماليات اللى فيها وهل هيا 1300 ولا 1500 ( 1500)
وموضوع نقل الملكيه ده مش مشكله ( ماشي )
والسعر كويس مش وحش ( الحمد لله )
ولكن لازم لازم لازم يتم فحص العربيه جيدا وياريت لو فى بنزينه لان الميكانيكى برضو مش هيقدر يكشف عليها كويس ( إن شاء الله هرفعها في واطنية اللي في العاشر اللي جنب سوق السيارات يوم الجمعة )
ولازم تعرفى حاله ضغط الماتور ولكن الاهم من الماتور هو شاسيه السياره ودواخلها ( شاسية العربية سليم والدواخل فبريكا )
يارب اكون افدتك

شكراً جزيلاً

ومستنية آراء أخرى للإفادة

[friendship7897]

العربية دي ممتازة واسعار قطع غيارها ارخص قطع غيار في مصر تقريبا بس ده بالنسبة ل 1500 سي سي وتكييفها رائع ...السعر مناسب لعربية ما رشتش دواخل اصلا كل قطع غيارها كلام فاضي اكصدام ب 120 جنيه وفوانيس ب 40 جنيه ....لو اشتريتها نضيفة هتريحك جدا . برغم اني اشتريت عربية تانية بس لغاية دلوقتي مش قادر افرط فيها

أفهم من كدة إن سعرها كويس لو حالتها زي ما شرحت ولا مضحوك عليا
ويعني أطمن على صيانتها لو حصل فيها حاجة لا قدر الله
أصل بيني وبنكم أنا اللي هلف حولين نفسي لو حاجة حصلت للعربية لأن ماما معتمدة على الله ثم عليا - وأنا اللي هقف بيها عند الميكانيكيا - لكن طبعاً أنا بدقق مش عشاني علشان (ماما)

[iWeLLy]

أفهم من كدة إن سعرها كويس لو حالتها زي ما شرحت ولا مضحوك عليا
ويعني أطمن على صيانتها لو حصل فيها حاجة لا قدر الله
أصل بيني وبنكم أنا اللي هلف حولين نفسي لو حاجة حصلت للعربية لأن ماما معتمدة على الله ثم عليا - وأنا اللي هقف بيها عند الميكانيكيا - لكن طبعاً أنا بدقق مش عشاني علشان (ماما)

يا باشا العربية دي لو موتورها سليم والشاسيه سليم بعد الكشف عليها عن ميكانيكي كويس وبيفهم بس يكون تبعك مش تبع البائع ..مش هاتلاقي احسن منها في الاقتصادية في البنزين وقطع الغيار والتكييف واسهل عربية في سواقتها اصلا لأنك شايف كل الكبوت وكل زوايا العربية وانصحك اوعى تغير الاكصدامات لو مش هما الاصليين لو عايز تشتري اكصدامات اشتري استيراد لأن الجديد بيتقطم انما الاستيراد عمره مل بيتقطم ...العربية دي الباب بتاعها بالفرش بتاعه بالازاز تمنه 250 - 300 جنيه !!! استيراد يعني لو واخد عربية شاسيه سليم وموتور سليم ب 3000 جنيه ترجعها جديدة زي الفابريكة !! المساعدين الكوري ب 160 جنيه ....اسعار قطع غيارها عامله زي اسعار قطع غيار ال 128 مع الفرق في التكييف والكماليات والشكل ...غير كده دي بتشم البنزين اصلا ولو مش مشغل تكييف والموتور مظبوط هتحس انك مش بتصرف على البنزين اصلا ...اغلى حاجة اشتريتها للعربية كان كاوتش تويو ياباني الفرده ب 350 جنيه !! وحاجتها موجوده في كل حته بس اسوأ حاجة فيها مقابض الباب بتنكسر بسرعة بس لو جبت الأصلي بيقعدوا كتير

[alaa74]

يا أختنا الفاضله ازيك واخبارك ايه ؟
العربيه انا امتلكتها حوالى سنتين من الزيرو بس كانت ال1300 مش ال 1500 والكلام دة كان فى 2006 وكان اخر انتاج للعربيه دى لل1300 لن ال1500 كان وقف انتاجه قبل 2006 .
عربيه كويسه جدا من حيث الاستخدام واستهلاك البنزين بتاعها هايل وقطع غيارها ببلاش وصيانتها عند اى حد لأنها منتشره طبعا من زمان .
موضوع السعر مش هقدر افيدك فيه قوى بس اعتقد انه عالى على موديل العربيه لأنى وقدرا فى فى واحد أعرفه لسه شارى العربيه دى وال1500 برضو موديل 2006 وبكام 45000 جم
فهل فرق 6 سنين = 5 الاف جنيه ؟؟؟؟
طبعا بعيد عن السعر المهم حاله العربيه يعنى لو حالتها كويسه الوالدة العزيزة وحضرتك هترتاحى
اما لو الحاله مش كويسه فهتتعبك جدا .
رأيى لازم ترجعى لحد متخصص فى التسعير وفى هنا فى المنتدى أ/ شريف وهبه
هو يقدر يسعرهالك كويس ويديكى السعر العادل للعربيه دى .
ومن ناحيه الحاله لازم تتأكدى كويس منها يعنى لو هتروحى وطنيه لازم يكون معاكى ميكانيكى فاهم الأول وتثقى فيه ويكون مش من طرف البايع طبعا منعا لأى شبهه .
وبالتوفيق إن شاء الله ومبروك مقدما للوالدة الكريمه
تقبلى تحياتى

[mado83]

نصيحه اخويه السعر كويس جدا ولكن الاهم ان العربيه تكون اساياتها سليمه لو كده توكلى على الله
وخدلا بالك ان الاسعار رفعت شويه اليومين دول

[iWeLLy]

أفهم من كدة إن سعرها كويس لو حالتها زي ما شرحت ولا مضحوك عليا
ويعني أطمن على صيانتها لو حصل فيها حاجة لا قدر الله
أصل بيني وبنكم أنا اللي هلف حولين نفسي لو حاجة حصلت للعربية لأن ماما معتمدة على الله ثم عليا - وأنا اللي هقف بيها عند الميكانيكيا - لكن طبعاً أنا بدقق مش عشاني علشان (ماما)

اعتذر ان الرد بصيغة الذكر ...معلش مش واخد بالي ...أهم حاجة في العربية دي ما تغسلوش الموتور بالجاز في البنزينه لأنه بيقطع الخراطيم ...وأهم شيء الكشف على دورة التبريد بعد طبعا التأكد من الاساسيات لأن أكبر مشكلة في العربية هي تسريب الميه من الخراطيم اللي بتبقى متغيرة بخراطيم مش اصلي وده اللي بيسبب سخونة الموتور ...من احسن الناس بتوع قطع الغيار الأصلي جورج حلمي في التوفيقية وابراهيم البنا ........مرة تانية لو ربنا سهل واشتريتي العربية اتأكدي عن طريق ميكانيكي من دورة التبريد والخراطيم لأن دي اكتر مشكلة واجهتني وكان سببها اللي قلتلك عليه ...غسيل الموتور بالجاز بيعمل تشقق للخراطيم بتاعة دورة التبريد واي قطع غيار عندك الاتنين اللي قلتلك عليهم ...وربنا يوفق .....سعر العربية 1500 سي سي بيتراواح بين 35000 - 40000 موديلات 2000 -2001 حسب الحالة والنضافة لأن اخر الأكسنت ال 1500 هو موديل 2001 بعد كده نزلت ال 1300 بس ال 1300 مش كويسه مع التكييف بتحسي الموتور تقيل في السحب انما ال 1500 شايله الموتور كويس مع التكييف

[friendship7897]

يا باشا

أهو أنت اللي باشا - ربنا يطمنك - بشكل دا هشتريها وأنا مغمضة

اعتذر ان الرد بصيغة الذكر ...معلش مش واخد بالي ...

ولا يهمك .... ما أنا من كتر إهتمامي بالعربيات وصيانتها خايفة يكون التطور الطبيعي للبنت الجدعة إنها تكون باشا

شكراً جزيلاً لنقل خبرتك ليا - بارك الله فيك

[friendship7897]

يا أختنا الفاضله ازيك واخبارك ايه ؟ إزايك يا أ/ علاء
فهل فرق 6 سنين = 5 الاف جنيه ؟؟؟؟ لأ أكتر من 5000 العربية معروضة بـ 38000
رأيى لازم ترجعى لحد متخصص فى التسعير وفى هنا فى المنتدى أ/ شريف وهبه
هو يقدر يسعرهالك كويس ويديكى السعر العادل للعربيه دى . ياريت يشوف الموضوع ويقدر يساعدني
ومن ناحيه الحاله لازم تتأكدى كويس منها يعنى لو هتروحى وطنيه لازم يكون معاكى ميكانيكى فاهم الأول وتثقى فيه ويكون مش من طرف البايع طبعا منعا لأى شبهه . إن شاء الله هروح يوم الجمعة
وبالتوفيق إن شاء الله ومبروك مقدما للوالدة الكريمه
تقبلى تحياتى

شكراً لمشاركتك