متضايق

[micho129]

معلش يا رجاله استحملوني شويه انا عارف الحاجات اللي حصلتلي بسيطه بس انا فعلا متضايق وقلت افضفض
العربيه مكملتش 500 كيلو مره اتخبطت عند الرفرف الشمال والصاج دخل لجوه وجزء من اللون طلع ومره لقيتها متخربشه خطين بالعرض و مره الاقي ناس اعدين ياكلوا عليها واخر مره لقيتها غرقانه نقط بوياه

[AlGazar2]

بص يا باشا ما تضايقش نفسك فى اى حاجة فى الصاج و خصوصا الرفارف و الخرابيش دى عادى يا باشا ده ختم الجوده و موجود على كل عربيات مصر تقريبا
عارف ان العربيه زيرو و مكملتش 500 كيلو معاك بس هاتعمل ايه بقى هيه دى مصر هاتضايق نفسك على الفاضى و لو صلحت يبقى بتصرف فلوس على الفاضى لانها هاتتعمل تانى

و الناس الى بياكلوا دول ملهمش حل بصراحه لو حطتلهم سبويلر على الشنطه هياكلوا على الكبوت :)

[p r i n c e]

يا باشا عادي ولا يهمك اي عربية بتتخبط و بتتحك اهم حاجة انك بخير
و بالنسبة للناس اللي بتاكل على العربية عادي جدا بردو هتعملهم اي
انا مرة كنت راكن العربية رجعت لقيت اقسم بالله حوالي 10 او 15 واحد كانو لابسين لبس مدرسة ثانوي و قاعدين يطبلو على كل حته فيها السقف و الكبوت و الشنطة. بيطبلو و بيرقصو و اول ما شافوني قعدو يضحكو و يقولو معلش
فكك دي بلدنا عادي يعني

[verna2008auto]

ياريت تنقي المكان اللي انتا بتركن فية ... حتي ولو بعيد عن البيت شوية
بس يكون في حته مش قدام محل ولا ناحية ممر ولا مدرسة
الحاجه الاهم ... ان كلنا سايبين فلوس في الشارع .. يعني مش بنطلع العربية معانا البيت ..
ممكن تشتريلها غطا .. وابقي غطيها .. وماتنساش تربط الغطا كويس عشان ما يتسرقش

[mohkhattab]

متزعلش نفسك ، دى ضريبة انك تشترى عربية جديدة فى مصر

[M.Al-Hefnawy]

في مركز اسمه "زيرو" في مكرم عبيد عامل إعلان هنا في المنتدى ممكن يردلك الخبطة بالشفط ويعالج الخرابيش ... ان شاء الله بسيطة وما تضايقش نفسك.

[john55]

انا جبت العربيه جديده وبعد اسبوعين وهي واقفه عربيه القمامه الحديد اللي بيشدها عامل القمامه دخلت في العربيه جرحت الاكره وجزء من الباب الخلفي ساعتها زعلت جامد لكن بعد كدا عادي فتزعلش لان كل العربيات في مصر لازم يكون فيها ختم الجوده اللي هو واحد بمسمار بيمشي بطول العربيه انا شفت قدامي عربيه شيفروليه كروز واحد مجنون رسمله قلب وكاتب اول حرف من اسمه واسمها ربنا ينتقم منه لان طبعا حرق قلب صاحبها علي عربيته فلاحسن تجيب غطاء للعربيه يساعد شويه في حمايتها وشكرا

[hany63]

500 كيلو ؟ دي تعتبر مشيت كتير قوي بالنسبه للي حصل لي
اول عربيه زيرو في حياتي بعد الفيات المستعمل كانت لانسر 98 ( واخد بالك من النقله الجامده دي)
يوم الترخيص قبل ما تعلق نمر طلعت الشغل و نزلت لقيت الاكصطدام الامامي مخلوع و مرمي قدامها زي ما يكون عربيه شبكت فيه و خلعته كان هيجي لي القلب ساعتها
الكورولا و هيا عامله 200 كيلو و انا واقف بقالي ثانيتين لقيت في المرايه عربيه خنفسه فولكس جايه و بتقرب لحد ما فرملت في عربيتي و نزلت اتخانق راح الراجل قال لي انا صايم و مش مركز اعترض بقى على كلام ربنا
الباسات بقى قعدت قافل على نفسي 3 ايام و مش عايز اكلم حد
نزلت جراج البيت و بركن في حته مخصوص بعيد عن اي حد لقيت حد انتهز فرصة ان البواب مسافر و احلى رسم بالمفك لدرجة ان الصاج محفور و قام بالواجب في جميع انحاء العربيه ما عدا السقف
واحد صاحبي لسه شاري بي ام الفئه الخامسه و مروح من المعرض طلع الشغل يجيب اصحابه يفرجهم لقى واحده ست حطه قفص عيش على الشنطه قعد يزعق (ياريته ما عملها)و جري عليها راحت ساحبه القفص بعنف عشان يسكت كأن الشنطه اتكحتت بسكاكين راح راجع التوكيل يرشها في نفس يوم الاستلام

[Samir Elshahawy]

علشان الكلام اللي قاله أستاذ / هاني ده

أنا لايمكن أجيب عربية ألماني (بي أم - مرسيديس) حتي لو معايا فلوسها أو حتي السوناتا أو السانتافي اللي نفسي فيهم , علشان لو حصل لها كده ممكن أطب ساكت

[m7mda7md]

شوف يا كبير... انا قعدت سنين اعاني من المواقف دي،،،، بس قررت اعمل الصح! فاكس شكل العربيه من بره و الجدع يستحمل... بدخل غباوه مع الكل... لسه امبارح واحد بموتوسيكل عكنن مزاجي، قومت كاسرله فانوس،،، الادب مينفعش... اي واحد بيغلس عليا بمسي عليه بالرفارف.... الرفارف عندي بقوا بقلاوه و يعدلهم بايدي عشان الباب يفتح كويس..... عالم لازم تتعلم الادب

[john55]

انا هقول لحضرتك علي موقف انا شفته بيعني عربيه كارو واقفه في مزلقان مقفول ووراها عربيه تويوتا كرولا 2012. المهم القطار كان اسباني وجاي بسرعته الحصان راح خايف ورجع باقصي سرعه بضهره راح خابط كبوت العربيه الكرولا وطبقه من قدام الراجل يعيني نزل بص ووقف يضرب كف علي كف دي تعتبر ملاحظه يعني في اي مزلقان حاول تقف بعيد عن اي عربيه يجرها خيول وشكرا

[drmohamedkhater]

احتسبهم عند الله
حتى الناس اللى بتقعد تاكل على العربيه خليها فى نيتك ان ربنا يأجرك عليها ثواب
يمكن يكون حاجة اخف من حاجة تانيه - و ربنا يكفينا و يكفيك شر المخبى
و لما تيجى فى الحاجات دى ربنا يحفظنا من البلاوى الاكبر
قول يا رب و احتسب عند الله و متدعيش على حد علشان ربنا يحفظك

[micho129]

انا سعيد جدا بمشركتكم كلكم واضح ان هي البلد كده وده كله عادي

[YHYAKOTB]

بص ياباشا طالما جديدة معروفة انك لازم تخبطها وحتى لو انتا محترف ومية مية فى السواقة هتلاقى الى هيخبط فيك ولازم حد يمسيلك عليها عشان كدة نصيحتى ليك متعملهاش سيبها تاخد العين اصل بلدنا بقت منفسنة كلها وربنا يهدينا جميعا والله بتتخبط وهى واقفة

[sabregas2010]

معلش يا استاذ هانى هى كده خدت العين ويا ريت تخليها كده فترة ولو كنت مأمن عليها ما تعملش فيها اى حاجة غير قبل نهاية التأمين عان لو حصل لها حاجة تانية لا قدر الله تعملها كلها مرة واحدة
وربنا يحفظلنا عربياتنا جميعا من كوارس الشوارع