(( سنس )) الفرامل - موضوع للنقاش والشرح

[verna2008auto]

احبائي واصدقائي ... اسعد الله (( حياتكم ))
السلام عليكم ورحمه الله وبركاته

موضوع مهم جداااا للنقاش في نقطة (( سنس )) الفرامل واختلافها من سواق لسواق
وبرده واختلافها من حاله الاجزاء الداخلية ومكونات الفرامل وخصوصا (((( الفيرنا ))))
معلش انا ها اشرح للمبتدئين (اللي زيي) عشان يتخيلوا الموضوع ولو حد واجه مشكلة ممكن يعرف سببها اية
كل اللي ها اكتبة ان شاء الله جي من خبرتي الشخصية في قياده ((( الفيرنا ))) الاوتوماتك (( ونقبل التعديل والتصحيح من الخبراء والمتخصصين عشان نتعلم منهم))

في البداية دي صورة توضيحية لاهم اجزاء الفرامل



بالطبع الجزء اللي علية السهم الاحمر ده ( الطنبورة ) brake disk .. والجزء الابيض منها دة سطح املس مافيهوش ((تعريجة ولا موجة ولا دواير ولا مخربش )) لان لو فيها حاجة من دول يبقي لازم يتخرط عند الخراط او تتغير اصلا ..
( طنبورة الفيرنا اخرها اخرها عن تجربة شخصية ) تتخرط مرتين فقط وبعد كده تتغير عشان سمكها ما يضعفش ويتقطم لاقدر الله ويعمل مشاكل

المكان ده مهم يبقي املس عشان بيقفش فية تيل الفرامل ..
تيل الفرامل بيركب في الجزء اللي قدامة ( الكاليبر ) بيت التيل

وده بردة مكان الفرامل الخلفية بتاعت( الهاند بريك) وبرده ليها علاقة اثناء السواقة يعني بتقفش بنسبة مش بطاله مع فرامل القدم ( انا ما حستش بيها اصلا ) لاني مش با احب اعملها رجلاش با سبها زي ما هيا بالتيل بتاعها وماغيرتش خالص قبل كده


نرجع بقا للجزئية الهامة جدا بالنسبة للفرامل وهيا ((( زيت الفرامل )))
انا عن نفسي ما غيرتهوش قبل كده انا زودتة فقط .. عشان روحت للميكانيكي خرجلي الهوا اللي في (ماستر الفرامل) عن طريق فك صامولة الزيت وانا ادخل العربية من جوة وافضل ادوس فرامل كتير لغاية ما يخرج شوية زيت كده من الفردتين بطريقتة وبيخرج معاهم لو فيه هوا زياده .. وبعد كده يربطها تاني وازود زيت بدل اللي نزل .. يعني قصة عبيطة كده بس مفيدة وبيسموها (( تعلية الفرامل ))

طيب نخش في المهم ...
انا ما حستش بثبات الفيرنا الا لما عملت اللي ها اقول علية
1- غيرت جنط من 14 ل مقاس 195*50*15
2- مسحت الطنبورة من الدوائر الي كانت فيها نتيجة للاحتكاك
3-عمل موضوع تعلية بدال افرامل اللي انا شرحتة فوق بتاع تخريج الهواء (( موضوع سهل واي حد ممكن يعملة بس لازم يكون فية حد معاك عشان يركب العربية و ( يكارك )
4- غيرت التيل بتاع الفرامل كنت با استخدم ( موبيس ) وغيرت ل ( جولد ) والله شغال حلاوه معايا رغم انة رخيص

........
اتكلم بقا عن حاجه يمكن تستغربوا منها ...
* انا لما اكون لابس عفوا يعني حزاء رياضي غير لما اكون لابس حزاء كلاسك بيفرق معايا في دوسة الفرامل
* انا لما بااكون في حاله نفسية مش ولابود برده بيفرق معايا في الفرامل
* لما با اسمع كاسيت عالي في العربية ( مركب صب وات1600+سماعات 800 وات ) بيفرق معايا في الفرامل

من المحظورات الخطر جدااااا جدااا فرامل الفيرنا مع (( رمل )) ومنحنيات .. حتي ولو ماشي علي 30 كيلو متر
وبرده بالطبع
بلاش بلاش بلاش الفرامل الجامده ... لان العربية (( هاتزحف ))
مافيهاش APS نظام مضاد للانغلاق..

يبقي الخلاصة بعد ما شرحت فوق نتفق ان الفيرنا مظلومة جدا في موضوع الفرامل ده ..
وممكن نحسن الفرامل بتاعتها بالطرق اللي انا قلتها فوق دي ..
طبعا فية طرق اخري مكلفة بتغيير الي عفشة رياضي بالكامل امامي وخلفي
يبقي
ولازم اسيب مسافه (( عربية )) فاضي بيني وبين اللي قدامي علي الطريق حوالي 5 ل 7 متر واحسن يكون 10 متر علي سرعة 80 كيلو ممكن تهدي وتوقفها

عاوز تجري بيها يبقي ها تسيب مسافة مش اقل من 25 متر بينك وبين اللي قدامك عشان تعرف تقف علي سرعة90- 100 كيلو متر
((( دي تقديراتي الشخصية )))

اللي عاوز يسوق الفيرنا لازم يعود نفسة علي ((( سنس )) الفرامل بتاعتها
انا تعبت علي ما بقا عندي شوية (( سنس الفرامل )) بتاعت الفيرنا ..
ارجوا اني اكون افدتكم
عاصم

[mado83]

بس جنط الفيرنا اعتقد انه اصلا 13 ولما حضرتك تغيره ل14 مافيش مشكله
انما لما تغير لل15 اعتقد تكون محتاج تغير الطنابير لاكبر علشان تقدر توقف ولا انا غلطان

[amagroup]

اخطر حاجه لما تكون راكب عربيه تجري ومتوقفش
انا سرقت الفيرنا مره واحده ب لمسافه 2كيلو ونص وكان الطريق فاضي وحسيت برعب منها علما باني كان معايا اسكودا فليشيا 98 وانت عارف بقي الالماني وثباته في الارض فمعرفش حكمي عليها سلبي بنسبه كبيرة ولا لأ

[loshabih]

فعلا اهم حاجه السنس وفاي عربيه عموما والفيرنا خصوصا...لاني ركبت عربيات الماني وبيحصل حاجه وبفرمل وبقول خلااص هلبس بس العربيه بتقف قبل منا متوقع بمسافه ...وعربيات تانيه زي 128 بتقف بعد ساعه مثلا

[verna2008auto]

بس جنط الفيرنا اعتقد انه اصلا 13 ولما حضرتك تغيره ل14 مافيش مشكله
انما لما تغير لل15 اعتقد تكون محتاج تغير الطنابير لاكبر علشان تقدر توقف ولا انا غلطان

مومبيك ... الفيرنا المانيوال بتنزل 13 والاوتوماتك اللي معايا بتنزل 14
انا غيرت ال 14 لجنط 15 بالمقاسات دي 195*50*15 وماغيرتش الطنابير (( طبعا ))
اللي بيركب علي الجنط ال 15 رينجات .. وانا مركبهم المونيا مش بلاستك

(( فعلا علاقة الطنابير الكبيرة بالثبات دي صح 100 % ))
لكن انا ما غيرطش الطنابير لان مش ها تتغير لوحدها لازم هيا وكمان الشمعدان ب بيت الفرامل بالمساعدين ... (( الدوشمه كلها )) وانا معملتش كده

جنط 15 + طنابير سليمة للفيرنا + تيل محترم = ثبات مقبول

[verna2008auto]

فعلا اهم حاجه السنس وفاي عربيه عموما والفيرنا خصوصا...لاني ركبت عربيات الماني وبيحصل حاجه وبفرمل وبقول خلااص هلبس بس العربيه بتقف قبل منا متوقع بمسافه ...وعربيات تانيه زي 128 بتقف بعد ساعه مثلا

تمام يا مومبيك ...انا جربت الميجان في الفرامل ((( اتسرعت ))) عشان طبعا با APS
العربية اتلحمت في الارض وكنت ماشي بسرعة وحبيت اقف ...

ماسوقتش الميجان تاني واتعقدت..


ورضيت ب (( سنس )) فرامل الفيرنا بتاعتي
وربنا يدمها نعمه ويحفظها من الزوال

[loshabih]

تمام يا مومبيك ...انا جربت الميجان في الفرامل ((( اتسرعت ))) عشان طبعا با APS
العربية اتلحمت في الارض وكنت ماشي بسرعة وحبيت اقف ...

ماسوقتش الميجان تاني واتعقدت..


ورضيت ب (( سنس )) فرامل الفيرنا بتاعتي
وربنا يدمها نعمه ويحفظها من الزوال

اومال بقه لو شفت فرامل ال525 هتقول اييييييييه

[verna2008auto]

اومال بقه لو شفت فرامل ال525 هتقول اييييييييه

مش عاوز اشووف

اوصفلنا طيب اي سنس انتا سانسيتوة بس ... من علي بعد عشان نحترم الفيرنا في قرارة نفسنا
علي فكرة ... الفيرنا حماله ا سيا والله ومالهاش فالسياسة ... ( تبع حزب الكنبة )
الفيرنا الغلبانة دي والله بس هيا عاوزة اللي (( يسنسها )) ويقدرها

[loshabih]

مش عاوز اشووف

اوصفلنا طيب اي سنس انتا سانسيتوة بس ... من علي بعد عشان نحترم الفيرنا في قرارة نفسنا
علي فكرة ... الفيرنا حماله ا سيا والله ومالهاش فالسياسة ... ( تبع حزب الكنبة )
الفيرنا الغلبانة دي والله بس هيا عاوزة اللي (( يسنسها )) ويقدرها

احب اقولك ان كل العربيات دي ركبتها لما كان معايا الادا...وكنت بنزل اركبها بحس اني راكب فزبا صيني تحت بي السلم
بس فعلا حاجه تانيه خااالص
وبرده من اكتر العربيات اللي بحبها وبحترمها السيات التوليدو فرامل وثبات وعفشه ممتازيين

[drmohamedkhater]

انا معاكم فى كل اللى بقوله
بس الفيرنا معايا مافيهاش اى مشكلة خالص فى الفرامل
ولا علشان الواحد ادعك فى ركوب عربيات كتير الكويس و الوحش الغالى قوى و الرخيص جدا - مش عارف

[Ashraf_Ibrahim]

عاصم بيه
اهلا بيك يا كبير
موضوع رائع طبعا
بس خليني اعلق على شوية حجات يا صديقي

في البداية دي صورة توضيحية لاهم اجزاء الفرامل



بالطبع الجزء اللي علية السهم الاحمر ده ( الطنبورة ) brake disk .. والجزء الابيض منها دة سطح املس مافيهوش ((تعريجة ولا موجة ولا دواير ولا مخربش )) لان لو فيها حاجة من دول يبقي لازم يتخرط عند الخراط او تتغير اصلا ..
( طنبورة الفيرنا اخرها اخرها عن تجربة شخصية ) تتخرط مرتين فقط وبعد كده تتغير عشان سمكها ما يضعفش ويتقطم لاقدر الله ويعمل مشاكل

*من وجهة نظري هي مرة واحدة بس اخرها تتخرط طنابير الفيرنا لأنها مش ملحمة اوي يعني


وده بردة مكان الفرامل الخلفية بتاعت( الهاند بريك) وبرده ليها علاقة اثناء السواقة يعني بتقفش بنسبة مش بطاله مع فرامل القدم ( انا ما حستش بيها اصلا ) لاني مش با احب اعملها رجلاش با سبها زي ما هيا بالتيل بتاعها وماغيرتش خالص قبل كده


رجلاش الفرامل الخلفية مهم جدا انه يتعمل كل فترة
عشان يظبطلك فرامل اليد دا رقم واحد
وكمان عشان ميعملش زيادات في الديسكات الخلفية
اضافة انه بيعليلك دواسة الفرامل

طيب نخش في المهم ...
انا ما حستش بثبات الفيرنا الا لما عملت اللي ها اقول علية
1- غيرت جنط من 14 ل مقاس 195*50*15
2- مسحت الطنبورة من الدوائر الي كانت فيها نتيجة للاحتكاك

* مسح الطنابير او مس الطنابير او خرطها بيتم لما نكون ماشيين ونفرمل ونلاقي رجرجة في الدروكسيون

3-عمل موضوع تعلية بدال افرامل اللي انا شرحتة فوق بتاع تخريج الهواء (( موضوع سهل واي حد ممكن يعملة بس لازم يكون فية حد معاك عشان يركب العربية و ( يكارك )

*دا من اخطر ما يكون لأنه بكدة مش بتحل المشكلة
زيت الفرامل من المواد اللي بنطلق عليها كيميائيا hygroscopic material
يعني مادة تمتص الرطوبة ووقتما امتصت رطوبة فقدت خواصها من حيث الانضغاط ودرجة الغليان وغيره ومبتقدرش تقوم بوظايفها كويس وعشان كدة بيكون فيه هوا في الفرامل وعشان كدة بينصح بتغيير زيت الفرامل كل 3 سنوات او 100000 كم اما انك تزود زيت الفرامل فدا مش حل خالص ولكن دا تحايل على المشكلة اضافة لأنك لما تزود زيت وتيجي تغير التيل الامامي هتلاقي ان الزيت اصبح اعلى من المستوى بتاعه
الصح ان الزيت كله بيتغير ومبيتزودش لأنه مبينقصش ولو نقص معناه وجود تسريب في منظومة الفرامل

4- غيرت التيل بتاع الفرامل كنت با استخدم ( موبيس ) وغيرت ل ( جولد ) والله شغال حلاوه معايا رغم انة رخيص

* دي خطوة لا تحسن اداء الفرامل ولكن خلينا نقول انك استعملت الجولد وشايف انه كويس لكن لا يقارن بالموبيس طبعا !

........
من المحظورات الخطر جدااااا جدااا فرامل الفيرنا مع (( رمل )) ومنحنيات .. حتي ولو ماشي علي 30 كيلو متر
وبرده بالطبع
بلاش بلاش بلاش الفرامل الجامده ... لان العربية (( هاتزحف ))

* التعامل مع فرامل الفيرنا او مع السيارات التي لا تحوي نظام مانع للانغلاق يحتاج لقليل من الخبرة ممكن نوضحها في رد مستقل لوحده لكن خليني اوضح ان الفيرنا قادرة على المناورة بس مش اي سواق هيقدر يعمل بيها دا لأنها ذات طبيعة خاصة قليلا

مافيهاش aps نظام مضاد للانغلاق..

* abs = (anti blocking system)

جزاك الله خيرا يا عاصم على الموضوع دا

[verna2008auto]

احب اقولك ان كل العربيات دي ركبتها لما كان معايا الادا...وكنت بنزل اركبها بحس اني راكب فزبا صيني تحت بي السلم
بس فعلا حاجه تانيه خااالص
وبرده من اكتر العربيات اللي بحبها وبحترمها السيات التوليدو فرامل وثبات وعفشه ممتازيين

يا مومبيك مقارنة الفيرنا ب التوليدو والميجن ... مقارنة غير متكافئة ...
بس احنا بنقول ياددددوب الواحد يبقي عندة سنس الفرامل عشان يستريح في سواقتها

انا معاكم فى كل اللى بقوله
بس الفيرنا معايا مافيهاش اى مشكلة خالص فى الفرامل
ولا علشان الواحد ادعك فى ركوب عربيات كتير الكويس و الوحش الغالى قوى و الرخيص جدا - مش عارف

يا مونشير انا عارف ان الفيرنا مافيهاش مشاكل والحمد لله ..
احنا بنتكلم عن احساس الواحد بالفرامل في مجمل اي سيارة وخصوصا الفيرنا

طبعا الفيرنا (( حوت الطريق ووحش المناورات الشرس ))

عاصم بيه
اهلا بيك يا كبير
موضوع رائع طبعا
بس خليني اعلق على شوية حجات يا صديقي

مومبيك اشرف ..
احنا غلابة .. ومنك نستفيد



جزاك الله خيرا يا عاصم على الموضوع دا

[Samir Elshahawy]

الموضوع جميل جدا و فكرته هايلة و الشرح مبسط و مدعم بالصور التوضيحية

لذا تم أضافته لفهرس موضوعات الفيرنا - علي أعتبار مشكلة الفرامل من اهم العيوب الفنية للعربية دي

http://www.nilemotors.net/Nile/299492-a.html

[YHYAKOTB]

الكاوتش بيفرق بردو فى الفرامل اختار نوعية كويسة هتحسنلك الاداء انا عندى الفرامل كويسة الحمد لله سواء بالكاوتش النسر الى كان فيها وبريدجستون الى جبتة حسن تماسك العربية فى الارض وثقىة اكبر بالفرامل

هى المشكلة الى بتواجهنى دلوقت هى لما بدوس على الدواسة بحس بيها بتتهز تحت رجلى مش عارف الموضوع دة جديد كدة تيل ولا اية التيل القديم كدة ماشى بية 45 الف كيلو

[khaabas]

حد جرب يركب abs في الفيرنا