محتار جدا لشراء سيارة

[Maghany]

السلام عليكم
محتاج مشوره
انا كان معايا فيات 128 موديل 96 و الصراحة كانت مريحاني بس قولت اجدد
المهم اعجبت بالاكسنت الار بي جدا و كنت ناوي اشتريها فبعت 128 و جيت اشتري لاقيت العربيات غليت و صرفت جزاء كبير من الفلوس و للاسف مش هقدر اجيبها تقسيط

بفكر دلوقتي اجيب اكسنت 2006 او 2005 اللي هيا 1300 تقريبا سعرها 42 الف او لو فيه حاجة احسن منها و في نفس الرنج يا ريت تقولوا

احتياجاتي من العربية
1- مسافة يوميا 100 km
2- مش بجري يعني اخري 120 km/h
3- اسعار قطع الغيار حنينة
4- اعادة بيع حلوة لاني ان شاء الله اجيب زيرو اخر السنه و مش عايز اخسر كتير
5- سفر مرة في الشهر مسافة 200 km

عندي كام سوال كده
1- هل التكيف مع 1300 هيتعبي لو جبت اكسنت ؟
2- سمعت ان فيه تقفيل مصري في الموديلين دولالكلام ده اعرفه ازاي ؟
3- فيه حاجة احسن و في نفس السعر و للاغراض اللي قولتها ؟

شكرا

[Samir Elshahawy]

طيب ماتجيب حاجة ياباني مستعملة و تعيش معاك سنتين ثلاثة كمان
- فكر في الياريس الاوتوماتيك أو حتي المانيوال موديل 2008 مثلا هاتعمل في حدود من 70 الي 80 ألف
- فكر في الكورولا 2006 أوتوماتيك ممكن تعمل في حدود 60 ألف

أكسنت 1300 كويسة بس قطع غيارها هاتكون مش متوافرة لأنها بالفعل غير متاحة في التوكيل بشكل كافي

[eng/ahmed_go]

فكر في الكريستالة عربية محترمة بس دور كويس على واحدة تكون مش متبهدلة وهتلعب في 47 الف مش اكتر

[Maghany]

طيب ماتجيب حاجة ياباني مستعملة و تعيش معاك سنتين ثلاثة كمان
- فكر في الياريس الاوتوماتيك أو حتي المانيوال موديل 2008 مثلا هاتعمل في حدود من 70 الي 80 ألف
- فكر في الكورولا 2006 أوتوماتيك ممكن تعمل في حدود 60 ألف

أكسنت 1300 كويسة بس قطع غيارها هاتكون مش متوافرة لأنها بالفعل غير متاحة في التوكيل بشكل كافي

ياريت بس زي ما حضرتك عارف الفلوس هي اللي بيتحكم الواحد

[Maghany]

فكر في الكريستالة عربية محترمة بس دور كويس على واحدة تكون مش متبهدلة وهتلعب في 47 الف مش اكتر

صعب الوحد يلاقي نضيف فيها

انا فكرت بس لاقيت اني هجيب عربية عدي عليها علي الاقل 13 او 14 سنه فالاحسن اجيب عربية عدي غليها 7 او 8 سنين بالكتير

[aw2100]

انا بارشحلك عربية جولف المانى فى حدود 50 الف بس عربيات 10/10 وثبات ممتاز وقوة موتور جبار وبراحتك طبعا !!

[Land_Cruiser]

ممكن تفكر في النيسان الصني : عربيه كويسه و قطع غيارها متوفره و قليله الأعطال و تمنها فيها

[midofarh]

بيجو405 ايرانى 2007 45 الف جنيه حاله ممتازه هخلص فيها بكرا لنسيبى

[Nashaat Rady]

طبعا الفلوس حاكمانة في الموضوع ده.... انا برشح لانوس في الظروف اللي زي ده وقطع غيارها عند البقال...

و انت بتقول انك حاتبيع آخر السنة، ان شاء الله. عربية مش بطاله، سباتها رايح في سوتميت داهية و ما فيهاش ريحة الأمان، بس عملية جداً للجيب...و هذا هو المطلوب للتسعة شهور القادمين و تبيع في نفس اليوم اللي تعرضها فيه.... بس اهم حاجة تستنضف.

الأهم الأهم، انك تستخير الله.

[Nashaat Rady]

طبعا الفلوس حاكمانة في الموضوع ده.... انا برشح لانوس في الظروف اللي زي ده وقطع غيارها عند البقال...

و انت بتقول انك حاتبيع آخر السنة، ان شاء الله. عربية مش بطاله، سباتها رايح في سوتميت داهية و ما فيهاش ريحة الأمان، بس عملية جداً للجيب...و هذا هو المطلوب للتسعة شهور القادمين و تبيع في نفس اليوم اللي تعرضها فيه.... بس اهم حاجة تستنضف.

الأهم الأهم، انك تستخير الله.

[sewefy]

جيب فيرنا وانته مطمن تكيف حلو عربيه بتاعت سفر وحركات اعطالها مفيش وفرق مش بعيد عن الاكسنت

[p r i n c e]

فيرنا
قطع غيار عند البقال
اعطال قليلة جدا
أي حد بيفهم فيها و موتورها قوي و تكييفها ممتاز بما إن حضرتك باين عليك مهتم ب موضوع التكييف
دا غير انها ممتازة ف إعادة البيع و عمرك ما تخسر فيها

[S O P H O S]

انا راي مدام مش بتجري اكتر من 120
يبقي الفيرنا فيه كل الي حضرتك بتقول عليها
دور علي حالة نظيفة وتوكل علي الله ..

[shaaban2008]

طب هيلاقي فيرنا ب 42 الف ؟؟؟؟

[AlGazar2]

ارشحلك لانوس او نوبيرا
قطع غيار عند البقال - بتتباع بعد ما تعرضها بنصايه - ممكن تصلحها بنفسك بعد كورس ال 128 فى الميكانيكة و الكهرباء - تكييف جامد جدا - عربيه تستحمل البهدلة جامد - ممكن تكسب فيها لما تبيع و ثباتهم كويس و خصوصا النوبيرا و فراملهم بتوقفهم

و ممكن فيرنا بس معتقدش هتلاقى حاله نضيفه ب 42 غير ان اغلب الى سايقنها شباب بيطلعوا عين امها
و ثباتها رايح فى داهيه و فراملها كذلك و ماتورها شديد اوى عليها ( عيب فيها على فكره مش ميزه)